سرگال:امریکہ۔طالبان امن گپتران آپا گُمان

یک وار پدوارغ اے حبر ایں کہ دوحہ آ امریکہ او طالبان نمائیندگ آنی نیمگا امن گپتران ائے سلسلہ گوستی ایں ہپتغ بِنا بیسا۔ہموزا تکا افغانستان آ امن ائے قیام ائے ٹؤک انت تہ کھئے انت کہ نہ لوٹھنت کہ ہمیں مڑائی آژ تباہ ملک آ پھائیدار امن قائیم بیت۔پھرچھے کہ نزیخ چھِل سال آنژ ہموزا ائے عوام امن منتظر ایں ۔دراژ عرصہ تکا آنہاں چھڑوئی آ مِرغ ائے چھاپ،مڑائی،حونریزی او کوڑہ گواری ائے دپ آنژ سوا ھچھ نہ دیستا۔نوہ یازد ائے دھشت گرد ھلگر آ پھدا ہموزا امریکہ ائے سروکی آ دھشت گردی ائے حلاپ مڑائی بنا بیسغئے سا۔القائیدہ ائے حلاپ مڑائی تہ بیسا مگہ آنہی آ اوٹ دئے اغ والا طالبانی کاردار دی آسر بیسا۔چھی اے وخت پھدا ہموزا آئینی سرکار ائے سلسلہ دی بنا بیسا مگہ افگانستان آ امن لوٹھوک شہری آنر اطمینان نصیو نہ ویسا۔چند سال سرا امریکہ ائے سروکی والا پؤجی آنی مزن ایں تعداد افغانستان آژ گڑتھؤ شزا مگہ آنہی آ پھدا افگانستان آ تشدد او طالبان ائے ھلگر آنی نوخیں دؤر بنا بیسا ۔ہر روش مڑدم آنی ٹُکر گواس آ اینگو آنگو نیاہ کھایاں آنہی اندرا امریکہ ائے پؤجی دی نشانہ بی آں۔او افگانستان ائے سیکیورتی فورس ،پولیس او سرکاری ملازم آنر دی نشانہ کھزی آ رؤ ہمائی اندرا چھُکھ او زائیف دی اوار آں۔طالبان آگو ہر ناجوڑی ائے یک ہی درمان اسا،تشدد ،تخریب کاری او مڑدم آنی زند گرغ۔آں نہ تہ افغانستان ائے نی ایں آئین آر مناں او نہ ہی سرکار آر۔آں افغانستان ائے نمائیندگ آنگو صلاح آپا تیار نیاں مگہ امریکہ آگو گپتران کھنغ آپا ھچھ رکاوٹ نیا۔مگہ باز کوشست آنی پھدا امریکہ ائے ٹرمپ سرکار آ طالبان آگو گپتران کھنغ ائے ٹؤک منسا او یک افغانستان ائے نژاد امریکی سپارتکارآ طالبان آگو گپتران کھنغ ائے زمہ واری داسی آ شزا۔گپتران بنا بیسا مگہ منغ نامہ ائے نزیخ پُجھسؤ اچانکی آ صدر ٹرمپ آ گپتران ائے مچھیں عمل آ ماتل کھُزاپھرچھے کہ طالبان تشدد ائے دگ آ الغ آپا باڑہ ہی نیاں ،او نی اے حبر ملسا کہ پدوارغ گپتران بنا بیسا۔ہمیں بارو آ صدر ٹرمپ او آنہی سرکار چھیختر پُر امیت ایں اے تہ گُشغ نویس بی۔مگہ طالبان آنر شَر ایں وڑا پوہ بی اغ والا دھُر آنر چھی اے خاص امیت نعیں کہ طالبان تشدد ائے دگ آ اِلاں۔وا امریکہ اندرا کھمیں مڑدم آنر ہمیں امیت ایں کہ افگانستان آ ہماں وخت تکا امن قائیم بیس بی ہماں وخت تکا کہ پاکستان،طالبان ائے واہریائی کھنغ بند نہ کھنت۔نی چند روش پیشا امریکی سینیت ائے یک ممتاز باسک لنڈسے گراہم آ اے ویچار پدھر کھُزا کہ افغانستان اندرا امن ہماں صورت آ قائیم بیس بی ہماں وخت پاکستان وتی بستگی طالبان آگو آسر نہ کھنت۔یعنی پاکستان اندرا طالبان ائے ہماں کہ جھوک آں آنہانر تباہ کھنت۔آنہی آ صاف لپظ آنی اندرا گوشتا کہ اگر پاکستان لوٹھی کہ چند ہپتغ آنی اندرا افغانستان آ امن قائیم بیس بی۔بس چھڑوئی آ پاکستان آر اے کھنغی بی کہ آں طالبان ائے مدد کھنغ بند کھنت۔پدھر ایں کہ چھڑوئی آ واجہ لنڈسے ہی ہمیں ویچار آنر نہ منی بلکہ ہڑ دوکین امریکی سیاسی پارٹی آنی چنتی باسک آنہی ویچار آنی گون آں۔آنہاں نی صلاح اش انت کہ امریکہ آ طالبان ائے بجائے پاکستان آگو ٹؤک کھنت کہ آں طالبان آگو بستگی آسر کھنت۔اگر اینگا بیسا تہ باور آگو افغانستان آ امن قائیم بی۔