سرگال:پاکستان ایف اے ٹی ایف ائے ھَکل آ پھدا گرے لِسٹ آ رہی

پاکستان ائے وٹاژ کنترول لائین چکا آچ بندی بھورینغ آ پھدا ھند پؤج آ پاک مقبوضہ کشمیر آ واقع دھشت گرد آنی جھوک او پاکستانی پؤجی چوکی آنر نشانہ کھُزا۔پؤجی سروک جنرل بپن راوت آ گوشتا کہ ھند پؤج ائے ہمیں جوابی کاروائی آ باز دھشت گرد او پاکستانی پؤجی مُڑتھگاں۔پاکستان
آچ بندی ائے سرا آژ خلاف ورزی کھناناں پھیزاغیں ۔مگہ جموں وکشمیر آژ دفعہ ۳۷۰ آسر کھنغ آ
پھدا آژ آنہی آ چھی اے تیزی بیسا۔کشمیر ائے مسلہ آ پاکستان بین الاقوامی حمایت گرغ آپا ناسوب
رہسا ۔او ہمیں سبب ایں کہ آں نہ چھڑوئی آ آچ بندی ائے حلاپ ورزی کھنغیں بلکہ آنہی آ دھشت گرد
ھند اندرا دیم دئے اغ ائے وتی عمل آنر تیز کھُزا۔مگہ آنہی ہر کوشست آر ھند پؤجی آں ناسوب کھُزا۔
ہمیں نیمگا فائیننیشل ایکشن تاسک فورس آ پیرس آ وتی اجلاس آ پاکستان آ فروری ۲۰۲۰ تک ائے
مدت تکا وتی گرے لسٹ آ برقرار ایر کھنغ ائے فیصلہ کھُزا۔ہمیں وڑا آنہی آ اسلام آباد آ دھشت گرد
آنی مالیاتی واہریائی او منی لانڈرنگ ائے حلاپ سخت ایں کاروائی کھنغ آپا چھیار ماہ آنی مدت ائے
وخت داسا۔مہلت ودھینغ آژ سرا تاسک فورس آ پاکستان آر ایکشن پلان ائے پدھر کھُزی ایں ٹک آنی
روگا منی لانڈرنگ او دھشت گردی ائے مالی مدد ائے حلاپ کاروائی نہ کھنغ آپا باز ھَکل داسا ۔
ایف اے ٹی ایف آ یک پیرا آ گوشتا کہ اگر پاکستان آ آنہی ایکشن پلان ائے ٹک آنی چکا عمل نہ
کھُزا تہ آنہی آ بلیک لسٹ آ ماکھُزی آ برؤ او آنہی گون سؤداگری او اقتصادی ایں سیال داری چکا
پابندی جھزی آ رؤ۔تاسک فورس آ اے دی صاف کھُزا کہ پاکستان آ آنہی ائے ۲۷ ٹِک آنژ چھڑوئی آ
پنچ چکا کاروائی کھُزا ۔ہمیں خاطرہ آنہاں نی وٹاژ کھنغ والا ایں کاروائی اطمینان دؤخ نعیں۔ایف اے
ٹی ایف ائے بیٹھک آ اے ٹؤک نوٹ کھُزی آ شُزا کہ لشکر طیبہ او جیش محمد ڈؤل ائے دھشت گرد
تنظیم آنر نی دی مالی مدد ملغیں ،ہماں کہ ھند آ چنتی ھلگر ائے زمہ وار آں۔پاکستان ائے بلیک لسٹ
آ اوار کھنغ ائے باز امیت اسا مگہ چین ،ملیشیا او ترکی ائے گُشغ چکا آنہی آر یک موقع داسی آ
شُزا ۔ایزا اے ٹؤک زکر ائے لائیق انت کہ ھچھ دی ملک آ بلیک لسٹ آ اوار بی اغ آژ بھچینغ آپا
آنہی آ ۳۹ باسک آنژ کم چہ کم سئے باسک آنی حمایت مِلغ ضروری ایں۔پاکستان آر اگر بلیک لسٹ
آ اوار کھُزی آ شُز تہ آں بین الاقوامی مالیاتی فنڈ،عالمی بینک ،یورپی یونین او دیگر مالی ادارہ آنژ
قرض گِت نہ کھنت۔دھشت گرد آنی مالیاتی واہریایئ کھنغ ائے نوٹس گِتؤ ایف اے ٹی ایف آ پاکستان
آ گرے لسٹ آ ۲۰۱۸ آ اوار کھُزغئے سا۔پاکستان آ وخت دئے اغ ائے مطلو ایں کہ عالمی براسی
آنہی آ وتی عمل آنر دُرست کھنغ ائے یک موقع دئے آغ آپا باڑہ ایں ۔آں لوٹھی کہ اسلام آباد دھشت
گردی ائے مالیاتی واہریائی او منی لانڈرنگ آ دارغ آپا فیصلہ کن کاروائی کھنت۔جہان ائے نیاہ
نی ہمیں ٹؤک چکا بی کہ ایف اے ٹی ایف ائے سخت ایں ھَکل دئے اغ آ پھدا پاکستان چھے گام زیری ۔اگر پاکستان ملک ائے ترقی لوٹھی تہ آنہی آ گرے لسٹ آژ درا درکھوغی بی او آنہی آپا
آنہی آر سخت ایں کاروائی کھنغی بی۔