سرگال:عمران خان ائے مشکل،ہنگامی بیٹھک طلب

یک سویلین خاصیں عدالت ائے وٹاژ پیسر ائے پؤجی دکتیتر جنرل پرویز مشرف آ پھاہو ائے سزا اش کھنائینغ آ پھدا اینگا مان کھائے کہ پاکستان ائے سروزیر عمران خان ائے مشکل گیش بیسغاں ۔پھرچھے کہ آنہی آ اپوزیشن لیڈر ائے وڑا جنرل مشرف ائے حلاپ غداری ائے مقدمہ جُزینغ او سزا دیائینغ ائے باز حمایت کھُزغئے سا،او ہمیں مسلہ آ ھچھ دی منغ نامہ ائے حق آ نیا۔مگہ سجلاایں حالت آں آنہی آر مشکل آ ماکھُزا پھرچھے کہ آں بہر حال پؤج ائے منوخ ایں او پؤج ائے آنہی چکا احسان دی باز آں۔عامین ویچار اش انت کہ آنہی سروزیر ائے کھُرسی پؤج ائے کوشست آنی وجہ آژ ایں اے وخت آنہی پریشانی گیش بیسا ہماں وخت کہ مشرف ائے حلاپ عدالت ائے وٹاژ فیصلہ اش کھنائینغ آ پھدا پؤجی ترجمان ائے وٹاژ اے بیان دیما آتکا کہ آنہی آر مشرف ائے حلاپ فیصلہ چکا باز دُکھ ایں او تیش دی۔پؤجی نمائینگ آ یک وڑا گو عدالت ائے فیصلہ آر ہی مسترد کھزا۔ہماں وخت آنہی آ اے گوشتا کہ جنرل ائے بھیرائ مزن ایں عرصہ تکا ھزمت دئے اغ والا پاکستانی سپاہی غدار نویس بی۔پؤج ائے وٹاژ ہمیں رد عمل دیما آتکا تہ عمران خان ائے پریشانی گیش بیسا۔سجوں آنژ گیش پکر ائے ٹؤک آنہی آپا اش انت کہ آنہی آ ہر حالت آ پؤج ائے ویچار آنی حمایت کھنغی بی۔آنگا تہ ہمیں ٹؤک ائے اشارہ پؤج او سرکار آ سرا آژ ملسغاں کہ جنرل مشرف آر سزا بی ۔ہمیں خاطرہ پؤجی استیبلشمنت اوسرکار ملسؤ اے کوشست کھنغئے سا کہ خاصیں عدالت تنک وتی فیصلہ نہ دا ہمیں خاطرہ آنہاں اسلام آباد مزن ایں عدالت آژ پھول دی کھُزغئے سا مگہ ٹؤک نہ ٹھعیسا او عدالت ائے فیصلہ آتکؤ شزا۔یک دلچسپ ٹؤک اے دی گندغ آ آتکا کہ جنرل مشرف آ سزا ہمیں خاطرہ نہ ملسا کہ آنہی آ ۱۹۹۹ آ سویلین سرکار آ بھورینغ ائے غیر آئینی کار کھزغئے سا بلکہ ہمیں ٹؤک آپا مقدمہ جزینتھی آ شزغئے سا کہ آنہی آ ۲۰۰۷ آ ایمرجنسی لاگو کھزغئے سا ہماں وخت آنہی آ دو عہدہ آنی چکا وضہار قائیم ایر کھزغئے سا۔آں صدر دی اسا او چیف آف آرمی اسٹاف دی۔نی گندغی اش انت کہ سروزیر عمران خان ہماں کہ جنرل مشرف ائے حلاپ غداری ائے مقدمہ جزینغ ائے باز حامی او قاضی اسا،آں چھے گام زیری او گڈا اے دی گندغی ایں کہ دُکھی او ناوش پاکستانی پؤج وتی تیش آ تھانگا پدھر کھنت،تنک ہمیں گشغ بیس بی کہ اے ڈرامہ چھے سین پھیدھاری پردہ کھڑو بی اغ ائے منتظر ایں نیاہ!