سرگال:پاکستان ائے ایف اے ٹی ایف ائے گرے لسٹ چکا برقرار رہغ ائے گمان

دھشت گرد ٹلہ آنی مالیاتی مدد او منی لانڈرنگ ائے حوالہ آژ پاکستان ائے بارو آ مروشی ایف اے ٹی ایف وتی فیصلہ اش کھنائینغ والا ایں ۔گیر بی کہ فائینائینشل ٹاسک فورس آ پاکستان آ ھکل داسغئے سا کہ اگر آنہی آ فروری تکا دھشت گرد ٹلہ آنی مالیاتی واہریائی چکا پابندی جھنغ او آنہاں نی حلاپ سخت ایں کاروائی کھنغ ائے نشانہ پھیلو نہ کھُزا تہ آنہی حلاپ سخت ایں کاروائی بیس بی او آنہی آر گرے لسٹ آژ بلیک لسٹ آ اوار کھُزی آ برؤ ۔پیرس آ ایف اے ٹی ایف ائے پلینری بیٹھک کے ای روش سرا بنا بیسغئے سا او مروشی آسر بیسا۔پاکستان آ ہمیں بارو آ مزن ایں پھیمانہ چکا کوشست کھُزا کہ آں بلیک لسٹ آ اوار بی اغ آژ بھچی ۔آنہی سنگت ملک چین اے وخت عالمی واچ ڈاگ ائے سروک ایں ہمیں خاطرہ چین او باز دیگر ملک آنی حمایت گتؤ پاکستان آ مزن ایں پھیمانہ لابنگ کھُزا ۔اندری ایں پاکستان حافظ سعید او آنہی منغ والا آنی حلاپ چھی اے عدالتی او قانونی کاروائی دی بیسغاں ہمائی مقصد ہمیں اسا کہعالمی براسی او ایف اے ٹی ایف ائے باسک ملک آنی اندرا اے پھیغام رؤ کہ پاکستان آ اصل آ سنجیدہ ایں کاروائی کھنغیں۔بہر حال اے وخت حالت اش انت کہ ایف اے ٹی ایف ائے انتر نیشنل کو آپریشن ٹلہ آ گوستی ایں سئے شمبھے آ اے سفارش کھزغئے سا کہ چوش کہ پاکستان آ ۲۷ ٹک آنی ایکشن پلان ائے نشانہ تنک پھیلو نہ کھُزا ہمیں خاطرہ آنہی آر گرے لسٹ آ برقرار ایر کھزی آ رؤ۔گڈا دی آخیری ایں فیصلہ آئیغ باقی ایں او امیت ایں کہ مروشی آنہی جار ایف اے ٹی ایف ائے وٹاژ جھزی آ رؤ ۔حبر ایں کہ ایف اے ٹی ایف ائے باز باسک ملک ہمیں ٹؤک ائے حق آ نیاہ آتخغاں کہ پاکستان چکا ہمیں ٹؤک آپا زور ماکھزی آ رؤ کہ آں دھشت گرد ٹلہ آنی عمل آنی چکا نیاہ ایر کھنت او آنہاں نی چکا پابندی جھنغ ائے نہ چھڑوئی کوشست کھنت بلکہ بلکہ ایف اے ٹی ایف ائے ھدایت ائے روگا آنہی آر ہماں مچھیں کاروائی کھنغ لوٹھاں ہمائی ائے کہ آنہی آر نشانہ پھیلو کھنغ آپا گوشتی آ شزا۔خاصیں بھیرا ہماں ٹلہ آنی حلاپ کاروائی کھنغ ضروری ایں ہماں ہانر اقوام متحدہ ائے زریعہ خطرناک عالمی دھشت گرد منسی آ شزا۔ایف اے ٹی ایف ائے پلینری بیٹھک مروشی آسر بی غیں او مروشی ہی پاکستان ائے بارو آ ھچھ فیصلہ ائے دی امیت ایں ۔پلینری آژ سرا بیجنگ آ ایف اے ٹی ایف ائے آسیا پیسیفک گروہ ائے دی بیٹھک بیسغئے سا ہمائی آ پاکستان ائے وٹاژ کھنغ والا ایں گام گیج آنی جائیزہ گتی آ شزا ۔آنہی آژ اے کل بیسغئے سا کہ پاکستان آ ۲۷ ٹک آنی ایکشن پلان ائے بارو آ سرا ائے مقابلہ چھی اے گیش ٹک آنی احاطہ کھزا،یعنی گوستی ایں رپورٹ ائے روگا ہموزا آنہی آ چھڑوئی آ پنچ ٹک آنی چکا ہی کار کھزغئے سا ہموزا نی ۱۴ ٹک آنی نشانہ پھیلو کھُزیئ۔بہر حال مروشی ہمیں بارو آ آخیری ایں فیصلہ آئیغ ائے امیت ایں۔