سرگال:ایران ائے احتجاج خلیج آ امن اواستحکام ائے حالت آنی آپا ضرررساں

ایران ائے سرکار آ گوستی ایں ماہ جار جھزا کہ آں پیترول ائے راشن بندی کھنت تاکہ آنہی آژ ملغ والا ایں زر آنگو غریو شہری آنی مدد بیس بی ۔سرکار ائے ہمیں جار آ پھدا تیل ائے بھا آ گیشری بیسا۔تیل ائے بھا اندرا گیشتی چکا مڑدم آ احتجاج کھُزا ۔ہمیں احتجاج آ چنتی مڑدم آنر وتی پکڑ آ گِتا،ہمیں احتجاج آ کِرا کِرا سیاسی دیم گِتا ہمائی آژ سرکار ائے استحکام آ خطر لاحق بیسا۔ایرانی حاکم آں ہمیں انتشار آپا ملک ائے دژمن او جلا وطن اپوزیشن ٹلہ آنی چکا الزام جھزا او آنہی آ دیما کھنغ آپا فیصلہ ائے گام گیج کھزغاں۔سرکار ائے حلاپ مظاہرہ آنر گیش بی اغ آژ دارغ آپا انتر نیت آر دی مچھیں وڑا بند کھزی آ شزا ۔پاسداراران انقلاب ائے کمانڈر ائے روگا ایران ائے دژمن آنی مقصد ہمیں احتجاج ائے زریعہ آگو ملک آر خطر آ ماکھنغ اسا۔چوش کہ ایران آ احتجاج ائے نیمگا مرغ والا آنی ھچھ تفصیل نہ داسا گڈا دی ایمینستی انترنیشنل آ دعوی کھُزا کہ مظاہرہ آنی نیمگا کم چہ کم ۲۰۸ مڑدم مڑتھغاں ۔ڈسسی آ رؤغیں کہ نی ایں احتجاج ائے نیمگا نزیخ دو ہزار ۲۰۸ مڑدم ٹھپی بیسغاں۔ایرانی میڈیا آ سیکیورتی فورس ائے دست آنژ چھی اے مڑدم آنی جنجیےئغ آ منسا۔ہمیں مرغ والا آنر دھشت گرد منسؤ میڈیا آ ہمیں مظاہرہ آنر آسر کھنغ آپا سیکیورتی فورس ائے وشادگی کھزا۔اشی گون ایران ائے انتیلیجنس ائے وزارت آ گوشتا کہ کم چہ کم ہشت مڑدم آنر دستگیر کھزی آ شزا ۔مظاہرہ کھنوخ او سیکیورتی پؤجی آنی نیمگا نزیخ دو ہپتغ آنی جھیڑو آنی پھدا صدر حسن روحانی آ ہمیں ہپتغ گوشتا کہ ہماں مڑدم آنر آجو کھنغ لوٹھی ہماں کہ بے ڈوہ آں او دستگیری ائے وخت آنہانژ ھچھ وڑ ائے اسلحہ نہ ملسا۔ایران ائے سرکار ائے حلاپ احتجاج ہماں وخت بیسا ہماں وخت تہران واشنگٹن ائے وٹاژ جھزی ایں پابندی آنی زد لافا ایں۔زکر ائے لائیق انت کہ گوستی ایں سال ایران او شش دیگر ملک آنی پھجی آ بی اغ والا ایں نیوکلایئ منغ نامہ آژ وضہار جتا کھزؤ امریکہ آ ایران چکا باز پابندی جھزغئے ساں۔امریکہ ائے پابندی آنی وجہ آژ ایران تیل او گیس ائے برآمد کھنغ آژ قاصر ایں ہمائی وجہ آژ آنہی معیشت چکا اثر کھپتا۔پابندی آں ایران ائے شہری آنی زند آ لاچار کھزا۔نی ایرانی سرکار معیشت ائے ردین حالت آپا وتی دژمن آنی چکا الزام جھنغیں ۔آنہی گشغ ایں کہ ایران ائے مچھیں مشکل ہمیں پابندی آنی سبب آگو ایں۔چوش کہ نی ایں احتجاج تیل ائے بھا اندرا گیشتری ائے سبب آژ بنا بیسغئے سا مگہ اینگا مان کھائے کہ اے ایران او امریکہ ائے نیمگا مزن ایں عرصہ آژجاری تعطل ائے نتیجہ ایں۔