سرگال:صدر ٹرمپ ائے اچانکی کابل ائے دؤرہ امیت ائے یک کرن

اچانکی امریکہ ائے صدر ڈونلڈ ٹرمپ گوستی ایں روش آں افگانستان ائے بنجہ کابل پُجھسا او افگانستان آ تعنات امریکہ ائے پؤجی آنگو ملسا اوتشکر ائے رسم ادا کھزیئ۔گیر بی کہ صدر بی اغ آژ رندا واجہ ٹرمپ ائے اے اولی ایں افگانستان ائے دؤرہ اسا۔چوش کہ وتی سروکی ائے وخت ائے نیمگا آنہی آ افگانستان او ہماں حوالہ آژ برز آسیا ائے بارو آ کے کی خاصیں فیصلہ دی کھزغاں مگہ افگانستان آنہی روغی نویسغئے سا۔ہماں کہ خاصیں فیصلہ آنہی آ کھزغئے ساں آنہانژ برز آسیا ائے بارو آ یک نوخیں امریکہ ائے حکمت عملی لاگو کھنغ ائے فیصلہ دی اسا۔ہماں وخت آنہی آ پاکستان ائے حوالہ آژ باز سخت موقف اپانئینتھغئے سا ہمائی روگا آنہی آ پاکستان آر دئے والا پؤجی او اقتصادی مدد آ معطل کھنغ ائے فیصلہ دی کھزغئے سا۔وتی یک تویت اندرا آنہی آ اے گوتغئے سا کہ پاکستان آ امریکہ آ کروڑو روپیہ زر آنی مدد داسا مگہ آنہی جواب آ پاکستان ائے وٹاژ چڑوئی آ دروغ او فریب ملسا۔بہر حال برز آسیا ائے بارو آ ہمیں نوخیں پالیسی ائے جار آ پھدا چھی اے دیگر فیصلہ دی آتکغاں ۔آنہانژ یک ٹؤک اے دی اُش کھنغ آ آتکا کہ دوحہ آ طالبان ائے نمائیندگ او امریمکہ ائے نیمگا امن گپتران ائے سلسلہ بنا بیسا۔امریکہ ائے وٹاژ یک مزن ایں سپارتکار زاملئے خلیل زاد خاصیں ایلچی مقرر کھزی آ شزا او آنہی آ ہمیں زمہ واری داسی آ شزا کہ آں طالبان نمائینگ آنگو گپتران ائے سلسلہ اگا کھنت۔گپتران ائے کے ای دؤر جزتھغاں مگہ ہماں نیمگا اے دیبواالعجبی گندغ آ آتکا کہ گپتران ائے پھجی پھجی آ افگانستان آ طالبان ائے ھلگر دی جاری رہسغاں او ہمیں ھلگر اندرا افگانس سیکیورتی فورساو پولیس والا آنی گون شہری دی مڑتھغاں او ٹھپھی بی آنا آتکغاں۔طالبان نہ وتی ھلگر بند کھنغ آپا راضی بیسغاں او نہ ہی افگانستان آنہی ائے نمائیندگ آنی پھجی آ گپتران کھنغ آپا آمادہ بییسا۔بہر حال گپتران ائے نیمگا یک مرحلہ اینگے دی آتکا کہ نی نزیخی ایں روش آں منغ نامہ چکا دستخط بی اگ والا دی آں ۔او آنہی آژ چھی اے سرا صدر ٹرمپ افگانستان ائے صدر او طالبان سروک آنگو یک خاصین بپٹھک دی کھنغ والا ایں۔آنہی تاری دی جزغئے سا او حبر آنی روگا ہمیں بیٹھک آپا صدر اشرف غنی امریکہ آپا روانہ دی بیسغئے سا مگہ اچانکی آژ کل کھپتا کہ صدر ٹرمپ آ گپتران آ ماتل کھُزا۔آنہی وجہ آنہی آ اے ڈسسا کہ طالبان آ منغ نامہ آژ سرا یک مزن ایں ھلگر کھزغئے سا ہمائی اندرا یک امریکہ ائے پؤجی او چنتی مڑدم مڑتھغئے ساں۔مگہ پھدا اے دی کل کھپتا کہ صدر ٹرمپ ائے ناوشی ائے چھی اے دیگر سبب اسا ہمائی آ یک وجہ اے دی اسا کہ طالبان افگانستان ائے سرکار آگو ھچھ دی حالت آ گپتران کھنغ آپا تیار نیا۔