سرگال:میڈرڈ آف او گواس آ بدلاؤ چکا کانفرنس:ھند ائے عمل آنی وشادگی

اسپین ائے بنجہ میڈرڈ آ جہان ائے ۱۹۶ ملک آنی سروک اوماحولیاتی زانتکار ،عالمی مڑدُمیت آپا خطر بیسغیں ماحولیاتی ایں بدلاؤ ائے ردین اثر آنی مقابلہ کھنغ ائے طریقہ کارچکا ویچار کھنغاں۔کاپ ۲۵ ائے نام آژ ہمیں جہانی کانفرنس آگوگشتانگ کھزؤ اقوام متحدہ ائے سیکریتری جنرل انتونیو گوٹیرس آ بالکل راست گوشتا کہ مڑدم کے سال آنژڈغار ائے حلاپ مڑائی ائے حالت اندرا آں او ہمیں سیارچہ آ مڑدم آنی حلاپ مڑائی ائے بنگیج کھزؤ اشتا ۔عالمی حرارت ائے تباہ کھنوکین اثر مڑدم آنی آپا خطر بیسا ۔مارا جہانی ایں ماحولیاتی ایں بحران دیما ایں ۔او ہمیں عالمی بحران اینگے مقام تکا پُجھسا ہموزا آژ گڑدغ مشکل نعیں۔گوٹیرس ائے روگا ماحولیاتی ایں بحران سرا آژ گیش تباہ کھنوکین بیسا۔ہمائی سبب آژ مڑدم آنی دُرائی او وڑھد خطر آ مان ایں او ماحولیاتی ایں بدلاؤ ائے پھجی آ جُڑسی ایں گواس ائے گندگی سالانہ ۷۰ لکھ مڑدم آنی مِرغ ائے سبب بی غیں۔اقوام متحدہ ائے سیکریرتی جنرل آ ہمیں حالت آنر دیما کھنغ آپا ترقی کھُزغیں مزن ایں اقتصادی ملک آنی وٹاژکاربن ڈائی اکسائیڈ ائے درا کھنغ چکا پابندی جھنغ آپا ناکاقی گام گیج آنی چکا ہَکل دی داسا۔آنہی آ نام گرغ آ بغیر صاف ایں وڑا ہماں ملک آنر مخاطب کھُزا ہماں کہ مچھین جہان آ گرم گیس آنی بازی آ درا کھنغ ائے زمہ وار آں۔دُکھ ائے ٹؤک اش انت کہ ماحولیاتی ایں نقصان دہ مواد ائے درا کھنغ ائے سبب بی اغ والا ملک آنی وٹاژ نی ایں سال آ وتی پاسداری آپا چھڑوئی آ کمزور اشارہ دیما آتکغاں،ہمیں بارو آ امریکہ ائے مثال ہر کھسے ائے دیما ایں۔امریکہ ائے صدر ڈونلڈ آ جار جھزا کہ امریکہ جزوخیں سال ائے آسر بی اغ تکا ماحولیات ائے بارو آ پیرس منغ نامہ آژ جتا بی رؤ۔دوہمی وٹا ھند آپا اطمینان ائے ٹؤک اش انت کہ آنہی آ ماحولیاتی بدلاؤ چکا قابو کھنغ آپا جہان آگو ہماں کہ وعدہ کھُزا ۔آنہی آ پھیلو کھنغ آپا بروبر اگا بیسا۔آنہی نتیجہ اش انت کہ ماحولیاتی ایں بدلاؤ ائے کارکردگی ائے انڈیکس آ سری ایں دھکا ھند شَر ایں کارکردگی والا دھ ملک آنی لسٹ آ اوار بیسا۔ہمیں لسٹ آ ھند گوستی ایں سال یازدمی نمبر چکا سا مگہ شے دھکی آں نوہ می نمبر چکا پُجھسا ۔امریکہ ہمیں بارو آ سجوں آ ردین کارکردگی والا ملک آنی اندرا ایں ،شر ایں کارکردگی آپا سویڈن چھیارمی او ڈنمارک پنچمی نمبر چکا ایں۔درگتہ کہ اولی ایں سئے نمبر ھور آں ۔آنہی پھیغام اش انت کہ جہان تنک مقرر نشانہ آژ باز پھدا ایں۔چین آ دی گوستی ایں دھ سال آنی مقابلہ وتی نمبر وشتر کھُزا۔اشی آژ اے ٹؤک صاف بیسا کہ امریکہ ائے وڑ ائے چند اینگے ملک آنر السؤ جہان ائے مچھین ملک ماحولیاتی ایں بدلاؤ ائے ردین اثر آنی بارو آ پِکر کھنغاں او آنہی مقابلہ کھنغ آپا وتی ڈول چکا ھِچھ نہ ھِچھ کوشست کھنغاں۔ھند ہمیں ٹؤک آپا دی اطمینان کھُز کھنت کہ ماحولیاتی ایں بدلاؤ آ دیما کھنغ آپا آنہی گام گیج آنی جہانی ایں سطح چکا وشادگی کھُزی آ شُزا۔