سرگال:نیپال ائے آئینی بدلاؤ چکا گپتران ماتل کھنغ ائے فیصلہ

ھند او نیپال ائے نیمگا ۱۷۵۰ کلو میتر دراژ دراژ ڈغاری سیماں ایں ۔ھند ائے پنچ ریاست سکم،رونشت بنگال،بھار،اتر پردیش او اتراکھنڈ ائے سیماں نیپال آژ ملاں ۔ہمیں سیماں آنژ بازی آتر ائے تعین ۱۸۱۶ آ ایسٹ انڈیا کمپنی او نیپال ائے شاہی عدالت ائے نیمگا بیسغیں سنگولی منغ نامہ ائے روگا کھزی آ شزغئے سا ۔ہمیں منغ نامہ ائے روگا نیپال ائے جاگاہ مہاکالی یا کالی ندی ائے رودرات تکا محدود اسا ۔گڈا دی نیپال آ نی ایں روش آں ہماں کہ نقشہ خھط جاری کھزا آنہی آ مہاکالی ندی ائے رونشت آ کالا پانی لمپیا دھرا او لیپو لیکھ ائے ۴۰۰ کلومیتر ائے جاگاہ آر وتی جاگاہ منسا ،درگتہ کہ اصلیت اش انت کہ ہماں منغ نامہ ائے روگا اے جاگاہ ھند ائے غیں۔کھٹمنڈو ائے دعوی اش انت کہ چوش کہ ہمیں جاگاہ کالی ندی ائے یک مزنیں بہر ائے رودرات آ ایں ہمیں خاطرہ آں نیپال ائے غیں ہمیں دعوی ہمیں اصلیت ائے باوجوت کھزی آ رؤغیں کہ گوستی ایں یک سد او پنجہ سال آنژ ہماں کہ نقشہ خط گندغ آ ملسا او ہماں کہ جائیزہ پیش کھزی آ شزغاں آنہی آ ہمیں ٹؤک ثابت کھزی آ شزا کہ ہمیں علاقہ کالی ندی ائے رونشت آ ایں ہماں کہ ھند ائے بہر ایں۔ہمیں علاقہ ھند آژ نیپال او چین آژ مان سیماں ائے نزیخ ریاست اتراکھنڈ آ ایں او کیلاش مانسروور یاترا آپا روغ والا ایں ھند یاتری سرا آژ ہمیں دمغ آژ بیسؤ رواں ۔کیلاش ائے چوٹی او مانسروور تکا روغ والا ایں یاتری آنر باز مشکل دیما کھنغی بی آں ہمیں خاطرہ ہمیں سفر آ آسان کھنغ آپا ھند آ توا گھاٹ او لیپو لیکھ ائے نیمگا یک پکوں ایں سڑک ٹھائینتھا ہمائی بنگیج ھند ائے دپاع ائے وزیر راج ناتھ سنگھ ہمیں سال اپریل آ کھزا ۔سڑک ائے بنگیج آ پھدا یک دم نیپال ائے ناوشی دیما آتکا او آنہی آ گوشتا کہ اے سڑک نیپال آژ گوزی او نوخیں دلی آژ اپیل کھزئ کہ آں تعمیر ائے کار آنر داری۔آنہی چند روش پھدا یعنی ہژدہ میئ آ نیپال ائے کابینہ آ ملک ائے یک نقشہ خط آ منظوری داسا ہمائی آ نیپال ائے جاگاہ آر لمپا دھرا تکا ودھینتھؤ پھیدھارتھی آ شزا ۔نوخیں نقشہ نیپال ائے سروزیر کے پی شرما اولی ائے وٹاژ نیپالی پارلیمان آ جاری کھزی آ شزا۔ہمیں موقع چکا آنہی آ جار جھزا کہ نیپال ائے جاگاہ آنر گڑدینغ ائے ہمیں یک جائیز کوشست ایں ۔نیپال ائے ہمیں عمل چکا ھند آ ناوشی پدھر کھزؤ کھٹمنڈو آژ اپیل کھُزا کہ آں ہمیں بھیرئے یک وٹی ایں کاروائی آر بند کھنت او ھند ائے جاگاہی سالمیت ائے احترام کھنت ۔او آنہی پھجی آ اے امیت دی پدھر کھزی کہ نیپالی سروک باقی دیگر سیمائی مسلہ آنر حل کھنغ آپا سفارتی گپتران آپا شر ایں ماحول پیدا کھنت۔زکر ائے لائیق اش انت کہ ہڑ دوکین ملک آنی نیمگا سیال داری تاریخی ایں ہڑ دوکین آنی ثقافت یک ڈؤل ائے غیں او دوایں ملک آنی عوام ائے یک دوہمی آگو بستگی انت ۔ہڑ دوکین ملک آنی نیمگا معاشی سیال داری دی مضبوط انت ہمیں خاطرہ اینگے وخت آ ہماں وخت کہ مچھیں جہان کرونا ناجوڑی آ دیما کھنغیں او وا نیپال او ھند آر ہمیں وبائی ناجوڑی آژ باز مشکل دیما ایں عوام ائے پریشانی آنر دیر کھنغ آپا ہڑ دوکین ملک آنر ملسؤ کار کھنغ ائے ضرورت ایں ۔نیپال ائے نوخیں نقشہ خط ائے بارو آ یک خاصیں ٹؤک اش انت کہ اے ہماں کہنیں نقشہ خط آژ بالکل جتا ایں ہماں کہ ملک ائے آئین آ موجوت انت۔ہمیں خاطرہ نوخیں نقشہ خط آ قانونی دیم دئے آپا آئینی بدلاؤ ضروری ایں ۔