سرگال:جنرل مشرف ائے بارو آ خاصین عدالت ائے فیصلہ مزن ایں عدالت ائے وٹاژ رد

پاکستان آ عدالتی نظام ائے بارو آ اکثر سوال دی کھڑو بی آں او گمان دی درا کھزی آ رواں ۔دیگر مسلہ آنی اندرا تہ عدالت ائے کاروائی او آنہی فیصلہ آنی بارو آ عامین وڑا ھچھ بحث نوی مگہ سویلین سرکار او سویلین سروکی او پاکستان ائے پؤج ائے نیمگا مزن ایں عرصہ آژ جزوخیں ناوشی آر دیستؤ عدالت سرا آژ سوال آنی گھیرا آ رہسا۔ہمیں بارو آ اے سوال سرا آژ کھڑو بی آنا آتکاکہ چھے پاکستانی عدالت ریاست ائے یک غیر جانبدار ادارہ ایں؟اے سوال ہمیں خاطرہ کھڑو بی آنا آتکا کہ ہماں وخت دی سویلین سروک او پؤج ائے نیمگا ھچھ ناوشی پیدا بیسا او مسلہ عدالت تکا پُجھسا تہ فیصلہ بازی آ تر پؤج ائے حق آ آتکا۔قانونی زانتکار او آئین ائے وٹاژ اے اشارہ داسی آ شزغاں کہ عدالت ائے غیر جانبداری مشکوک ایں او آنہی آپا دلیل اے داسی آ شزغئے سا کہ ہماں وخت کھسے پؤجی جنرل ھچھ قانونی او جمہوری ڈؤل چکا گچین بیسغیں سرکار ائے حلاپ غیرآئینی ڈؤل چکا بغاوت کھزؤ آنہی تختہ اوندحو کھنت تہ عدالت آنہی آر اے گوشتؤ جائیز منی کہ نظریہ ضرورت ائے روگا ہمیں بغاوت بیسغئے سا۔ہمیں ڈؤل چکا پؤجی حاکم آنر حکومت کھنغ ائے نہ چھڑوئی آ جواز ملسا بلکہ باز اینگے کاروائی دی جائیز منسی آ شزغئے ساں ہماں ہاں نی روگا سروزیر آر تکلیف داسی آ شُز،آنہی آر زلیل کھُزی آ شزایزا تکا کہ یک گچین بیسغیں سر وزیر آر پھاہو دی دیائینتھی آ شزغئے سا۔اے یک دراژ قصو ایں ۔پاکستان ائے آخیری ایں ڈکتیر جنرل مشرف آ ۱۹۹۹ آ نواز شریف ائے سروکی بھورینتھؤ آنہی آر دیگر تکلیف آنگو وطن آژ درا کشتی آ شزغئے سا مگہ ۲۰۰۷ تکا آتکؤ آتکؤ آنہی آر جنرل مشرف او ہماں وخت ائے پاکستان ائے مزن ایں قاضی،قاضی افتخار محمود چودھری ائے نیمگا ھچھ ٹؤک چکا باز ناوشی بیسا۔۲۰۰۷ ائے آخیر تکا آنہی آ چھی اے وخت تکا ایمرجنسی لاگو کھزغئے سا او آئین آر یک دھکا پدوارغ معطل کھزیئ۔آنہی آ مزن ایں عدالت ائے مزن ایں قاضی پھجی آ اعلی ایں عدالت ائے چنتی قاضی آنر نیاہ بند کھزغئے سا۔پاکستان ائے قاضی براسی آ ملک گیر تحریک بنا کھزا ہماں کہ عوامی تحریک آ بدل بیسا او آخیر کار ہماں تحریک مشرف ائے زوال ائے صبب بیسغئے سا۔۲۰۰۸ آژ نی تکا ھچھ پؤجی بغاوت تہ نہ ویسا چوش کہ سروکی آ ھچھ مزن ایں بدلاؤ تہ گندغ آ نیاتکا او چوش کہ پؤج سجوں آنژ گیش زور آور ادارہ ایں ہمیں خاطرہ اینگے ھچھ مسلہ دی عدالت آ نیاتکا۔البت ۲۰۱۸ آ بی اغ والا عامین گچین کاری آ پؤج او عدالت ائے نیمگا پوشیدہ منغ نامہ کھنغ ائے ڈوہ باز دھُر آنی وٹاژ جھزی آ شزا پھرچھے کہ پؤج آ مبینہ ڈول چکا یک منصوبہ ائے روگا نوازشریف آ عدالت او احتساب بیورو ائے مدد آژ سروکی آژ بے دخل کھزا او عمران خان آ سروکی آ آرغ ائے کوشست کھزئ۔