سرگال:ایف اے ٹی ایف،ائے گرے لست آژ چھُٹغ آپا پاکستان ائے کوشست

ھدایت ائے باوجوت دھشت گرد ٹلہ آنی مالیاتی واہریائی کھنغ آ دارغ آپا پاکستان ناسوب رہسا او دھشت گرد آنر زر دئے اغ والا آنی عمل آنی چکا نیاہ ایر کھنغ والا کثیر قومی ادارہ ایف اے ٹہ ایف آ پاکستان چکا بروبر زور ماکھزا کہ آں مسلہ آنر قابو کھنغ آپا شر ایں گام گیج کھنت ۔آنہی ائے چنتی دھکا وارننگ ائے باوجوت پاکستان آ لوٹھوک ایں گام نہ زڑتھا ہمیں خاطرہ ایف اے ٹی ایف سخت ایں گام زیرغ آپا لاچار بیسا۔آنہی آ گوستی ایں سال پاکستان آر گرے لست آ ماکھزغئے سا او پھجی آ ہی آنہی آر ہکل داسیئ کہ اگہ گوستؤ شزغیں اکتوبر تکا آنہی آ شر ایں عمل نہ کھُزا تہ آنہی حلاپ سخت ایں کاروائی کھزی آ برؤ او بیس بی کہ آنہی آ بلیک لست کھزی آ برؤ ۔ایف اے ٹی ایف آ پاکستان آر ۲۷ ٹک آنی ایکشن پلان چکا عمل کھنغ ائے ھدایت کھزغئے سا مگہ پاکستان آ ہماں کہ کار کھزا آں اطمینان دؤخ نیا ۔ہمیں خاطرہ گوستی ایں اکتوبر آ ایف اے ٹی ایف آ ناوشی آ پدھر کھزؤ یک وار پدوارغ پاکستان آر ہکل داسا او آنہی آر فروری ۲۰۲۰ ائے وخت داسئ تاکہ ہمیں نیمگا پاکستان وتی ریکارڈ آ درست کھنغ ائے پھجی آ شر ایں گام زیری۔ہماں وخت ایف اے ٹی ایف آ پاکستان آر گرے لست آژ درا کھنغ ائے تجویز آر دی رد کھزا او گوشتئی کہ ہمیں فیصلہ برقرار رہی۔ایف اے ٹی ایف ائے اشیا پیسیفک ٹلہ آ وتی ہماں کہ رپورت داسغئے سا آنہی روگا پاکستان آ ۲۷ ٹک آنژ چھڑوئی آ پنچ ٹک آنی آپا دیم روی کھزغئے سا یعنی تنک آنہی آر مزن ایں دیری طئے کھنغ باقی سا۔بہر حال نی فروری ائے ماہ دی آئیغ والا ایں او ایف اے ٹی ایف پاکستان ائے عمل آنی چکا ویچار کھنغ والا ایں ۔پاکستان آ ہمیں ماہ ائے ہشت تاریخ آ ۶۵۰ کاغد آنی وتی کار آنی رپورت ایف اے ٹی ایف آ داسغئے سا ۔اصل آ ہمیں رپورت پاکستان آ ایف اے ٹی ایف ائے ہماں جست نامہ ائے جواب آ دیم داسغئے سا ہمائی روگا آں اے زانغ آ باڑہ اسا کہ منی لاندرنگ ائے جست چکا پاکستان آ وتی نوخیں پالیسی ائے روگا چھے کھُرتا۔آنہی جواب آ پاکستان آ اکتوبر ۲۰۱۹ آژ جنوری ۲۰۲۰ تک ائے وتی ہماں گام گیج آنی تفصیل پیش کھزا ہماں کہ آنہی ویچار آنی روگا ایف اے ٹی ایف ائے لوٹھغ ائے عین روگا ایں ۔نی ہمیں فیصلہ تہ ایف اے ٹی ایف آر کھنغی ایں کہ آں پاکستان ائے کارکردگی آژ چھیختر وش ایں او اے کہ پاکستان شھے اصلیت آ مچھیں خلوص آگو کار کھنغیں اگرلشکر طیبہ او جماعت الدعوی ائے حلاپ گام زیرغ ائے ٹؤک کھزی آ برؤ تہ نی ایں روش آں حافظ سعید ائے حلاپ چھی اے کاروائی نیاہ پھیزاغیں۔پاکستان آر دھشت گردی آسر کھنغ او ہموزا سرگرم دھشت گرد آنر سزا دیائینغ آپا دل لوٹھی بی یا نہ مگہ اے پکر ضرور ایں کہ عالمی براسی آنہی نام دھشت گرد آنی واہرایئ کھنغ والا ملک آنی لست آ اوار نہ کھنت۔ہمیں سبب ایں کہ ایف اے ٹی ایف ائے سختی آژ بھچغ آپا او گرے لست آژ درا بی اغ ائے کوشست تیز بیسغاں۔ہمیں خاطرہ پاکستانی ٹلہ ایف اے ٹی ایف آگو دیم پدیم بی اغ او وتی ٹؤک آنہی دیما ایر کھنغ آپا چند روش سرا بیجنگ پُجھسا۔نی گندگی اش انت کہ پاکستان آپا ایف اے ٹی ایف ائے اگی ایں فیصلہ چھے بی آنہی داروندار بہر حال آنہی کارکردگی ائے بنشت چکا بی۔