سرگال:پاکستان آ یک پیسر ائے پؤجی آمر آر پھاہو ائے سزا

پاکستان آ ۷۲ سال آنی تاریخ آ اے سری ایں دپ ایں کہ ھچھ پؤجی آمر آر یک خاصیں عدالت ائے وٹاژ پاکستان ائے آئین آگو غداری کھنغ ائے ڈوہ آ پھاہو ائے سزا اش کھنائینتھی آ شزا۔چوش کہ پاکستان آ چنتی وار پؤجی بغاوت بیسغاں او پؤجی جنرل آں ہموزا ائے آئین ائے حلاپ بیسؤ ہموزا آئینی وڑا گو قائیم بی اغ والا ایں سرکار آر بھورینتھؤ ہموزا سروکی چکا قوضہ کھُزااو دراژ مدت تکا عوام آر جمہوریت آژ محروم ایر کھزیش۔جنرل مشرف آخیری ایں پؤجی دکٹیتر اسا ہمائی آ ۱۹۹۹ آ ہماں وخت ائے گچین بیسغیں سروزیر نواز شریف آ سروکی آژ ہٹائینتھا۔چھڑوئی آ ہمیختر ہی نہ آنہی چکا دھشت گردی او دیگر ڈوہ آنی آپا ڈوہی منسؤ جیل آ دی ماکھزی آ شزغئے سا۔آنہی آ رندا آنہی آر سیاست او پاکستان آژ دیر ایر کھنغ آپا کُنبہ ائے پھجی آ وطن آژ درا کشتی آ شزا۔بہر حال جنرل مشرف ائے جمہوری سرکار قائیم بی اغ آژ رندا آنہی ائے صدر ائے وڑا مواخزہ بی غی اسا مگہ آنہی آ وتی استعفی خط داسا۔آنہی زوال آ پھدا ۲۰۰۸ آژ پاکستان آ ھچھ پؤجی بغاوت تہ نویسا مگہ پؤج ائے بالا دستی او زور جزغیں،جنرل مشرف آژ پیشا دی سئے پؤجی جنرل سروکی چکا قوضہ کھزؤ نشتغاں او پاکستان ائے سی سال آنژ دی گیش وخت پؤجی حکمرانی بُنا رہسا۔پؤجی عدالت خاصیں بھیرائ مزن ایں عدالت آ سرا آژ پؤجی آنی غیر آئینی عمل آنژ چھم چھرینتھغاں ہمائی وجہ آژ پاکستان ائے عدالت سرا آژ گُمان آنی اندرا بی او آنہی چکا ڈوہ ایں کہ آں پؤج ائے واہریائی کھنت۔ہماں وخت اے محسوس کھزی آ شزا کہ پؤج او پیسر ائے سروزیر نواز شریف ائے آپسی ایں ناوشی آ پؤج آ عدالت ائے گون بیسا ۔بہر حال خاصیں عدالت ائے سجلا ایں فیصلہ آ ماحول آ بدل کھُزا او ہر وٹا گُمان پدھر کھزی آ رؤغاں ۔ہمیں فیصلہ ائے جتا دھُر آنی وٹاژ وڑ وڑ ائے رد عمل دیما پھیزاغیں۔ہموزا یک وٹا پؤج آ ہمیں فیصلہ چکا گوشتا کہ ہماں مڑدم آ ہمیختر مزن ایں مدت تکا یک پؤجی ائے بھیرا ملک ائے ھزمت کھزا او صدر ائے حیثیت آگو سروکی دی کھزئی ،آں غدار تہ نویس بی،اے دی گوشتی آ شزا کہ ہمیں وڑ ائے سزا پؤج آنی حوصلہ کھمیں کھنغ ائے وجہ بیس بی۔ہمیں وڑ ائے بحث آ یک ٹک آژ چھم چھریتھی آ شزا کہ ھچھ پؤجی جنرل ہماں کہ یک سرکاری ملازم بی آنہی دست آ ھچھ وڑ ائے گچین بیسغیں او عوام ائے گچین کھزغیں سروزیر آ ہماں کہ زلت او ظلم دیما کھنغی بی،آنہی بارو آ چھے گوشتی آ برؤ؟فیصلہ چکا ھچھ گوشغ وخت آژ پیشا بی کہ خاصیں عدالت ائے نی ایں فیصلہ آ پھدا چھے بی او چھیختر مزن ایں بدلاؤ گندگ آ کھائے مگہ اے ضرور اٹکل بیسا کہ پؤج آ آنہی حلاپ تیش گیش بیسا ۔