سرگال: بہ اوگانستان الیکشن باروا گیرباورین حال

بہ اوگانستان سدارتین الیکشن کم شہ کم سہ ما دیما بوتیت و باز چُنتی وار پھدا کپت و ھر وارئ پہ یک بونہ پھدا کپتیت، گڈسرا بہ ستمبرئ ۲۸ تاریخا گیچئن کاری بوت۔ بری بھرا یک دیگہ ھبرئ ھم استیت کہ بہ جمھوریت و گیچئن کارئ بھرا کجام شرین علامتئ نہ انت، شہ ووٹ دیوکان باز کمین کچانہ شہ وتی حکا کار گرگا بوتنت، گرچہ اوگانستان ووٹرانی راجسٹر ۹۰ لکھ گیش بوتگیت کہ شہ ۲۰ لکھ کمتر ووٹ دیوک کوت گپتگنت۔ 

بہر حال نونین حالات کہ گیچئن کاری شہ آی گئوزیت، شہ ایشی گیشتر سوبین بوتگ نہ کنت، رازئ کہ امیت شوت طالب و دیگہ دھشت گرد و خرابکارین ڈلانی موشکولی نہ تاناکا رادگ اتنت بلکہ تروند ھم بوتنت۔ طالبانی سروک گام بہ گام بہ حکومتئ ھر کارئ بھرا رکاوٹ پرینگا اتنت و سرئ ایشی کہ بہ آمریکہ و طالبانی نمایندگانی نیاما گپ و تران رادگ اتیت طالب نہ تاناکا وتی ھلگرانا بند نہ کرتنت بلکہ گیچئن کارئ ریلی آن و نمایندگانا ھم نشان گرگا بوتنت و یک سدارتین کاندیدی جانئ گرگئ ھلگرئ کرتنت مگہ رکتیت وسَک ٹپی بوتت۔ بہر حال ای حالات و ماحول گیچئن کارئ عملا و کامل بیگی مزنئن ھبرئ انتآی اول سرئ نتیجہ بہ گئوستگین ھپتگا بہ یکشنبہ روچا جار جتگ بوتیت، شہ ای نتیجہ ای درا بوت کہ موجودین جمھورین سدر وتی نزیکین حریف ڈاکٹر عبداللہ عبداللہ پھدا اشت و دیما شوت۔ شہ رپوٹئ دیما اشرف غنی ۵۰ اعشاریہ ۶۴ فیسد ووٹ بہ دست آورتگیت وھدہ کہ ڈاکٹر عبداللہ عبداللہ ۳۲ اعشاریہ ۵۲ فیسد ووٹ برتگیت۔ شہ سرئ نتیجہ اشرف غنی وشنودی درا کنگا بوتہ و امیت درا کرتگیت کہ پورہ ئن اوگانستان و عوامئ سوب انت مگہ حریفی عبداللہ عبداللہ ای وڑا یقین نداشت، آی بہ الیکشن نیت سرا شک درا کرتگیت و گشتگیت کہ گون جعل کاریا دست داشتگیت۔ آی بہ صوبہ آن پہ دوارگین حساب کنگئ لوٹوک بوتگیت۔ 

یعنی ایش کہ تہ انگت قطعین وڑئ چیزئ گشتگ نہ کننت، شہ بدکسمتی آ ۲۰۱۴ گیچئن کاریا رندا ھم جیڑوین حالتی ودی بوتتیت و آمریکہ میانجینا وتی کوشستان پہ رکینگئ رادگ کرتیت۔ گئوستگین وارا ھم ڈاکٹر غنی و عبداللہ یکئ آ دیگرئ حریف اتنت و گون آمریکہ دست مان دیگا دوکین واکا کوت دار بوتنت۔ ڈاکٹر اشرف غنی سدر و ڈاکٹر عبداللہ چیف ایکزیکٹو بوتیت۔ بہر حال قطعین نتیجہ ھر چیزئ کہ بیت مگہ گیرباورین حالت ھر چی زودتر باید انت کہ ختم بیت ای وڑا پہ اوگانستان گیتیر انت۔ آمریکہ و ھندوستان دوکین ایشی سرا سَک بوتگنت کہ پاک و ساپین وڑئ شکایتانی دور کنگا بنت تا کہ پہ تعلیان جائ مہ مانیت و ھر کجام کہ بہ واکا رستیت آی ذمواری انت کہ جمھوریتا پرواک بیت و بہ مُلکا نظم و ترتیبئ آرگا یک کمیٹہ جور کنت کہ اوگانستانئ کانونین ادینک بیت۔ جمھوریتئ دیمرئی دیگئ مزنئن وسیلہ ایش بوتگ کنت کہ جمھوریت لوٹوک و عوام حلقہ آن کوت استمانئ ھب و ارمانانا زاننت و شرّین وڑئ نمایندگی کننت شہ آوان و اگہ ھمی وڑا گیرباورین حالات دوام کنت ای وت پہ جمھوریتا یک تکانئ انت۔ تہ جائ کہ بہ اوگانستانا بہ طالبانی رول ھبرئ انت، اوگانستانئ مھلوک و ھیچ جمھوریت پسندی امن و امانئ برجا بیگئ امیتا شہ آوان کرتگ نہ کننت و بہ وت واکی اوگانستانا تاناکا مھلوکانی نمایندگ بہ حکومتا شرّین و مثبتین رول داشتگ تواننت، پہ امیشا جمھوریت باید انت کہ مستحکم بیت۔ درا انت کہ بہ اوگانستانا نون دلئ وڑئ جمھوریتئ امیت کرتگ نہ کننت شہ گئوستگین دو دھہ کہ بہ اوگانستانا جمھوریت و جمھورین کانون بہ حال انت طالب ایشا دیستگ نہ کننت۔ خاسین وڑئ بہ اوگانستانا بانوک بہ نوکین زمانگا و نوکین تعلیما گون پکتگین ذھنئ دیما روگا انت و بہ اوگانئ سماجا نوکین رولئ ادا کنگا انت و نوکین راھانی پٹ و پول کنگا انت۔ درائن وڑئ شہ ای کسانی کارا معلوم بیت مگہ باندا ھم ھمی حلقہ باز پرواک بوتگ کننت پہ شرطئ کہ جمھوریت پسندین حلقہ گون تپاک کسانین اختلاپانا یک نیمگا بئلنت و بہ جمھوریتئ نیمگا گام زورنت۔