سرگال:حافظ سعید ائے ڈوہی ثابت بی اغ اصلیت یا چھڑوئی آ پھیدھارغ آپا؟

لاہور مزن ایں عدالت آ اقوام متحدہ ائے وٹاژ دھشت گرد منسی ایں جماعت الدعوی ائے سروک او ممبئی ھلگر آنی ماستر مائینڈ حافظ سعید آ دھشت گرد آنی مالیاتی واہریائی کھنغ ائے ڈوہی منسی آ شُزا۔ہمیں سال جولائی آ پنجاب پولیس ائے انسداد دھشت گردی محکمہ آ سعید او آنہی سنگت آنی حلاپ ۲۳ ایف آئی آر درج کھزغئے ساں ہمائی آ پھدا آنہی آر لاہور ائے کوٹ لکھپت جیل آ دیم داسی آ شزغئے سا۔پاکستان ائے انسداد دھشت گردی ائے عدالت آ سعید ائے حلاپ فرد جرم ثابت کھنغ آپا یازد دسمبر ائے تاریخ طئے کھزغئے سا۔نی سوال اے پیدا بی کہ فرد جرم نی پھرچھے طئے کھُزی آ شزا؟چھے عدالت نی سعید ائے حلاپ مقدمہ ائے سماعت سنجیدہ بیسؤ کھنت؟ہماں مچھیں مڑدم ہمیں سوال کھنغاں ہماں کہ زاناں کہ پاکستان ائے نظام تھانگا کار کھنت۔زکر ائے لائیق انت کہ پاکستان چکا فائینینشل ایکشن ٹاسک فورس ائے وٹاژ دھشت گرد آنی مالیاتی واہریائی کھنغ ائے حلاپ سَک زور اسا ۔نہ چھڑوئی آ ایف اے ٹی ایف بلکہ اقوام متحدہ ائے سلامتی کونسل ائے وٹاژدی پاکستان چکا باز زور اسا۔سلامتی کونسل ائے زور آ پھدا اسلام آباد آر سعید ائے بینک کھاتہ او آنہی جائیداد آنر ضبط کھنغی بیسا۔ہمیں کاروائی ائے باوجوت پاکستان ائے سرکار آ اقوام متحدہ ائے سلامتی کونسل آژ درخوات کھزغئے سا کہ آں حافظ سعید آر وتی لوغ ائے خرچہ آنی آپا بینک آژ زر کشغ ائے اجازت دا۔فائینینشل ایکشن ٹاسک فورس ائے زور ائے پھجی آ ھند دی لشکر طیبہ ائے سروک ائے حلاپ سخت کاروائی ائے مطالبہ کھنانا پھیزاغیں او دلیل دا کہ حافظ سعید مزہبی ادارہ آنی نام چکا فنڈ جوڑ کھزؤ آنہی آ ھند ائے حلاپ استعمال کھنت۔امریکہ آ دی ہمیں دھشت گرد ائے سغر چکا دھ ملین ڈالر ائے انعام ایر کھزا۔اکتوبر آ فائینینشل ایکشن ٹاسک فورس ائے بیٹھک اندر اے نیاہ آتکا کہ پاکستان آ دھشت گردی ائے مالی مدد او منی لانڈرنگ آ دارغ ائے حلاپ ھچھ مزن ایں کاروائی نہ کھزا ہمیں خاطرہ آنہی آ اسلام آباد آ ہَکل داسا کہ اگر آنہی آ فروری ۲۰۲۰ تکا دھشت گردی آپا فنڈنگ آ دارغ آپا سخت گام نہ زڑتھا تہ آنہی آر گرے لسٹ آ برقرار ایر کھزی آ برؤ۔ہمیں خاطرہ اینگا مان کھائے کہ لاہور ائے انسداد دھشت گردی عدالت ائے وٹاژ سعید ائے ڈوہی منغ ایف اے ٹی ایف ائے بلیک لسٹ آ اوار بی اغ آژ بھچغ آپا پاکستان ائے یک چال ایں۔اے ٹؤک دی دلچسپ ایں کہ سروزیر عمران خان ائے امریکہ دؤرہ آژ چھڑوئی آ یک ہپتغ سرا سعید آ ماخوز کھزی آ شزا ۔امریکہ ائے وٹاژ پاکستان ائے سرڈغار آژ پیدا بی اغ والا ایں دھشت گردی آ دارغ آپا اسلام آباد چکا باز زور ایں۔اشی پھجی آ نی ایں چند سال آنژ واشنگٹن ائے وٹاژ دھشت گردی ائے حلاپ سخت بیان داسی آ رؤغاں اے دی سعید ائے ماخوذ کھنغ ائے وجہ بیس بی۔