سرگال: بہ پاکستانا کانونئ جور کنگ بہ عجلت، بلیک میل ڈبہ و مصالحہ گوازئ نتیجہ۔

مروچی بہ مُچین پاکستانا بہ کانون جور کنگئ یک معاملہ شہ گیرمعمولین عجلہ وجا یک مثالئ بہ دیما آتیت۔ شہ ای وجا یک عجیبئن ماحولئ ودی بوتگیت و ھر نیمگئ سر و توار برز بوتگیت، بہ اصلا دو سہ بل آ پارلیمنٹ پہ باز عجلت منگا بوتیت کہ مردم حیران منتگنت و گیرمعمولین وارخطائی دیستگ بیت۔ مین اسٹریم اپوزیشنئ گل تقریبا” گیرمشروطین وڑئ گون حکومتا یک دست بوتگنت، شہ مُچان گیشترین حیرانی وت اپوزیشنین گلانی نیمہ دار دارنت کہ ای امیتا نہ داشتگنت کہ پہ ای گلئ کہ ووٹ داتگنت و نیمہ دارئ لوٹگانی پروائ داشتگ مہ بنت و بیدئ ایشی کہ آوانی پروا داشتگ بنت گون حکومتا دستا یکئ کرتگنت۔ ھبر ایش کہ سپریم کورٹ پہ پوجئ سربراہ یک اکسٹنشنئ معاملہ حکومتئ دیما اوشتارینتیت و پہ حکومتا یک مسئلہ جور بوتیت۔ بہ اگست ماہ شہ سرئ وزیرئ نیمگا آرمئ چیف، جنرال باجوا کارین وھدہ پہ سہ سالئ دیگہ دیمرئی داتگ بوتیت و یک نوٹیفیکیشنئ رادگ کرتیت ۔ 

جنرال قمر جاوید باجوا بہ نومبرئ آخرا باید انت ریٹائیر بوتن مگہ سپریم کورت شہ یک ٹکنیکلئ بنیادا سرئ اوشتارینگ جتیت، البتہ پہ ۶ ماہ جنرل قمر باجوا اکسٹنشنا منگا بوتیت و حکومتا رانشاندیوکی کرت کہ تہ ای وھدہ پہ باجوائ اکسٹنشنئ بحال کنگا شہ پارلیمنٹا کجام کانونئ پاس کننت تہ کہ بہ آیوکا فیصلہ گپتگ کننت۔ شہ عدالتئ رانشاندیوکئ دیما حکومت ۳ بل پہ پارلیمنٹ آ دیما کرتیت و پوجئ ھر سہ باشلوکانی سربراھانی و جوینٹ چیف اسٹاف کمیٹہ بحال کنگا و بہ ای اکسٹینشنئ باروا استنت۔ بہ بل سیائگا کارین وھدہ دیمرئی دیگئ صلاحیت پہ سرئ وزیرا دیگئ ھبرئ بوتگیت۔ پارلیمنٹئ دوکین ایوان گون بازین عجلہ آی را پاس کرتگنت۔ 

پاکستامئ تحلیل کنوک گشنت کہ شہ دیما تہ انون اینکس زوت کجام بلئ پاس نہ بوتگیت و نہ دیستگنت تہ نون۔ تانکا چُنت کسانین اپوزیشن ایشی مخالپتا کرتگنت۔ وھدہ کہ دوکین خاسین اپوزیشنئن گل مسلم لیگ نواز و پاکستانئ پیپلز پارٹی پہ ای بلانی نیمہ داریا ووٹ داتگنت۔ پاکستانئ پیپلز پارٹی بیخی گیرمشروطین وڑئ ووٹ داتگیت۔ حتئ پاکستانئ پیپلز پارٹئ ای تیوری آ دیستہ ترمیمئ تجویزانا ھم پھدا گپتگیت۔ حال ایش کہ ای بل بہ ای ماہ سرا پاس بوتگیت، مگہ قیاس آرائی و حیرانئ درا کنگ سلسلہ نون رادگ بوتگیت۔ مسلم لیگ نواز و پاکستانئ پیپلز پارٹی دوکینانی نیمہ دار تہ انون حیران انت کہ آوان چی وڑا پہ اینکس آسانی شہ بل آ نیمہ داری کرتگنت۔

گیشترین تبصرہ کنوک گشنت کہ عمران خانی حکومت یعنی پوجین تولگانی نیمگا شہ ڈبہ پرینگا پہ ای گلان بلیک میل کنگئ تروسا ای بل نیمہ داریا مجبور بوتگنت۔ عمران خانی حکومت یک خاسین ھبرئ ایش انت کہ گون پوجا ھم پکر و ھم خیال انت و ایشا گشتگ کننت کہ (من تو شوم، تو من شدی) معاملہ انت و ھمی وڑا تجزیہ کارانی خیالا کہ پہ ای دو گلان کجام وھدہ داتگ بوتگیت و نیمہ دارئیش گپتگنت۔ شہ ای پورہ ئن واقعہ یک ھبرئ بہ دیما کائیت کہ عمران خاںی وڑئ حلقہ وترا “محسن” خیال کنگا انت و نون بری نزیکیا یک بھوجئ جور بوتگیت و نون دیگہ پہ آی زرورتئ نہ منتگیت۔