سرگال:طالبان ائے وٹاژ آچ بندی ائے پیشکش

امریکہ افگانستان آژ وتی پؤجی آنی گڑدغ آژ سرا ہموزا ائے سرکار او طالبان مڑوک آنی نیمگا منغ نامہ آپا ہماں کہ گپتران ائے عمل گوستی ایں سال آژ جزینغاں آنہی آ تنک ھچھ سوب مندی نہ ملسا۔مگہ نی ایں روش آں طالبان ٹلہ آں عارضی ایں آچ بندی ائے ہماں کہ پیشکش امریکہ ائے دیما ایر کھزا آنہی آژ چھی اے امیت پیدا بیسغاں کہ شاید امن ائے ماحول اندرا آپسی ایں ناوشی دیر بی برؤ او ہمصلاحی ائے چھی اے دگ درا بی ۔افغانستان آ اے وخت امریکہ ائے نزیخ سیزد ہزار پؤجی آں ۔مڑائی آژ تباہ ہمیں ملک آ امریکہ ائے پؤجی آنی بی اغ او طالبان باغی آنی حلاپ آنہی پؤجی عمل آنر ہژدہ سال پورا بیسغاں ۔ہمیختر دراژ عرصہ تکا مڑائی امریکہ آ کھدیں نہ کھزا ۔نی ایں حالت اش انت کہ ملک آ آنگا تہ یک گچین بیسغیں سرکار ایں مگہ نیم افغانستان چکا عمل آگو طالبان ائے قوضہ ایں۔طالبانی مڑوک ہر روش امریکہ ائے پؤجی جھوک او کابل ائے ھَند آنی چکا ھلگر کھناں ۔گوستی ایں سال ستمبر آ امریکہ او طالبان یک منغ نامہ تکا پُجھسغئے ساں او آنہی چکا دستخط بی اغ ائے گمان دی نیاہ پھیزاغئے سا مگہ ہماں وخت طالبان مڑاک آنی مڑائی تیز بیسا او یک امریکہ ائے پؤجی ائے مِرغ آژ حالت ردین بیسؤ شزغاں ۔ہمیں دپ آ پھدا امریکہ ائے صدر ڈونلڈ ٹرمپ آ گپتران ائے سلسلہ بند کھُزا۔سال ائے آخیری ایں روش آ صدر ٹرمپ آ امریکہ ائے پؤجی آنی پھجی آ بیٹھک آپا سری ایں افغانستان ائے دؤرہ کھُزا تہ آنہی سلوخ اندرا چھی اے نرمی آتکا او آنہی آ گوشتا کہ طالبان منغ نامہ آپا تیار آں مگہ کابل او واشنگٹن آ آنہی چکا زور ماکھزا کہ طالبان حب او سنگتی او امن آپا وتی ھلگر آنر کھمیں کھناں ۔آنہی آ رندا طالبان لیڈر شپ پاکستان آ وتی ہیڈ کوارتر چکا چندہپتغ آنی گپتران آ پھدا یک عارضی ایں آچ بندی آپا تیار بیسا۔نی ایں روش آں طالبان آ قطر آ ہپت آژ دھ روش آنی تکا عارضی ایں آچ بندی ائے پیشکش امریکہ ائے مزاکرات کار زلمئے زاد خلیل ائے حوالہ کھُزا۔امریکہ ائے وٹاژ تنک ہمیں پیشکش ائے جواب نیاتکا مگہ محسوس کھزی آ رؤغیں کہ آچ بندی ائے ہمیں پیشکش نتیجہ دؤخ ثابت بی۔زلمئے خلیل زاد آ سرا دی آچ بندی آپا زور داسا تاکہ گپتران ائے عمل پدوارغ بنا بیس بی ۔آنہی آ گوشتغئے سا کہ طالبان ائے پھجی آ ہماں دی منغ نامہ بی آنہی آ اے شرط بی کہ آؤخین روش آنی خاکہ ٹھائینغ آپا افغان دھُر آنر مستقل آچ بندی ،زائیف اواقلیت آنی حق آنی دھیان ایر کھزؤ آپس آ مسلہ آنر حل کھنغی بی۔