سرگال:ایغور مسلمان آنی بارو آ اصلیت لیک بی اغ آ پھدا چین ائے وٹاژ ریکارڈ تباہ کھنغ ائے کوشست

گوستی ایں ماہ نیویارک ٹائیمز آ مسلمان آنی چکا بی اغ والا ظلم او مڑدمی حق آنی پامالی چکا یک تفصیل ائے رپورٹ چھاپسی آ شزغئے سا ہمائی آ کاگدی ثبوت آنی حوالہ آژ اے گوشتی آ شزغئے سا کہ چین ائے سوبہ شی جیانگ آ ہموزا ایغور مسلمان مزن ایں آبادی ایں او ہموزا آنہاں نی چکا بی اغ والا ایں ظلم ائے سلسلہ مزن ایں عرصہ آژ جزغیں ہموزا ائے اصلیت آنر لکینغ آپا اعلی چینی حاکم آں چھی اے اینگے ھدایت مقامی کاردار آں داسغئے ساں کہ ہمائی آژ اٹکل بیسغئے سا کہ اصلیت آنر لکینغ ائے مچھیں کوشست کھُزی آ رؤغیں۔اصل آ صوبہ شی جیانگ آ ایغور مسلمان آنی حلاپ یک مزن ایں عرصہ آژ سخت ایں گام زڑتھی آ رؤغاں۔سجلاں ایں ماہ آنی اندرا مچھیں جہان ائے میڈیا اندرا ہمیں ٹؤک ائے چرچہ رہسا کہ چین ائے سرکار آ دھ لکھ آژ گیش ایغور او دیگر نسل آنی مسلمان آنر دستگیر کھزؤ ایر کھُزا۔آنہی چکا مزن ایں پھیمانہ چکا احتجاج دی بیسااو اقوام متحدہ آ دی مڑدمی حق آنی پامالی ائے سخت ایں نوٹس گتا او آنہی بدگوشی کھُزیئ۔چین ائے وٹاژسرا آژ اصلیت آنذ چھم چھرینغ ائے کوشست بیسا مگہ گوستی ایں ماہ چھی اے اینگے ثبوت دیما آتکغاں ہمائی آژ چھم چھرینح چین ائے حاکم آنی آپا آسان نوی،نیویارک ٹائیمز ائے رپورٹ آ اے اصلیت ڈسسی آ شزا کہ کہ ہانگ کانگ آ صوبہ ژیانگ آ تعلیم گرغ والا شاگرد آں وتی وطن روغ ائے پرگرام ٹھائینتھا او تِکت بُک کھُزیش۔آنہی چکا چین آ پکر لاحق بیسا کہ ہمیں صورت آ تہ ہمیں اصلیت آ لکینغ مشکل بی رؤ کہ ہمیختر مزن ایں تعداد آ ایغور مسلمان آنر ڈٹنشن سینتر آ ایر کھُزی آ شزا۔ہمیں خاطرہ اعلی ایں چینی اپسر آں اے ہدایت داسا کہ شی جیانگ گڑدغ والا شاگرد ہماں وخت اے زانغ لوٹھاں کہ آنہاں نی کنبہ ائے مڑدم او ہمسائیگ اچانکی آگو تھانگو شزغاں تہ آنہانر اے ڈسسی آ برؤ کہ آں بالکل محفوظ آں او آنہانر تربیت اسکول آ تربیت آپا دیم داسی آ شزا۔آں حیر آگو آں او آں ھچھ ڈوہی نیاں ہمیں خاطرہ ہمیں شاگرد آنر گھبرائینغ ائے ضرورت نعیں ۔مگہ اے ٹؤک ہماں وخت لیک بیسا او آنہی راست ایں ثبوت دیماں آتکا تہ چین ائے حاکم پریشان بیسغاں ،آنہاں نی آپس آ کے ای بیٹھک بیسغاں او ہماں دمغ ائے کمیونسٹ پارٹی ائے زمہ وار مڑدم آنر گوشتی آ شزا کہ آں مچھیں مستعدی آگو ہمیں ٹؤک آنر دروغ ثابت کھنغ ائے کوشست کھناں ہماں کہ لیک بیسغاں۔ہمیں بارو آ سری ایں کار تہ اے کھزی آ شزا کہ ہماں مچھیں کاگد آنر شوشینغ او ڈلیٹ کھنغ ائے کوشست کھزی آ شزا ہماں کہ لیک بیسغئے ساں۔کاگد آنرآس دئے اغ او ریکارڈ آ تباہ کھنغ ائے کار آ دی چنتی اینگے ٹؤک بیسغاں کہ ہمائی آ لکینغ مشکل بیسؤ شزا۔چین ائے حاکم آنر اے ٹؤک شَر ایں وڑا پوہ آ آتکا کہ آں چاہے ہمیختر دی کوشست کھناں آں سوب مند نوی آں پھرچھے کہ ہر شئے روش ائے روژنائی ائے بھیرا پدھر ایں۔