سرگال:تاریخ ائے یک ناوشیں وخت آژ گوزغ والا جہانی براسی

مڑدمی تاریخ آ نی تکا باز چھی اے دیستا چنتی وشیں او ناوشیں دپ آنژ جہانی تہزیب گوستا۔جہان آ چنتی جنگ دیستغاں ۔وا گوستی ایں سدی یعنی بیستمی صدی آ دی عالمی ایں تاریخ آ دو مزنیں مڑائی دیستغاں او گوستی ایں صدی آ ہی اسپینش فِلو نام ائے ناجوڑی آ دی جہان ائے کروڑو مڑدم آنی زند گتغئے سا نی بیست او یک می صدی ائے بیستمی سال این ۲۰۱۹ ائے آخیر آ کورونا وائیرس ناجوڑی چین ائے شہر ووہان آژ بِنا بیسغئے سا ہمائی آ کرا کرا مچھیں جہان آ وتی لپیٹ آ گتا ۔اینگے حالت آ مایوسی ناامیتی پیدا بی اغ یک فطری ٹؤک انت مگہ ہمیں ناجوڑی آ ہمیختر مایوسی او بےباوری ائے حالت اقوام متحدہ آ پیدا کھزا آنہی مٹ تاریخ آ دوہمی نہ ملی ۔نی تکا مچھیں جہان آ کم او پیش ساڈھو ایں سئے لکھ مڑدم ہمیں ناجوڑی آژ مڑتھغاں او ہمیں سلسلہ تنک جزغیں ۔ہر وٹا بے باوری ائے ماحول ایں ۔جہان ائے چنتی ملک آنی اندرا لاک ڈاؤن ائے فیصلہ کھزی آ شزا ۔مگہ ہمیں سلسلہ دی جہان ائے چھی اے ملک آنی اندرا سوب مند بیسا ڈاغدار او طبئی زانتکار روش او شف ہمیں کوشست آ مان آں کہ ہمیں ناجوڑی ائے ھچھ درمان ایجاد کھنغ بیس بی ہمائی آژ جہان ہمیں ناجوڑی آژ چھُٹی تجربہ بی غاں ۔مچھیں جہان ائے طبئی تجربہ گاہ آنی اندرا پٹ او پھول جزغیں ۔چھی اے کہنیں وبائی ناجوڑی آنی درمان آنی دی نوخیں ڈؤل آژ تجربہ کھزی آ رؤغیں۔جہانی ایں درائی تنظیم ڈبلیو ایچ او دی مچھیں ٹؤک آنی چکا نیاہ ایر کھزی ایں او ضروری ھدایت دی دئے غیں مگی تنک ھچھ دی حتمی نتیجہ دیما نیاتکا ۔ہمیں ناجوڑی چکا قابو کھنغ آپا سماجی سطح چکا دیری ایر کھنغ او مچھی والا ایں جاگاہ آنژ روغ آژ بھچغ او دیگر اینگے گام آنر ضروری منسی آ شزا۔اے ضروری دی استیں چوش کہ آنہی ائے باز ناوشیں ٹک دی گندغ آ ملغاں ہمیں مچھیں گام آنی اثر مڑدمی زند چکا دی عجیو ایں بھیرا اثر مان آغیں مشکل آژ مشکل وخت آ دی مڑدم وتی سیالداری آر نبھا کھنت مگہ ہمیں ناجوڑی آ مڑدمی جزبہ آنر دی آسر بی اغ آپا لاچار کھزؤ اشتا ۔مثال آ یک مثال ہمیں گندے کہ ڈچ ائے سر وزیر آ لاک ڈاؤن آ جھزی ایں پابندی آنی وجہ آژ وتی آخیری ایں ساہ گرغ والا ایں وتی پھیرنڈ ماس ائے آخیری ایں دیدار آژ دی محروم رہسا ۔آنہی ماس یک کئرہوم آ داخل اسا او اتفاق آگو ہمیں ناجوڑی آ آنہی آ وتی لپیٹ آ گتا چوش کہ ڈچ سروزیر ائے ماس آ ہمیں ناجوڑی نیا مگہ ھچھ دی دری ایں مڑدم آر کیئر ہوم آ روغ ائے اجازت نیا قانون تی قانون بی ہمیں خاطرہ سروزیر آر دی ہمیں قانون آ منغی بیسا او ہمینگا آں وتی ماس ائے آخیری ایں دیدار او آخیری ایں رسوم آژ محروم بیسا ۔ہمیں ماحول آ مچھیں جہان آ عید دی منائینتھی آ شزا مڑدم آں وتی عید ائے نماز وتی لوغ آنی اندرا ہی ادا کھُزا نہ تہ ھچھ تقریب بیسا او نہ ہی مڑدم وتی سنگت وتی سیاد آنگو ملسغاں ۔اینگا مان کھائے کہ کرونا ائے وبا زند آر مٹینی گڈا دی امیت ایں کہ روژنائی ائے کرن پدوارغ پدھر بی مارا ہمیں کرن ائے باز بے سوری آگو انتظار ایں۔