سرگال:مان پاکستان آ دھشت گردی آمریت او عدالت

پاکستان ائے یک قانون ائے زانتکار او دانش ور آ چند روش سرا یک ٹؤک گوشتا کہ مزہب ائے نام چکا مڑائی کھنغ دی یک وڑ ائے دھشت گردی ایں۔قانون ائے ہمیں زانتکار پاکستان ائے مزن ایں عدالت ائے مزن ایں قاضی واجہ آصف سعید ایں ہماں کہ سجلا ایں روش آں اسلام آباد آ پاکستان ائے فیڈرل جوڈیشیل اکیڈمی ائے یک جلسہ آگو گشتانگ کھنغئے سا۔اے جلسہ پیسر ائے فاٹا او پاٹا آ عدالتی نظام چکا مڑائی ائے اثر آنی زانتاکاری آپا منعقد کھزی آ شزغئے سا۔مزن ایں قاضی آ اے دی گوشتا کہ دھشت گردی او مڑائی ائے عزاب آ آسر کھنغ آپا ضروری ایں کہ کے ائ ٹک آنی حکمت عملی اپنائینتھی آ برؤ۔آنہی آ جہان ائے جتا ملک آنی اندرا دھشت گردی ائے عمل آنی یک مچھیں تاریخ آ ہمیں جلسہ اندرا بیان کھُزا او گوشتئ کہ مڑائی،دھشت گردی ائے دوہمی دیم ایں ہماں کہ مزہبی تشدد او سیاست آپا جہان ائے جتا بہر آنی اندرا قدیم زمانہ آژ جزغیں او عامین مڑدم آنر وتی شکار کھنغیں پاکستان ائے مزن ایں عدالت آ وتی گشتانگ آ ہماں دی چھی اے گوشتا آنہی آ وا پاکستان ائے پؤجی یا غیر پؤجی سرکار آنی پالیسی آنی تناظر آ دیما ایر کھزی آ برؤ تہ یک عجیو ایں او تکلیف دؤخ دیم دیما کھائے۔مزن ایں قاضی آصف سعید ائے پاکستان آ ہی کھدیں نظام مصطفی ائے نام چکا مزہبی ناوشی آ گواس داسؤ ہماں وخت ائے سوویت یونین ائے حلاپ افغانستان آ مزہبی مڑائی ائے مدد ائے اوٹ آ طالبان پیدا کھزغاں او اوسامہ بن لادن ڈؤل ائے حونی دھشت گرد پیدا بیسا۔ کھدیں ھند آژ بنگلہ دیش ائے قیام ائے بدلہ گرغ آپا،آنہی آ ٹھپی کھنغ ائے شیطانی فلسفہ چکا جُزغ ائے ھدایت کھُزی آ شزا ۔کھدیں کشمیر آ مزہب ائے نام چکا نیم پختہ ورنا آنر ورغلائینتھؤ مڑائی آپا آمادہ کھزی آ شزا ۔آنہانژ قلم او کتاو گتؤ توپق داسی آ شزا۔کشمیر آ ھند آژ جتا کھنغ ائے ارادہ آژ دھشت گرد تنظیم کھڑو کھزی آ شزغاں۔ھند آ ھندے ھندے آ بم آنگو یُرش کھنائینتھی آ شزا۔مفاد پرست پؤجی اپسر او جرنل آں پاکستان آ القائیدہ ،لشکر طیبہ ،لشکر عمر،سپاہ صحابہ ،جہش العدل،البدر،مجاہدین،حرکت المجاہدین او طالبان ائے وڑ ائے دھشت گرد تنظیم آنی آپا محفوظ جھوک ٹھائینتھی ہمائی ردین نتیجہ وا پاکستان آ دیما کھنغی بسغاں او مروشی تکا دی دیما کھنغیں ۔