سرگال:کرتار پور راہداری پاکستان ائے بد نیتی آ درا کھنت

گوستی ایں ماہ ہماں وخت سیماں ائے ہڑدوکین وٹاژ کرتار پور صاحب راہداری ائے بنگیج بیسغئے سا تہ یک وشتر ماحول پیدا بیسغئے سا پھرچھے کہ ھند ائے مڑدم آنی خاصیں وڑا سکھ عقیدتمند آنی مزن ایں عرصہ یک یک لوٹھغ اسا کہ گوردوارہ کرتار پور صاحب او بابا ڈیرہ نانک گرداس پور ائے نیمگا کوریڈور ٹھائینتھی آ برؤتاکہ عقیدت مند آسانی آگو کھایاں او برواں۔ہمین ہڑ دوکین پاکین ھَند آنی دیری چھڑوئی آ چند کلومیتر ائے غیں ۔مگہ بہر بی اغ آ پھدا ہمیں دوکین آنی نیمگا دیری ہمیختر گیشتر بیسغئے سا کہ گوستی ایں ہپتاد سال آنژ دی گیش عرصہ آژ مڑدم کرتار پور صاحب ائے دیدار آژ محروم اساں۔گوستی ایں سال پاکستان ائے وٹاژ اے رضامندی پدھر کھزی آ شزا کہ ہمیں دگ آ ٹھائینتھی آ برؤ۔بہر حال اے وشی ائے ٹؤک اسا۔اے ٹؤک دی اطمینان دؤخ اسا کہ یک سال ائے عرصہ آ دوایں ملک آں وتی وتی وٹا راھداری ائے کار پھیلو کھُزا او گوستی ایں ماہ آنہی بنگیج کھُزی آ شزا۔سروزیر نریندر مودی آ آنہی بنگیج کھزؤ وتی پاکستانی ہم منصب ائے شکریہ ادا کھزا کہ آنہی آ ھند ائے مڑدم آنی کہنیں لوٹھغ آ پورا کھُزا۔نہ چھڑوئی آ سر وزیر بلکہ چنتی دھُر آنی آنہی وشادگی کھُزغئے سا او امیت پدھر کھزیش کہ دیگر مسلہ آنی اندرا دی پاکستان چھی اے اینگے گام زیری تاکہ ہمیں وڑا ناوشی دیر بی۔نی ایں روش آں لندن آ چھی اے زانتکار آں یک بیٹھک آ ہمیں ٹؤک چکا ویچار آنی تبادلہ کھُزا کہ پاکستان ائے ٹھپی بیسغیں وقار آر دیستؤ پاکستان آ وتی عکس آ وشتر کھنغ آپا کرتار پور ائے وڑ ائے دیگر گام گیج دی کھنغی بی آں ۔
او دھشت گردی ائے لعنت آژ وتی دامن بھچینغ لوٹھی۔مگہ دُکھ ائے ٹؤک انت کہ ہمیں وڑئے مشورہ
آنی احترام کھنغ یا آنہی چکا ویچار کھنغ ائے بجائے پاکستان ائے سیاسی اوسپارتی دھُر آنی وٹاژ اینگے سلوخ پدھر کھزی آ رؤ کہ پاکستان آ امن ائے گواس آگو ھچھ دل لوٹھی نعیں ۔آنہاں نی ٹؤک آنژ او عمل آنژ نفرت پدھر بی۔مثال آ لندن ائے ہماں بیٹھک ائے ایزا زکر بیسا آنہی آ شریک بی اوخ آں ڈسسا کہ لندن آ پاکستانی سپارتخانہ آ ہمیں ٹؤک ائے مچھیں بھیرا کوشست کھُزا کہ آں بیٹھک منعقد نوی۔نی پاکستان ائے یک وفاقی وزیر ائے نی ایں پیرا چکا ویچار کھنوں ہمائی نام شیخ رشید ایں،آں ریلوے ائے وزارت ائے عہدہ سنبھالغیں آنہی آ یک نی ایں بیان آ گوشتا کہ کرتار پور راھداری ائے ٹھائینغ ائے پروجیکت پاکستان ائے نی ایں آرمی چیف قمر جنرل باجوا ائے چُکھی ایں دماغ اسا۔شیخ رشید آ آنہی چکا بس نہ کھُزا آنہی آ اگا اے دی گوشتا کہ اے راہداری ھند آر ٹھپی کھنت۔جنرل باجوا آ ھند چکا اینگے ٹھپ جھزا کہ ھند آر گیر بی۔