سرگال:ایف اے ٹی ایف ائے وٹاژ پاکستان آر جون تک ائے مہلت

اگر گچھ ملک وتی چکا جھزی ایں ڈوہ آنر غلط ثابت کھنغ آپا باڑہ ایں تہ آنہی آر سنجیدہ بیسؤ گام زیرغی بی۔آنہی آر وتی گام گیج آنژ ثابت کھنغی بی کہ بے ڈوہ ایں او آنہی بارو آ ہماں دی چھی اے گوشتی آ رؤغیں آنہی آ ھچھ سچائی نعیں ،مگہ آں اگر چھڑوئی آ زوانی دوعوی کھنت او عملی ڈؤل چکا ھچھ دی نہ کھنت تہ آنہی ٹؤک آنی چکا کھسے آر دی باور نوی ۔چھی اے اینگے حالت پاکستان ائے غییں۔پاکستان او دھشت گردی لازم او ملزوم بیسغاں ۔ہموزا ھچھ وختے آ دی دھشت گردی ائے دپ بی آں انگل پاکستان ائے وٹا کھڑو بی ۔ او ہماں وخت پٹ او پھول کھزی آ رؤ تہ ہماں دپ آژ پاکستان ائے بستگی درا بی۔پاکستان ائے دعوی ایں کہ آں دھشت گردی ائے حلاپ ایں او آں وتی سر ڈغار آر دیگر ملک آنی حلاپ ھلگر آنی آپا استعمال کھنغ ائے اجازت نہ دا مگہ بی آنہی بر عکس۔ہمیں وجہ ایں کہ مچھیں جہان آنہی آژ مطالبہ کھنت کہ آں دھشت گردی ائے حلاپ کاروائی کھنت۔ھند مزن ایں عرصہ آژ آنہی آژ مطالبہ کھناناں پھیزاغیں ۔پاکستان گُشغیں کہ ھند آنہی پھجی آ گپتران ائے بنگیج کھنت مگہ ھند ائے موقف ایں کہ دھشت گردی او گپتران یک پھجی آ اگا نویس بی آں۔اگر پاکستان گپتران ائے حق آ ایں تہ آنہی آر لوٹھی کہ آں ماحول آر وشتر کھنت ۔او ماحول ہماں وخت وشتر بیس بی ہماں وخت آں دھشت گردی آ آسر کھنغ آپا گام گیج کھنت۔چھڑوئی آ جہان آ اے پھیدھارغ آپا کہ آں دھشت گردی ائے حلاپ ایں آنہی آژ ھچھ نوی۔نی تکا آنہی آ ہمیں محاز چکا ہماں دی چھی اے کھزا آں چھڑوئی آ پھیدھارغ آپا ہی ایں اصلیت آ نعیں ہمیں سبب ایں کہ جہان آ آنہی چکا باور نعیں ،جہان آ دھشت گرد آنی مالیاتی واہریائی آ دارغ آپا پیرس آ قائیم ادارہ ایف اے ٹی ایف آر دی آنہی ٹؤک آنی چکا باور نعیں۔ہمیں وجہ ایں کہ آنہی آ پاکستان آر گرے لسٹ آ ماکھزا۔آنہی مطالبی ایں کہ آں دھشت گردی ائے حلاپ کاروائی کھنت او دھشت گرد ٹلہ آنی مدد بند کھنت۔اگر آں اینگا کھنغ آ ناسوب بیسا تہ آنہی آ بلیک لسٹ آ ماکھُزی آ رؤ۔ایف اے ٹی ایف ائے وٹاژ شچھ دی ملک آر بلیک لسٹ کھنغ ائے مطلو اش انت کہ ہماں ملک ائے نہ تہ کھسے ملک مدد کھز کھنت او نہ ہی ادارہ۔آنہی آ جہانی ایں بینک آژ دی قرض ملس نوی۔اے وخت ایف اے ٹی ایف ائے یک اجلاس پیرس آ جزغیں ہمائی آ ہمیں مسلہ چکا ویچار کھزی آ رؤغیں ۔پاکستان آر گوشتی آ شزا کہ آں جون آ بی اغ والا ایں اجلاس آژ سرا مچھیں دھشت گرد ٹلہ او تنظیم آنی حلاپ کاروائی کھنت او آنہانر سزا دیائینی او آنہی آ ہماں کہ عودہ کھزغاں آنہی آ پھیلو کھنت۔اگر جون آ بی اغ والا ایں اجلاس آژ پیشا آنہی آ ایف اے ٹی ایف آ مطمئین نہ کھُزا تہ آنہی آ بلیک لسٹ کھزی آ رؤ او آنہی آر بھچینغ والا کھسے دی نوی۔نہ چین او نہ سعودی عرب ۔ترکی آ السؤایف اے ٹی ایف ائے مچھیں باسک ملک آں پاکستان چکا زور ماکھُزا کہ آں ایف اے ٹی ایف آژ کھزی ایں باقی مچھیں سیزد وعدہ آنرپھیلو کھنت۔اگر آں اینگا نہ کھنت تہ آنہی آ نتیجہ دیما کھنغ آپا تیار رہغ لوٹھی۔