سرگال:عمران خان آ منسا کہ پاکستانی پؤج او آئی ایس آئی آ دھشت گرد آنر تربیت داسا

چوش کہ اے اصلیت کھسے آژ لکسی آ نعیں کہ سوویت پؤج آنی افغانستان آ آئیغ آ پھدا آنہاں نی حلاپ مڑغ آپا پاکستانی پؤج او آنہی خفیہ ایجنسی آئی ایس آئی آ دھشت گردی ائے تربیت داسؤ مجاہد آنی کھیپ تیار کھزغئے سا ۔ہمیں اصلیت آژ دی ہر کھسے پوہ ایں کہ اے مچھیں منصوبہ امریکہ ائے ایجنسی سی آئی اے آئے نگرانی اوسنگتی آگو اگا ودھسغئے سا ۔مگہ ہشتاد ائے دھائی ائے آخیر آ سوویت پؤج آنی گڑدغ آ پھدا امریکہ ائے ہمیں ڈیھ آژ دل لوٹھی آسر بیسغئے سا۔او چھی اے روش آنی پھدا سوویت یونین دی ٹکر ٹکر بیسغئے سا۔مگہ افغانستان آژ پاکستان تکا دھشت گردی ائے ہماں کہ فیکتری قائیم بیسغئے ساں آں سوویت یونین پؤج آنی گڑدغ آ پھدا دی سرگرم رہسغاں او پاکستان ائے مچھیں زور کشمیر ائے وٹا بیسا۔افغانستان او آنہی دمغ آ نہ امریکہ
موجوت اسا نہ سویوت یونین۔مگہ ہماں دھشت گرد ٹلہ آنر پاکستان آ تربیت داسغئے سا آنہاں نی بستگی کھدیں دی نہ پھرشتا بلکہ
گیش مضبوط بیسغاں۔بہر حال اے یک مزن ایں قصو ایں مگن ہماں وختے آ دی دھشت گرد او پاکستانی ایجنسی آنی بستگی او دھشت گردی ائے دپ آنی اندرا آنہاں نی عمل آنی ٹؤک بیسا تہ پاکستان ائے وٹاژ سرا آژ انکار بیسا کہ پاکستان دھشت گرد آنی
دست رکھیائی کھنغیں۔پھجی آ ہی یک کمزور دلیل آں پیش کھناں کہ پاکستان وا دھشت گرد آنی پھجی آ مِڑغیں او نی تکا ہزاریں
پاکستانی آنہاں نی دھشت گردی ائے ھلگر آ مُڑتھغاں۔مگن انکار ائے باوجوت کھدیں کھدیں پاکستانی حاکم او پیسر ائے حکمران
ہمیں ٹؤک آر مناں کہ باز ٹلہ آنر پاکستان آ قائیم کھُزااو آنہاں نی واہریائی کھنغیں۔مثال آ پیسر ائے پاکستان ائے صدر جنرل پرویز
مشرف آ دی کے ای دھکا ہمیں ٹؤک آ منسا کہ لشکر طیبہ او ہماں وڑ ائے دیگر تنظیم آنر پاکستان آ ہی کشمیر آ جہاد آپا قائیم کھُزغئے سا ۔یک نی ایں پیرا عمران خان ائے غیں ہمائی آ آنہی آ صاف ایں لپظ آنی اندرا گوشتا کہ پاکستانی پؤج او آئی ایس آئی آ القاعدہ او باز دیگر ٹلہ آنر تربیت داسغئے سا۔آنگا تہ اے ٹؤک لکسی آ نعیں مگہ سری ایں دھکا ھِچھ پاکستانی سروزیر آ رسمی
ایں وڑا ہمیں اصلیت آ منسا۔القاعدہ آ آ اوسامہ بن لادن آ ۱۹۸۸ آ قائیم کھزغئے سا او اے پاکستان ائے شہر پشاور آ قائیم بیسغئے
سا۔ہماں وخت اسا ہماں وخت سوویت پؤج افغانستان آژ گڑتھؤ رؤغئے ساں۔عمران خان ائے گُشغ ایں کہ سوویت پؤج ائے گڑدگ
آگو امریکہ ائے دل لوٹھی ہماں دمغ آژ کھمیں بیسا گُڈا دی پاکستان او القاعدہ ائے بستگی قائیم رہسا۔اے ٹؤک عمران خان آ نیویارک سٹی ائے فارن ریلیشنز سینتر ائے یک بیٹھک اندرا گوشتغاں۔پاکستان ائے سروزیر آ اے دی منسا کہ نوہ یازد ائے دپ
آ پھدا ہماں وخت امریکہ آ ہماں وخت القاعدہ ائے حلاپ مڑائی بِنا کھُزغئے سا او پاکستان آ امریکہ ائے سنگتی کھنغ آپا فیصلہ
کھُزا تہ پؤج ائے یک مزن ایں دُھر ناوش بیسا او جنرل مشرف ائے حلاپ بیسا۔بہر حال ہموزا تکا دھشت گردی آگو پاکستان ائے
بستگی ائے سوال ایں تہ اے ٹؤک روش بھیرا پدھر ایں پاکستان دھشت گردی ائے مزن ایں اڈہ ایں اے چھڑوئی آ ھِند ائے الزام نعیں بلکہ یک دائیمی اصلیت ایں۔چند ماہ سرا دی عمران خان آ امریکہ آ یک تھنک ٹینک ائے بیٹھک آ گوشتغئے سا کہ نی دی
پاکستان اندرا سی آژ چھل ہزار مسلح دھشت گرد ٹلہ سرگرم آں۔او اے کہ گوستی ایں سرکار آ آنہاں نی حلاپ ھچھ مناسب کاروائی نہ کھُزا مگہ آنہی سرکار سخت ایں گام زیری۔