سرگال:لندن ائے دھشت گرد ائے پاکستان آگو بستگی

گوستی ایں ہپتغ لندن ائے مشہور زمانہ لندن برج چکا ہماں ۲۸ سال آنی نوجوان آ دو مڑدم آنر کُشتا او دیگر سئے مڑدم آنر بازی آ ٹھپی کھزغئے سا آں لندن پولیس ائے دست آنژ وا تہ کُشتی آ شزغئے سا مگہ گوستی ایں روش آں نی آنہی عمل حیران کھنوخ آں۔آنگا تہ آں برطانیہ ائے شہری اسا او آں کستنی آ چھی اے وخت آپا پاکستان آ استا۔ آنہی بارو آ لندن پولیس او دیگر زرائیع آنژ ہماں کہ تفصیل دیما آتکا آنہی آژ اٹکل بی سا کہ آنہی آ ہماں وڑا تربیت داسی آ شزغئے سا کہ جہاد او شہادت ڈؤل ائے لپظ آنہی حون آ مان اساں۔آنہی برین واشنگ ہماں وڑا کھُزی آ شزغئے سا کہ آں پیدائیشی ڈؤل چکا دھشت گرد اسا۔۲۰۱۲ آ آنہی آ لندن ائے عدالت آژ سزا بیسغئے سا او کے ای سال جیل آ رہسا۔
آنہی نام عثمان خان اسا ۔عدالت آ ہشت سال آنی جیل داسغئے سا ۔سزا ائے وجہ اے اسا کہ آنہی آ وتی سنگت ائے پھجی آ ملسؤ نی ایں برٹش سروزیر بورس جونسن آ ہماں کہ آں وخت لندن ائے مئیر اسا کُشغ ائے او لندن ائے اسٹاک ایکسیچینج او ویسٹ منسٹر آ واقع پارلیمان کمپلیس آ تباہ کھنغ ائے منصوبہ ٹھائینتھغئے سا۔۲۰۱۸ آ آنہی آر چھی اے شرط آنی بنشت چکا السی آ شزغئے سا او نی آنہی ائے ہمیں کارنامہ دیما آتکا۔آنہی آر سزا اش کھنائینغ ائے وخت مزن ایں قاضی آ گوشتغے سا کہ آنہی ٹؤک آنژ کل بی کہ مدرسہ قائیم کھنغ ائے منصوبہ او دھشت گردی آپا آنہی سلوخ آر دیستؤ اے اٹکل جھنغ بیس بی ہمیں مڑدم ائے ارادہ چھیختر خطر ناک آں ۔وتی سنگت آنگو گپتران کھزؤ ہماں ٹؤک آنی نشاندھی آنہی بارو آ ایجنسی آں کھُزا آنہاں نی روگا آنہی منصوبہ باز دراژ مدت ائے اسا۔یک منصوبہ اے اسا کہ آں پاکستان ائے قوضہ والا ایں کشمیر آ یک مدرسہ قائیم کھنت او ہموزا دھشت گردی ائے تربیت آپا ہر وڑ ائے آساقی دا۔آں فراڈ او دیگر ناجائیز طریقہ آنگو فنڈ جوڑ کھنغ آپا باڑہ اسا۔ہمیں تربیت سینتر آ برطانیہ ائے مسلمان آنر آں برغ آ باڑہ اسا او ہموزا آں وا دی دھشت گردی ائے ھلگر آنی تجربہ کھنغ آ باڑہ اسا ۔تفصیل آ اے ٹؤک دی دیما آتکا کہ عثمان خان مقبوضہ کشمیر آ ہماں جاگاہ آ مدرسہ او تربیت سینتر قائیم کھنغ آ باڑہ اسا ہماں کہ وا ہمیں فیملی ائے ملکیت ایں۔ہماں کیمپ آژ آں او آنہی سنگت جموں وکشمیر چکا ھلگر کھنغ ائے پروگرام ٹھائینغئے ساں۔۲۰۱۸ آ چھی اے شرط آنی پھجی آ آنہی آ السی آ تہ شزغئے سا مگہ آں وتی جہادی ویچار آنژ پھدا نہ ہٹسا ۔لندن برج چکا بی اغ والا ایں ھلگر آنہی جنون ائے یک بہر اسا۔دوہمی وٹا پاکستان آ یک انتہا پسند دھُر آ عثمان خان ائے شناخت پدھر کھنغ چکا دی اعتراض بیسا۔صاف ایں کہ آں پاکستان ائے رہغ والا برطانوی شہری اسا ہمیں خاطرہ حبر او رپورٹ آ ہمیں گوشتی آ شزا کہ آں برطانوی شہری اسا مگہ آنہی کنبہ پاکستان آ ہموزا اسا۔پاکستان ائے مشہور اخبار ڈان آ ہمیں ٹؤک وتی یک رپورٹ آ دی گوشتا کہ لندن برج چکا ھلگر کھنغ والا دھشت گرد پاکستان نژاد برطانیہ ائے شہری اسا تہ دھُر باز تھُڑستا او اخبار ائے آفس چکا یُرش کھنائینتھئی۔