سرگال:عمران خان پیشا او نی

پیسر ائے کرکٹ کپتان او پاکستان ائے نی ایں سروزیر نی آژ کم او بیش دو سال پیشا ۲۰۱۸ آ سروکی آ آتکغئے سا۔پؤج او ایجنسی آنی واہریائی آگو سروزیر بی اغ والا عمران خان سروکی آ آئیغ آژ پیشا اپوزیشن ائے مزنیں لیڈر اسا او گچین کاری آژ سرا آں وضہار سجوں آنژ مزنیں جمہوریت پسند ایماندار لیڈر او بدعنوانی ائے حلاف جہادی سیاستزانتکار بی اغ ائے دعوی کھُرت ۔آں وتی گچین کاری ائے گشتانگ آ نوخیں پاکستان ٹھائینغ ائے وعدہ کھُرت ۔عمران خان سجوں آنژ گیش زور بدعنوانی آ آسر کھنغ او وتی پیشرو سیاستزانتکار آنی حلاپ مہم جزینغ چکا داسا آنہی ائے ہمیں وعدہ دی اسا کہ بدعنوانی آگو ہماں بی ایمان مڑدم آں ڈن ائے ملک آ مزنیں زر جوڑ کھزؤ ایر کھزغاں آنہی آ آں سروکی آ آئیغ ائے دو ماہ آنی اندرا گڑدینیتھؤ پاکستان کھاری۔آنہی روگا ہمیں بھیرا ڈن ائے ملک آ پاکستان ائے ۲۰۰ بلین ڈالر بجھسی آں۔گڑدینغ آ پھدا سد بلین ڈالر ائے زر آنگو پاکستان ڈن ائے ملک آنی قرض گڑدینی او باقی سد بلین ڈالر غریو آنی مدد آپا خرچ کھنت۔صاف ایں کہ ہماں وخت کھسے لیڈر وتی جمہوریت پسندی او ایمانداری ائے ہمیختر مزنیں پھیمانہ چکا دعوی کھنت تہ مڑدم ہماں تعلق آژ آنہی عمل او پس منظر یا دیگر لپظ آ آنہی ائے کریڈنشیل آ دی اصلیت ائے دیم دئے اغ آ باڑہ بی آں ۔ہمیں خاطرہ پاکستان آ نی آنہی وعدہ آنر یات دیائینتھؤ مڑدم آنہی آژ سوال پھول کھنغاں ،جتا شعبہ آ آنہی عمل آنی جائیزہ گتی آ رؤغیں او چوش کہ تھڑس ائے ماحول ایں مگہ آنہی باوجوت سخت سوال کھزی آ رؤغاں ۔ایزا چھڑوئی آ ہماں ٹؤک آنی زکر کھزی آ رؤ ہماں کہ عمران خان بدعنوانی ائے حلاپ مہم جزینغ ائے حوالہ آژ کھُرت۔پاکستان ائے ممتاز حوال کار ،سیاستزانتکار آں بے تھڑس بیسؤ آنہی ائے گوستی ایں دو سال آنی کار کردگی ائے زکر کھنغ بِنا کھزا۔پاکستان ائے ممتاز سیاستزانتکار او پیسر ائے سینیتر فرحت اللہ بابر آ وتی یک نی ایں پیرا آ گوشتا کہ وتی ڈن ائے ملکی دؤرہ آنی نیمگا دی عمران خان وتی پیشرو سیاستزانتکار آنی حلاپ سخت ایں لپظ گُشغ آژ باز نویس مثال وتی چین ائے دؤرہ ائے نیمگا آنہی آ گوشتغئے سا کہ آں موک خوری آگو مڑغ آپا چینی ماڈل اختیار کھنت او کم چہ کم ۵۰۰ موک خور مڑدم آنر جیل آ ماکھنت۔عمران خان ائے چھڑوئی آ نام آپا موک خوری ائے حلاپ مڑائی ائے اصلیت اش انت چنتی پاکستانی زانتکار آنی گشغ ایں کہ پاکستان آ ہماں وخت تکا پؤج ائے بالادستی ایں او آنہی آ جوابدہ نہ کھزی آ شزا ہماں وخت تکا ایزا ھچھ بدلاؤ نوی۔