سرگال:پاکستان امریکہ ائے مزہب ائے فرق ائے لِست آ اوار

امریکہ آ پاکستان آر ہماں ملک آنی لست آ پدوارغ اوار کھُزا ہماں ملک آنی اندرا مزہب ائے فرق بی۔ہمیں لِست آ میانما،چین،ایریتیریا ،ایران ،جال کوریا ،پاکستان،سعودی عرب ،تاجکستان او ترکمانستان اوار آں ۔امریکہ ائے ڈن ائے وزارت اینگے ملک آنر ہموزا مزہب ائے آجوئی نعیں ہموزا ۱۹۹۸ ائے بین الاقوامی مزہبی آجوئی ائے قانون ائے روگا ہمیں لِست آ اوار کھنت؛ہمائی آ کنٹریز آف پارٹیکیولر کنسرن؛ائے نام داسی آ شزا۔ہمیں زمرہ آ ہماں دی ملک کھایاں امریکہ آنہاں نی حلاپ پابندی گیش کھز کھنت۔گڈا دی پاکستان ائے ڈن ائے وزارت ائے گُشغ ایں کہ اسلام آباد آ ہمیں لست آ پدوارغ اوار کھنغ ہمیں ٹؤک ائے عکاسی کھنت کہ چھی اے ملک آنر نشانہ کھُزی آ رؤغیں او ہمیں گام آژ مزہبی آجوئی آ گیش کھنغ آ مدد نہ ملی۔اسلام آبادآ ڈن ائے دپتر آ گوشتا کہ پاکستان یک کثیر مزہبی ملک ایں ہموزا آئین ائے روگا جتا ثقافتی اقلیت آنر وتی حیثیت برقرار ایر کھنغ ائے حق ایں ۔ڈن ائے دپتر ائے یک بیان ائے روگا سرکار ائے مچھین شعبہ آں مچھیں شہری آنی مزہبی آجوئی آ باور دؤخ کھنغ آپا کوشست کھزی آ شزغاں۔ہمیں بارو آ ملک ائے اعلی ایں عدالت آ بازیں وخت وتی فیصلہ سرکار آ ہدایت دی کھزا کہ آں اقلیت آنی مزہبی ھَند آنی سلامتی آ باور دؤخ کھناں۔پاکستان ائے ڈن ائے آ گوشتا کہ ملک ائے مزہبی آجوئی ائے موضوع چکا شَر ایں منغ نامہ آپا امریکہ پھجی آ بین الاقوامی براسی آ گو گپتران دی کھزئی۔ہمیں سال ائے بنگیج آ بین الاقوامی مزہبی آجوئی ائے بارو آ امریکہ ائے ایمبیسیڈر ایٹ لارج سینتر سیمول براؤن بیگ ،آ مزہبی آجوئی ائے موضوع چکا گپتران آپا پاکستان ائے دؤرہ کھزغئے سا۔مگہ دکھ ائے ٹؤک اش انت کہ ہمیں تعمیری گپتران آژ چھم چھیرینتھی آ شزغاں۔