نی ھمانگہ کہ افغان سرکار ائے صدارتی گشین کاری آژ رندا باقاعدہ سرکار جوڑ بیسؤ شزا تہ امیت کھزی آ روغ بائید این کہ ھماں سیاسی بحران پیدا بیسؤ شز غئے سا آنہی ائے ناوشین یاد دیر ببی آں رواں او نوخیں سرکار باز شریں نمونہ آگو ھمیں مڑائی ائے رزغ اندرا آتکغیں ملک اندرا سرکار ائے نظام آر سنبھالی۔دراصل ھمیں سیاسی بحران ھمیں واسطہ پیدا بیس غئے سا کہ صدارتی عہدہ ائے دو مستریں امیت وار ھماں یکھ دوھمی ائے دیما جکھزی ائے ساں،آں گشین کاری ائے نتیجہ آین بارو آ دو جدا جدائیں سلاہ داروخ ساں۔ڈاغدار اشرف غنی ائے اے دعوہ آ کہ نتیجہ آنہی ائے حق اندراں جبکہ ڈاغدار عبدالہ عبدالہ ھمیں ٹوک آگو ھم صلاح نویسغاں۔ آں ھانی اے دعوہ آ کہ آنہی وٹ گران ایں۔ھمیں شش او پنج اندرا باز وخت تاںوان بیسؤ طزا او سرکار سازی اندرا باز دیر بیسا۔حیر ھڑدوں دھر آین نیاما ھمیں سمجھوتہ بیسا کہ ھڑدوں یا ھند بیسؤ سرکار جزیناں۔ڈاغدار غنی پیسر واجھا صدر باں جبکہ ڈاغدار عبدالہ قومی مصالحتی کونسل ائے سروک باں۔افغانستان اندرا اے ویلا ھماں کہ کھل آنژ گیش مزائیں مسلہ دیمئیں ھماں اشیں کہ طالبان آنگوں گپ و حور ائے معاملہ آر چھوئیں طریقہ آگو اگا بڑتھی آ برؤ تاکہ قومی پیمانہ سرا افغانستان ائے آؤخیں وخت بارو آ سیاسی خاکہ جوڑ کھزی آ شز بی ھماں ھی اندرا دراژیں بھر ائے نمائندگی کھزی آ شز بی۔۱۹۹۶ آژ ۲۰۰۱ تکا کابل سرا طالبان آنی قوضہ آ ھماں ھی آر ھچھ دی اعتبار آگو افغان مخلوک ائے سرہکی کھنوحیں سرکار گوشتی آ شز نویسسا۔ ھما وخت آ مڑدمی حق او حرمت ائے مزائیں پیمانہ سرا بے حرمتی بیس غئے سا۔یکھ سکھیں نمونہ داروخیں چھڑوئی آ نام آپا مذھبی نضام جوڑ کھزی آ شز غئے سا ھماں اسلام ائے اسپرٹ ائے رو آ نیا۔حیر ۲۰۰۱ ائے آخر آ طالبان سرکار آتکؤ ڈگار سرا کھتا او امریکہ ائے سروکی بنا ھموزا نیٹو ائے اتحادی فوج نشتی ائے ساں۔طالبان سرکار ائے کھوغ آژ رندا طالبان سروکی آ پاکستان اندرا شزؤ پناہ گتا او ھموزاژ آں ھانی منصوبہ بندت بیس سا۔حالانکہ پاکستان سرکاری طور سرا امریکہ ائے اتحادی آ لیکن پاکستان ائے فوجی ادارہ او طالبان آنی نیاما باز پکوئیں سیالداری ساں۔طالبان پاکستان ائے ڈغار آژ امریکہ ائے سروکی والائیں فوج سرا حملہ آنی منصوبہ بندی کھز سا۔ امریکی سروکی آ افغانستان آژ غڑدغ ائے منصوبہ بندی شروع کھزا۔ھچھ شش سال پیشا امریکی فوج آنی مستریں کچھ تہ افگانستان آژ گڑتھؤ شزا لیکن یکھ خاصیں کچھ سراتکؤ شزا تاکہ ضرورت کھوغ وخت آ افغان سلامتی فوج آر بھڑائی داسی آ شز بی۔
Comments
Post a Comment