سرگال:چھے افگانستان منصوبہ آگو کھُزی ایں ھِلگر آنژ چھُٹی؟

بیست او ہشت ستمبر ۲۰۱۹ آ افغانستان آ صدارتی گچین کاری بیسغئے سا۔ہمیں ٹؤک ائے اُمیت تہ سرا آژ اسا کہ طالبان ائے وٹاژ گچین کاری آ دارغ ائے مُچھیں کوشش بی پھرچھے کہ طالبان آ دھمکی داسغئے سا کہ آں گچین کاری ائے عمل آنر سوب مند بی اغ نعیلاں ۔آنہاں نی ہمیں گُشغ ائے مقصد اے بی کہ آں تشدد ائے دگ اپنائیناں ۔اصلیت تہ اش انت کہ اینگے تشدد پسند ٹلہ آنر امن ائے
ٹؤک پسند نوی۔آں چھڑوئی آ تشدد ائے زوان پوہ بی آں او زائیف او چھُکھ او پھیرُنڈ آنی حون بہائینغ
ہی آنہاں نی اگا سجوں آنژ مزن ایں کار بی۔نہ چھڑوئی آ طالبان بلکہ ھچھ دی اینگے ٹلہ آر امن او
سلامتی آگو ھچھ دل لوٹھی نعیں۔آں طاغت او تشدد آگو سروکی چکا قوضہ کھناں۔چوش کہ جمہوریت او آئینی ڈؤل چکا حکمرانی کھنغ چکا آنہانر باور نعیں ہمیں خاطرہ آنہانژ اے امیت کھنغ
دروغ ایں کہ آں جمہوریت یا جمہوری قدر ّنی احترام کھناں۔جہان آ ہموزا ہموزا دی دھشت پسند ٹلہ
آں آں مُچھیں جمہوری عمل آنر پسند نہ کھناں مئے دمگ ائے اینگے بد بخت ملک ایں ہماں کہ گوستی ایں چھل سال آنژ سوویت پؤجی آنی مداخلت،مڑائی،خانہ جنگی او سروکی چکا قوضہ کھنغ
ائے کشپکش ائے شکار رہسا۔گوستی ایں صدی آ انتہا پسند ٹلہ طالبان آ تشدد کھُزؤ افغانستان چکا
قوضہ کھُزا۔پاکستان ائے پھجی آ جہان ائے دو سئے ملک آں آنہی آ منسا۔سوویت پؤجی آنی دیما ہی
آنہاں گو مقابلہ کھنغ کھنغ آپا کے ای مسلح انتہا پسند ٹلہ مجاہدین ائے نام آژ قائیم کھُزی آ شزغاں او
آنہاں نی تربیت ائے انتظام کھُزی آ شُزغئے سا۔امریکہ ائے ایجنسی سی آئی اے او پاکستان ایجنسی
آئی ایس آئی ائے سنگتی آگو اے کار مزن ایں پھیمانہ چکا اگا بیسا او ہتھیار آنی تربیت داسی آ شُزا۔
ہشتاد ائے دھایئ ائے آخیر آسوویت یونین دی ٹُکر ٹُکر بیسا ۔مگہ ہماں دھشت گرد ٹلہ آنر تربیت داسی آ شُزغئے سا آں وتی جاگاہ یک طاغت بیسغاں۔آں تشدد ائے بغیر یک گام دی زُڑتھ نہ کھناں۔
سوویت پؤج آنی گڑدغ آ پھدا آں بیروزگار بیسغاں تہ آں تخریب کاری ائے وٹا بیسغاں۔القاعدہ ڈؤل
ائے ٹلہ ہماں کہ کھدیں امریکہ ائے سنگت اسا آں امریکہ ائے حلاپ بیسا۔آنہاں نی لیڈر اوسامہ بن لادن ائے لوغ افگانستان آ اسا ۔طالبان سروکی آ آتکغئے ساں ۔ہمیں نیمگا یازد ستمبر ۲۰۰۱ ائے
امریکہ ائے ٹریڈ ٹاور او دیگر خاصیں جاگاہ آنی چکا القاعدہ آ ھِلگر کھُزا۔آنہی آ پھدا امریکہ آ
افگانستان آ دھشت گردی ائے حلاپ جنگ بنا کھُزا۔نی افغانستان اندرا حالت اش آں کہ گوستی ایں
۲۸ ستمبر آ ہموزا صدارتی گچین کاری منعقد بیسغئے سا ۔طالبان آ ہمیں عمل آنر آسر کھنغ ائے مچھیں کوشست کھُزا او وتی ھلگر تیز کھُزیش۔آنہی اثر ووٹنگ چکا مان آتکا ۔ہمیں ماہ ائے آخیر تکا
گچین کاری ائے نتیجہ دیما کھایاں ۔گچین کاری ائے بارو آ تشدد ائے دپ آنی اقوام متحدہ ائے رپورٹ ائے روگا ۸۵ مڑدم جنجیسغاں او ۳۷۰ ٹھپی بیسغاں۔اقوام متحدہ او جہانی براسی آر ہمیں
ردین حالت آنی چکا ویچار کھنغ لوٹھی۔