سرگال:مقبوضہ رونشت پٹی آ اسرائیلی بستی آنر صدر ٹرمپ ائے منظوری

امریکہ آ مقبوضہ رونشت کنارہ آنر اسرائیلی بستی آنر قانونی منسا۔ہمیں بارو آ ڈن ائے وزیر مائیک پومپیو آ نی ایں روش آں جار جھزغئے سا ۔امیت ائے برعکس امریکہ ائے وٹاژ ہمیں جار نہ چھڑوئی آ رونشت پٹی آپا عالمی ہم صلاحی ائے حلاپ ایں بلکہ ہڑدوکین ملک آنگو بستگی ایر کھنغ والا امریکہ ائے ہمیں پالیسی ائے حلاپ دی آں ہماں کہ ۱۹۷۶ ائے مڑائی آ پھدا آژ جزغئے،ہمیں پالیسی آ بے معنی منسؤ واجہ پومپیو آ جار جھزا کہ رونشت پٹی آ اسرائیلی بستی آنی قیام بین الاقوامی قانون ائے حلاپ نعیں۔آنہی آ گوشتا کہ ہموزا تکا رونشت پٹی او اسرائیلی بستی آنی تعلق ایں تہ ہمیں مسلہ آر وا اسرائیل او فلسطین گپتران آگو حل کھناں ۔۱۹۶۷ ائے مڑائی ائے نیمگا اسرائیل آ رودرات یروشلم ،سنائی جزیرہ ائے وڑا ،گولان ائے کوہ ،غازہ پٹی او رونشت پٹی ائے ہماں بہر آنی چکا قوضہ کھزغئے سا،ہموزا وتی بستی ٹھائینتھیئ ۔بستی ٹھائینغ ائے عمل مڑائی آسر
بی اغ آ پھدا بِنا بیسغئے سا۔سجوں آنژ سرا آنہی آ یروشلم ائے رودرات دمغ آنر وتی قوضہ آ کھُزا ہماں ہاں نی چکا مڑائی آژ سرا اردن ائے کنترول اسا۔آنہی آ پھدا آنہی آ گولان ائے کوہی بستی آنی چکا بستی ٹھائینغ بنا کھُزا او کِرا کِرا مچھیں مقبوضہ جاگاہ آ بستی آباد بیسغاں۔اے وخت رونشت پٹی آ نزیخ ۱۳۰ قانونی او سد غیر قانونی بستی آں ہموزا نزیخ چھیار لکھ اسرائیلی آں ۔اشی گون نزیں دو
لکھ اسرائیلی رودرات یروشلم ائے دوازد یہودی کالونی آنی اندرا او ۲۲ ہزار مڑدم گولان ائے کوہی
جاگاہ آ آبات ۳۲ بستی آ رہسی آں۔اسرائیل ائے عرب ہمسائیگ آنی گون امن قائیم ایر کھنغ آپا اے بستی خاصیں کردار ادا کھناں۔۱۹۸۲ آ کیمپ ڈیوڈ آ اسرائیل او مصر ائے نیمگا منغ نامہ ائے سبب آژ اسرائیل آ یامت بستی آنر بھورینتھؤ سنائی جزیرہ ائے جاگاہ ہور کھنائینغی بیسغئے سا۔آنہی آ پھدا ۲۰۰۵ آ اسرائیل ائے غازہ پٹی ائے ۲۱ بستی آنی اندرا تاہارتھی ایں نزیخ ہشت ہزار مڑدم آنر
گڑدینتھؤ لوٹھائینتھیئ۔۱۹۹۰ ائے دھائی ائے نیمگا اسرائیل او ملک شام ائے نیمگا گپتران ناسوب بیسا پھرچھے کہ اسرائیل ماؤنٹ برمن آژ دستبردار بی اغ آ باڑہ نیا۔ماؤنٹ برمن ہماں جاگاہ ایں ہموزا آژ شام ائے بنجہ دمشق نیاہ کھائے۔مقبوضہ دمغ آنی اندرا یہودی بستی آبات کھنغ ائے اسرائیل ائے بازی آ ترسیاسی پارٹی آں وتی کردار ادا کھُزا۔وخت گوزغ ائے پھجی پھجی آ بستی گیش بیسغاں او ایزا ائے آباتی اسرائیل ائے چپ دست پارٹی ائے حمایتی بیسا۔اسرائیل او فلسطین ائے نیمگا اے بستی مزن ایں رکاوٹ آں۔بین الاقوامی براسی مزن ایں عرصہ آژ ہمیں ٹؤک کھنانا پھیزاغیں کہ اے بستی چھیارمی جینیوا کنوینشن ائے حلاپ ورزی ایں۔۲۰۰۴ آ وتی یک فیصلہ آ بین
الاقوامی عدالت آ دی ہمیں بستی آنر غیر قانونی منسغئے سا۔