سرگال:ترکی سیریا اندرا آچ بندی آپا تیار

چند روش سرا ترکی آ کُر مڑوک آنی حلاپ کاروائی کھُزؤ سیریا ائے یک بہر چکا ھِلگر کھُزغئے سا۔جہان ائے باز ملک آں ترکی ائے ہمیں کاروائی آ پسند نہ کھُزا۔ھند آ دی ہمیں ھلگر آپا ترکی ائے بدگوشی کھُزا۔اے ٹؤک نہ چھڑوئی آ سیریا آپا پَکر ائے اسا بلکہ مچھیں جہان آنہی آر پکر ائے نیاہ آژ گندغاں ۔سجوں آنژ ردین ٹؤک اے اسا کہ ھچھ دی آجو او ود مختار ملک چکا ہمیں وڑ ائے ھلگر

کھُزی آ شزغئے سا ہماں کہ عالمی امن آ خطر آ ما کھنت ۔اشی ائے علاوہ اے ٹؤک دی اعتراض کھنغ ائے اسا کہ یک ملک آ یک دوہمی ملک ائے گیسوئین مسلہ ائے نیمگا مداخلت کھُزغئے سا۔

ہمائی ائے ھچھ جواز نویس بی۔اے بین الاقوامی اصول آنی دی حلاپ ایں ۔بہر حال اے ٹؤک اطمینان اے غیں کہ ترکی آ آچ بندی آپا آمادگی پدھر کھُزا او امیت پیدا بیسا کہ گپتران آگو ھچھ حل

درا درا کھنغ بیس بی ۔گوستی ایں پنچ شمبھے آ امریکہ ائے نائیب صدر مائیک پنس آ جار جھزا کہ

امریکہ او ترکی آ ہمیں ٹؤک آپا ہم صلاحی پھیدھارتھا کہ جال سیریا آ پنچ روش آنی آچ بندی آپا

تیار ایں ۔ہمیں نیمگا کُرد آنر ہماں سیکیورتی زون آژ گڑدغ ائے موقع مِلی برؤ ہماں کہ ترکی ائے

بُرز آ بیست میل ائے دیری چکا ایں۔امریکہ ائے نائیب صدر آ داسی ایں اطلاع ائے روگا آنہاں نی

ہمیں مشن ائے اصل ایں مقصد مڑائی آ بند کھنائینغ اسا ہماں کہ سیریا چکا ترکی ائے ھلگر آ پھدا

بنا بیسغئے سا۔ترکی ائے پؤج او ترک حامی سیریائی مڑوک آں کرد آنی حلاپ جال سیریا اندرا وتی ھلگر یک ہپتغ سرا ہماں وخت بنا کھزغئے سا ہماں وخت امریکہ ائے صدر ٹرمپ آ جار جھزا

کہ ہمیں دمغ آژ امریکہ ائے پؤج گڑدغ آ لوٹھغیں ۔ہمیں جار ائے دو گھنٹہ پھدا ہی اے ھلگر بیسغئے

سا۔بہر حال ہمیں نیمگا ہماں دی ناوشی پیدا بیسا او کھسے آ چھے فیصلہ کھُزا،آنہی چکا پھدا بحث

بیس بی ۔مگہ سجوں آنژ مزن او اہم پھیغام ہمش ایں کہ آچ بندی آ پھدا ہڑ دوکین وٹاژ چین ائے ساہ

گِتی آ رؤ ورنہ کے ای وڑ ائے گمان پیدا بیسغئے ساں۔یک خطر تہ وا امریکہ آپا دی اسا کہ ہمیں مڑائی ائے نتیجہ آ داعش آنی حلاپ برسر پیکار آنہی کرد سنگت نیم دگ آ نہ الاں براں۔امریکہ ائے

نائیب صدر واجہ پنس او ڈن ائے وزیر واجہ پومپیو آ آچ بندی ائے ہمیں فیصلہ چکا اطمینان پدھر

کھُزؤ اے گوشتا کہ اے یک مزن ایں دیم روی ایں ،درگتہ کہ صدر ٹرمپ آ وتی یک تویت آ اے

گوشتا کہ اے مڑدمی تہزیب آپا یک مزن ایں او او اہم روش انت۔گُڈا دی ترکی ائے حوالہ آژ اگر ٹؤک کھُزی آ برؤ تہ اے گشغ بیس بی کہ ترکی ہماں کہ لوٹھغئے سا آں آنہی آر مِلسا۔ہماں وخت

سیکیورتی زون آژ کرد پؤج گڑداں رواں ترکی وتی عہد ائے روگا مستقل آچ بندی آپا تیار بی رؤ۔بہر

حال آچ بندی آژ حالت تہ مزن ایں حد تکا بدل بیسغاں او فوری ایں ڈؤل چکا مڑائی ائے خطر ٹلسؤ

شُزا۔مگہ عالمی پھیمانہ چکا جتا ملک آنی سروک آنر اے لوٹھی کہ ھچھ دی فیصلہ کھنغ ائے وخت

یا بیان دئے آژ سرا آں احتیاط کھناں۔سمجھ آگو ھچھ دی ٖفیصلہ کھناں ،تکھائی آگو کھُزی ایں فیصلہ

یا جار نہ چھڑوئی آ قوم او ملک آنی آپا شَر نوی آں بلکہ کھدیں کھدیں آں ہمالیاتی ڈؤل ائے نادانی

آ بدل بی آں۔امیت ایں کہ نی ترکی او سیریا ائے نیمگا پیدا بی اغ والا ایں بحران ھچھ فریق آپا دیگر

پریشانی ائے وجہ نوی ۔او ہر کھسے ائے سیماں محفوظ بی آں۔