سرگال: پاکستانئ عدلیہ شہ حکومت و پوج نیمگا تنقید

خیرئ پسوئ: گیش شہ دو دھہ دیمئ ھبر انت بہ ۱۹۹۰ سالا وھدہ کہ جنرال پرویز مشرف، نواز شریف آ شہ تخت آ یک نیمگا کرت و واکا گپتیت و وھدہ کہ سیاسین گل یکجا بوتہ و پہ جمھوریتئ بحال کنگا یک نوکین تحریکئ جور کنگا بوتہ و بہ آ وھدہ یک باز مزنئن نامدارین سیاست زانتئ پاکستانین، نصراللہ خان گشتیت کہ جنرال پرویز مشرف بہ پاکستانا گڈین پوجین ڈیکٹیٹر ثابت بوتگیت و دیما غاصبین پوجین جنرال بہ پاچین عدالتا مقدمہ بہ آوانی حلاپا رادگ بیت۔ کم شہ کم خدابیامرز نصراللہ خانی ھبر راست ثابت بوت۔ جنرال پرویز مشرف بہ یک سیویل عدالتئ بہ غددارئ مقدمہ سرئ استیت و سزا ھم داتگ بوتگیت گرچہ ای سزا بہ پوجین غاصبین گرگ و پوجین بغاوتئ پسوئ گپتگ نہ بوتیت۔ مگہ بہ ۲۰۰۷ ایمرجنسئ نافذ کنگ و کانونئ معطل کنگئ وجا بوتگیت۔ بہر حال سزا داتگ بوت و شہ پاکستانئ عدالتئ نیمگا ای وڑا اولی وار اتیت کہ کجام غاصب و ڈیکٹیٹر سزا د یگا بوتنت وگرنہ دیم شہ ایشی شہ پوجین جنرالانی دستا مردمین واکداری یک نیمگا بوتنت و خوار و زار شہ مُلکا جلاوطن وحتئ بہ دارا رستگنت۔ یک دیگہ مثالئ کہ پاکستانئ عدالت ھر وھدہ برئ بھرا کرار مانیت و ای اولی مثال نہ انت کہ شہ وتی گئوستگین ریکارڈا انحراف کرتہ و ای وڑئ فیصلہ گپتگیت۔ بہ ایشی پوجئ رد عمل کہ درا کرتیت آ ھم زانتگ بوتیت۔ درا انت کہ پوجین تولگ پاکستانئ عدلیہ ای وڑئ فیصلہ گرگا کرار نہ ماننت پہ امیشا ای چراگئ روک بیگ یک فطرین ھبرئ بوتیت۔ مگہ عمران خانی حکومت جنرال پرویز مشرفئ حلاپا پہ سزا دیگئ آزردہ خاطر بوتیت ای امیت شہ آی نہ بوتیت پہ چہ کہ وت عمران خان دیم شہ حکومت کنگا بہ جنرل پرویز مشرف حلاپا مقدمہ دیما برگا سَکین نیمہ دارئ اتیت و ای مواقفا داشتیت کہ بری معاملہ نہ باید تفاھمئ بیت، مگہ باز حیرانئ وڑئ ھبرئ انت وھدہ کہ آی کابینہ چُنتی وزیر عدالتا بدنام کنگا تکان داتیت۔ سائنس و ٹیکنالوجئ وزیر فواد چودھرئ عدالتئ فیصلہ غلط زانت چُنت روچ دیمترا کانونئ وزیر فروغ نسیم تہ ای جاگہ گشتیت کہ ای فیصلہ کہ قاضی گپتگیت مجگی خراب انت، ایش لایق نہ بوتہ کہ وتی عدالتین زمواریانا ساتیت، شہ آی باید انت ای کار گپتگ بیت۔ ای فیصلہ کہ سیاست زانت و کابینہ وزیر کننت دیم شہ بہ واک آیگا (نوکین پاکستان) کوکارانا داتنت و شفاف ایمانداری و انساپ پسندیئ ھبرانا داتنت بہ اصلا عمران خان بہ وتی صدارتئ دورانا یکئ نہ بہ چُنتی معاملہ آن یوترن گپتگیت و بری معاملہ ھم ھمی وڑا یوترن گپتگیت۔

پہ امیشا دیگہ بازین حیرانئ وڑئ ھبرئ نہ انت مگہ شہ وتی سیاسین کرداران آوان بہ مُچانی دیما پردگ بال آورتنت و ای وت ایشی گواہ انت کہ آی الکٹد یعنی استمانئ گیچئن بوتگین سرئ وزیر نہ انت رازئ کہ پوج آی را بہ واکا آورتگیت و رازئ کہ اپوزیشنئ گلانی لیڈر بہ آی باروا شنت و نون آوان زاننت کہ فیصلہ کہ گپتگ بیت آی حکومتئ فیصلہ نہ انت، ای پاک و ساپ درا انت کہ آی شہ پوجئ صلاح و شوران ایچ بردیم گردینتگ نہ کنت۔

نون عدلیہ و خاسین وڑئ ریتایرین قاضی چیف جسٹس عاصف سعید کوسہ حلاپا یک باقاعدہ ئن مھمئ دیما روت و ایشی وج ایش انت کہ نہ تاناکا جنرال پرویز مشرف بہ خاسین عدالتا آی را سزا دیگا بوت بلکہ چنت روچ دیما شہ ایشی بہ موجودین چیف آرمی جنرال قمر باجوا کہ پہ شش ماہ اکسٹنشن اجازتا داتہ و گشتگیت کہ بری وھدہ حکومت آرمئ چیف اکسٹنشن باروا بہ پارلیمنٹا کجام کانونئ را پاس کنگا بنت۔ ای فیصلہ پاکستانئ پوجا پازاب کرتگیت پہ چہ کہ پوج وتی دلئ وڑئ فیصلہ لوٹتیت۔ نانگمانا پوج و عمران خانی حکومت ویلنئ جور بوتیت و ایش افسوسئ وڑئ ھبرئ انت کہ نہ تاناکا بہ چیف جسٹس حلاپا بلکہ بہ عدلیہ حلاپا مھمئ دیما برگا انت و منفین وڑئ اثر کئلیت و نون بہ پاکستانا عدلیہ عزما و پوجئ نیاما ٹکرئ وڑئ حالئ استیت۔