سرگال:پاکستان اندرا حقانی ائے بی اغ آژ انکار چکا داغدار اشرف غنی ائے عمران خان چکا طنز

چھی اے مردم آنی فطرت بی کہ آں ہر اصلیت آژ انکار کھنغ آ وتی سوب مندی مناں ۔ایزا تکا کہ آں روش ائے روژنائی آ روش ائے بی اغ آژ دی انکار کھناں ۔پاکستان ائے پؤجی استیبلشمنت آ پاکستان آ یک اینگے ہی ویچار آنر گیش کھزا کہ ہماں وخت ھچھ اصلیت آ پاکستان ائے علم آ آڑتھی آ رؤ تہ آں یک دم آنہی تردید کھنت ۔مچھیں ثبوت او شواہد یک وٹا او انکار یا تردید کھنغ دوہمی وٹا۔استیبلشمنت آ اینگے ماحول ٹھائینتھا کہ پؤجی سروک آنی پھجی پھجی آ سویلین حاکم دی ہماں زوان آ ٹؤک کھناں او اینگے آ اگہ کھسے راست گُشغ ائے کوشست کھنت تہ آنہی آر دگ آژ گار کھزی آ رؤ۔۲۰۰۸ آ ممبئی چکا ھلگر آ لشکر طیبہ ائے اوار بی اغ او آنہی یک دھشت گرد اجمل قصاب ہماں وخت زینگ دستگیر کھزی آ شزا او اے ٹؤک مچھین جہان اندرا پھیلسؤ شزا وا پاکستان ائے مردم آنر دی ہمیں ٹؤک ائے باور اسا کہ اجمل قصاب پاکستان ائے شہری اسا تہ پاکستان ائے حاکم آں منغ آژ انکار کھزا ایزا تکا کہ پاکستان ائے میڈیا آ پٹ او پھول کھزؤ اجمل قصاب ائے بارو آ مچھیں ٹؤک ،آنہی کنبہ او دمغ ائے بارو آ مچھیں تفصیل پیش کھزا ہماں وخت دی پاکستان آ انکار کھزا ۔مگہ اتفاق آگو ہماں وخت ائے پاکستان ائے قومی سلامتی ائے مشیر آ ہمیں ٹؤک آر منسا کہ کہ آں پاکستان ائے شہری ایں او اے کہ ممبئی چکا ھلگر پاکستان ائے دھشت گرد آں کھزا تہ آنہی آر آنہی عہدہ آژ ہٹائینتھی آ شزا۔افغانستان ائے سرکار او خفیہ ایجنسی مزن ایں عرصہ آژ شکایت کھنغیں کہ پاکستان آ طالبان او حقانی نیٹ ورک ائے واہریائی کھزا او آنہانر جھوک داسئی او ہمیں مردم پاکستان آژ ہی افگانستان چکا ھلگر کھنغ ائے منصوبہ کھناں۔مگہ پاکستان بروبر انکاری ایں ۔طالبان او حقانی ائے ھلگر نی دی جزغاں۔پاکستان ائے گوستی ایں سویلن سرکار آ کم چہ کم اے تہ منسغئے سا کہ پاکستان ائے پؤج ائے دست رکھیائی آگو ہمسائیگ ملک آنی اندرا پاکستان آژ دھشت گرد ھلگر کھنغ ائے منسوبہ کھناں ۔او آنہی چکا عمل دی کھناں ۔مگہ گڈا ہمیں سرکار او آنہی ائے سروزیر ائے چھے حشر بیسا۔اے ہر کھسے زانی ۔اے وخت سویلین سرکار ائے سروکی عمران خان ائے دست آ ایں ۔ایزا تکا کہ عالمی براسی دی زانی کہ عمران خان ائے سروکی آ پؤج ھچھ روک ٹوک آژ بغیر وتی کار کھنغیں او وتی ایجنڈہ چکا عمل کھنغیں۔عمران خان ائے نی ایں یک پیرا آژ آنہی ائے او پؤج ائے ہم خیالی پدھر بیسا ۔سروزیر عمران خان آ یک اینگے ٹؤک گوشتا کہ ہمائی آ اش کھزؤ پؤج ائے سروک جنرل باجوا او آئی ایس آئی ائے سروک ہمیختر وش بیسغاں کہ آنہاں ہماں کہ ٹؤک گوشتا آں پاکستان ائے سروزیر آ دی گوشتا۔مگہ آنہی ہماں بیان چھے استا ؟اصل آ آنہی آ اے گوشتغئے سا کہ حقانی نیٹ ورک پاکستان ائے نعیں او نہ ہی ایزا آژ ھچھ وڑ ائے ھلگر کھنت ۔سبھان اللہ اینگے دعوی تہ وا پاکستان ائے خفیہ ایجنسی آں دی نہ کھزا۔یک وٹا پاکستان ہمیں پکر آ ایں کہ آنہی آر عالمی براسی پریشانی آژ بھچینی تاکہ آنہی اقتصادی حالت وشتر بیس بی آں مگہ دوہمی وٹا دھشت گرد ٹلہ آنی مدد کھنغ آژ دی انکار کھنت ۔عمران خان ائے حقانی نیٹ ورک ائے بارو آ نی ایں بیان ریاکارانہ پالیسی ائے ردین مثال ایں ۔عالمی براسی آ آنہی نوٹس گرغ لوٹھی۔