سرگال:پاکستان ائے ردین اقتصادی حالت آنی ڈوہی پاک جنرلس آں

ھچھ دی ملک آ جمہوریت اگر چھڑوئی آ نام ائے بی تہ آنہی عوام عوام سک لاچاری ائے زند گوازینغ آپا لاچار بی ۔پدھر ایں ڈؤل چکا آنہانر حق ملسی آ بی آں مگہ طاغت آنہاں گو نوی۔طاغت تہ آنہاں نی گچین بیسغیں سرگار آگو دی نوی ۔طاغت پؤج ائے دست آ بی۔گشغ آپا تہ پاکستان یک جمہوری ملک ایں مگہ طاغت سرا آژ پؤج ائے دست آ بی،گوستی ایں دھکا ہماں وخت نواز شریف حلف زیرغ آپا رؤغئے سا تہ یک کمانڈر آ سیٹی جھزؤ آنہی ٹلہ آر داشتغئے سا ۔آنہی آر کمانڈر آ گوشتا کہ جنرل قیانی ائے ٹلہ ائے گوزغ آ پھدا ہی آنہاں روغ داشتی آ رؤ۔ہمیں ٹؤک آژ اے کل کھوی کہ نواز شریف پاکستان ائے سروزیر تہ بی مگہ طاغت پؤج ائے دست آ ہی بی۔او اینگا ہی بیسا۔اینگے حالت آ پاکستان ائے اقتصادی ڈؤل چکا مستحکم بی اغ مشکل بی،پھرچھے کہ پاک سرکار داخلی او ڈن ائے پالیسی پؤج ائے اجازت آ بغیر ٹھائینتھ کھز نہ کھنت او نہ لاگو کھز کھنت۔سؤداگری آپا وشتر ماحول او ڈن ائے سرمایہ کاری آپا دی آنہی آر پؤج ائے اجازت درکار بی درگتہ کہ پاکستان آ ڈن ائے ملکی سرمایہ کاری ہمیں خاطرہ نویس بی پھرچھے کہ دھشت گردی آژ آں کھدیں دی نہ چھٹسا۔ہماں کہ پاک پؤج سیکیورتی ائے نام چکا افغانستان او ھند آگو سؤداگری آ خلل ماکھنت،آنہی آ دھشت گردی آژ پاکستان آر پاک کھنغ ائے کھدیں دی کوشست نہ کھزا،ھچھ سرکار آ دی کھدیں لوٹھسا کہ پاکستان دھشت گردی آژ پاک بی تہ آنہی آر سزا ملسا۔گوستی ایں گچین کاری آ تہ پؤج آ تحریک انصاف پارٹی آ سوب مند کھنائینغ ائے ہر کوشست کھُزا ۔مسلم لیگ نواز او پاکستان پیپلز پارٹی ائے حمایت آ اگر ھچھ حوال کار آ چھی اے لکھغ ائے کوشست کھزا تہ آں یرغمال یا دستگیر کھزی آ شزا۔ہمیں مچھیں کوشست آنی پھدا عمران خان سروزیر بیسا تہ صاف ایں ٹؤک انت کہ آں پاک پؤج ائے حلاپ نہ رؤ او اے ٹؤک پاکستان ائے مردم زاناں۔ہمیں خاطرہ عمران آژ گیش امیت نیاں آنہانر۔البت پاکستان ائے حالت آنہاں نی آپا پکر ائے غاں ،پاکستان ائے خرچ آمدنی آژ باز گیش ایں ۔پاکستان آر ہماں کہ عطیہ ملیی آنہی گیشتر بہر قرض ائے سود دئے آ رؤ۔پاکستان ائے وداو ترقی آپا خرچ کھنغ آپا آنہی آگو زر نہ بھچی۔پاکستان ائے پؤج آر ہمیں احساس پھرچھے نعیں کہ ڈن ائے ملکی سرمایہ کاری آپا دھشت گعدی آژ پاکستان آر چھُٹینغ ضروری ایں ،سؤداگری آپا ہمسائیگ ملک آنگو وشتر سیال دار قائیم کھنغ ائے دی ضرورت ایں۔راست تہ اش انت کہ پاکستان ائے یک نہ بلکہ چنتی مسلہ آں ہمائی وجہ پاکستان ائے پؤج ایں پھرچھے کہ وتی طاغت قائیم ایر کھنغ آپا آں مسلہ آنر آسر بی اغ نعے لاں۔بلوچستان اندرا جبری یرغمالی او گار کھنغ یک مزنیں مسلہ بیسا مگہ پؤج آنہی چکا وتی موقف پدھر کھنغ آپا تیار نعیں کہ بلوچستان چکا قوضہ ایر کھنغ آپا بلوچ آنی گار کھنغ ہی پھرچھے ضروری ایں،آنہاں نی دل آر کھٹسؤ دی ہمیں قوضہ ایر کھنغ بیس بی۔