سرگال: پاکستانئ سیاسین افق بہ قیاس آرائیان کنفیوژن و شکئ بازار۔

بہ پاکستانئ واکداری و مردمانی قیادت و پوجئ نیاما بستگئ رازئ کہ داریت گیشترکی کنفیوژن ماحول بہ قیاس آرائیا سَک انت، مگہ عمران خانی واکدارئ وھدہ دیگہ وڑا بہ چما کائیت۔ ای ھبرا مُچین زاننت کہ پوج و عمران خانی حکومتئ بستگی دوکینانی جوان انت و عامین تاثر بہ ایشی انت کہ بستگی جور بوتگیت و شاید اولی سرئ وزیر عمران خان بیت کہ وتی ہنچ سالا بود کرتگ کنت و ایش پہ ایشی انت کہ عمران خان و آی گلا پوج بہ واکا رسینتگیت و باز اھم ئن رولئ داشتگیت مگہ حالات انچین وڑئ بوتگیت کہ نہ تاناکا حکومت و پوجئ بستگئ سرا سوج بال آتگیت بلکہ پوج و عدالت و پوج و اپوزیشن ئن گلانی نیاما یک وڑئ معاملہ ھبر بہ دیما انت و ای وڑئ بیگ بہ پاکستانا گجام نوکین ھبرئ نہ انت و گیشترکی بہ پوج و اپوزیشن ئن گلانی نیاما پردگئ پھدا سازش و تفاھمئ کنگ گجام نوکین ھبرئ نہ انت۔ بہر حال بری گڈین روچان انچین ھبر بیت کہ بہ ریاستا مُچین ادارہ انی نیاما معاملہ ھبر انت۔ شہ ایشان یک ھبرئ ایش انت کہ نواز شریف پہ لنڈن روگا اجازت بہ دست آورتیت مگہ وھدہ کہ ای ھبر پہ راستی بوتیت دیگہ عمران خانی دلئ تھا کدرتین وڑئ ای حیال کائیت کہ یک راز نہ یک راز بہ پوج و عدالتئ نیاما بری بھرا گجام معاملہ بوتگیت، سیاسین حلقہ نہ بلکہ بہ عوامین کچانہ قیاس آرائی بیت کہ پہ عمران خانی حکومتا روچ کم منتگیت، بری بھرا قیاس آرائی بازار گرم انت و دیگہ مزنئن معاملہ بہ دیما آتگیت و ای معاملہ آرمئ چیف جنرال قمر باجوا کارئ وھدہ دیمرئی داتگ بوتگیت، آئ بہ گئوستگین ماہ بہ بیست و نہ تاریخا باید انت تقاوت کرتن یا پہ آی چُنت ماہ دیمترا سرئ وزیر عمران خان پہ ۳ سالئ دیگرا نوٹیفیکشنئ رادگ کرتیت، پہ ایشی سپریم کورٹ سوج بال آورتیت، بہ ایشی یک ٹکنیکلین آمگئ اتیت کہ ای ارڈر ہ مملکتئ سدرئ نیمگا باید انت کہ رادگ بوتن مگہ ای جارا سرئ وزیر داتیت۔ بیدئ ایشی یک دیگہ اھمین ھبرئ بوتگیت کہ سپریم کورٹ و وفاقین حکومتا رانشان دیوکی کرتگیت کہ آرمئ چیف کارین وختئ دیمرئی دیگئ معاملہ کانونئ ترمیم کرتہ و گجام ضابطہ برابیر کرتگ کنت۔ نون سپریم کورٹ شش ماہ ایگزیشن داتگیت نون ای معاملہ یک گرانین وڑئ بہ وت گپتگیت کہ ای کانون چی وڑا ترمیم بوتیت، بہ حکومت و اپوزیشنئ نیاما تعلئ کہ استیت شہ آی کچانہ جتگ بیت کہ پہ حکومتا شہ ایشی سَکیا در بیگ آسان نہ انت و یک راھئ ایش بوتگ کنت کہ گون معمولین اکثریتا پارلیمنٹ ای کارا کرتگ کنت، و دیگہ ایش کہ گون گیش شہ دو و نیم کوتا منگا بیت۔ بہ موجودین حالاتان وھدہ کہ اپوزیشن و حکومتئ بستگی اینکس خراب انت ای وڑا ممکن نہ انت و عدالتئ فیصلہ تہ انون شرّین تفصیل ئن وڑئ بہ دیما نیاتگیت۔ مطلب ایش انت کہ جنرال باجوا اگزیشنئ معاملہ گیرباورین وڑئ بوتگیت۔ شہ دیگہ نیمگئ حکومت ایشا زانت کہ اپوزیشنئ نیمہ داری و یا بیدئ آی نیمہ داریا آرمی یک ترمیمئ کرتگیت و دیگہ نیمگئ یک کمیتہ سہ باسکین جور بوتگیت کہ نہ تاناکا وتی نیمہ داریا بلکہ اپوزیشنئ نیمہ داریا ھم بہ دست آرگا بیت و ایش وت عمران خانی دلئ تھا تروسئ پرینتگیت کہ چی وڑا نواز شریف شہ عدالتا راحتی بہ دست آورت و بہ پوج و چیف جسٹس نیاما گجام چیرین معاملہ نتیجہ بوتگ کنت۔ نون احساس کنگا انت کہ ھمی وڑا اپوزیشن و پوجئ نیاما ھم گجام نزیکی استیت، سرئ ای مُچین ھبران پاکستانئ سیاسین حلقہ ایشا احساس کنگا انت کہ یک نیمگا اپوزیشن و حکومتئ نیاما دورئ کئیت و شہ دیگہ نیمگئ حکومت و پوجین تولگانی نیاما سکی ودی بیگا انت۔ عمرانی حکومت دیگہ گیش شہ ایشی منتگ نہ کنت بہر حال ھر نیمگئ قیاس آرائی دیستگ بیت و بہ پاکستانا ای اولی وار نہ انت کہ ای وڑا بیت۔