سرگال:امریکہ آ ردین حالت۔بازمزنیں شہر آنی اندرا کرفیو

امریکہ آ نسلی نفرت ائے حلاپ احتجاج ائے مزنیں سخت گواس نیاہ پھیزاغیں ۔احتجاج چھی اے ہمیختر مزنیں پیمانہ چکا بیسا کہ کے ای روش آنژ ہمیں سلسلہ جزغیں او شہر شہر آ یک طوفان کھڑو بیسا۔ہمیں مچھیں احتجاج ائے وجہ ایں یک سیاہ پوست امریکہ ائے شہری جارج فلائیڈ آ یک بگا ایں پوست امریکہ ائے پولیس والا آ باز بے دڑدی آگو کُشتا ۔امریکہ جہان ائے سجوں آنژ گیش زور والا ملک ہی نعیں بلکہ جہان ائے سجوں آنژ کہنیں جمہوریت دی ایں ہموزا آئین آ بالا دستی ایں او ہموزا ہر مڑدم ائے مڑدمی حق آنی گارنٹی ایں ہمیں خاطرہ ہمیں بھیرئے دپ آنی چکا احتجاج کھنغ یک ھزائی امر ایں ۔بلا گمان احتجاج باز مزنیں پیمانہ چکا بیسا او سیاسی دھُر آں یک دوہمی چکا الزام جھنغ دی بِنا کھُزا ۔جمہوریت آ باز جُانائی آنگو چھی اے ڈھلائی دی استاں ہمائی آ یک ہمِش ایں کہ ہموزا ھچھ ٹؤک چکا معمولی ناوشی پیدا بی تہ آنہی آ ہماں مسلہ آ سیاست آگو جوڑسی آ رؤ۔او یک دوہمی چکا الزام جھنغ ائے سلسلہ بِنا بی رؤ ۔چوش کہ ہمیں سال امریکہ آ صدارتی گچین کاری دی بی اغ والا ایں ہمیں خاطرہ ہمیں احتجاج آ سیاسی دیم دئے ائے کوشست کھزی آ رؤغیں۔صدارتی گچین کاری نومبر ائے ماہ آ بی۔اپوزیشن آ سرکار ائے حلاپ یُرش کھنغ ائے موقع مِلسا ۔مگہ سیاسی ٹؤک آنژ دیر یک اصلیت اے دی ایں کہ عوامی احتجاج آژ چھم چھرینغ نویس بی ۔جمہوری ملک آ ہمیں ڈؤل ائے دپ آنی چکا احتجاج تہ بی ۔پولیس ائے کاروائی آ ھچھ ڈؤل آژ دی جائیز منغ نویس بی۔ہمینگا کہ سرا دی گوشتی آ شزا کہ جمہوریت آ چنتی جُوانائی آنگو باز چھی اے ڈھلائی دی استیں ہمیں خاطرہ جمہوری سیاست آ باز ردین ویچار آنی بنشت چکا باز جماعت عوام ائے جزبہ آنر تیش دیائینغ بنا کھنت ہمائی ائے سماجی سطح چکا منفی پھیغام رؤ۔سرکار ائے منغ والا دھُر آنی چنتی عنصر اینگے دی بی آں ہماں کہ سرکار ائے وشنودی آپا سرکار ائے حلاپ دھُر آنی دل آزاری کھناں ۔غلط یا راست صدر ٹرمپ ائے یک عکس اے دی دماغ آ ٹھعیسؤ شزا کہ آں جارحانہ قوم پرستی ائے ثبوت دئے اغ آپا عوام ائے جزبہ آنژ لیو کھنت۔چوش کہ جمہوریت آ آئین او قانون آ بالادستی ایں مگہ باز سیاستزانتکار آنی ردین پالیسی آنی وجہ آژ اکثریت او اقلیت ائے نیمگا ناوشی پیدا بیسا۔جمہوریت آ احتجاج تہ بی اغ لوٹھی مگہ آنہی آ تشدد ائے جاگاہ نوی۔امریکہ آ ہماں کہ احتجاج بی غیں آنہی آ تشدد ائے حبر دی ملغاں ۔اے نویاغ لوٹھی۔امریکہ ائے سرکار ائے زمہ واری ایں کہ آں طاغت ائے کھمیں استعمال کھزؤ ہمیں آس آ تھوسینغ ائے کوشست کھنت او اینگے غلط کار اپسر او سرکار آژ جڑسی ایں اپسر آنر اے احساس دیائینی کہ آں اینگے ھچھ دی کار نہ کھناں کہ ہمائی آژ نسلی تعصب بی او مچھیں معاشرہ اندرا اینگے آس پیدا بی کہ ہمائی چکا قابو کھنغ دی مشکل بی رؤ۔