سرگال:پاکستان آ دستگیر بیسغیں مڑدم آنی چکا ظلم ائے حلاپ بِل

ظلم او جبر یک اینگے لعنت ایں ہماں کہ جتا ملک او معاشرہ اندرا قدیم زمانہ آژ جزغیں ۔مڑدمی تہزیب ائے ارتکا ائے پھجی پھجی آ چھی اے بدلاؤ ضرور نیاہ آتکا مگہ اے دی راست ایں کہ ظلم او جبر آ گیش کھنغ والا عنصر ہر دؤر آ وتی زلم او جبر کھنغ آپا دگ پھولسا ،نوخیں زمانہ آ دی حاکم آنی سرشت آ ہمیں بھیرائے ٹؤک اوار آں ۔حد تہ اش انت کہ جمہوریت ائے وخت آ دی قانون لاگو کھنغ ائے ادارہ ھچھ ڈوہی ائے ڈوہ ثابت کھنغ آپا آنہی چکا ظلم او جبر کھزؤ آنہی آژ وتی مطلو ائے ٹؤک کشائیناں او گڈا عدالت آ وتی ٹؤک آنر ثبوت او شواھد کھزؤ پیش کھناں۔نی آژ سی او سی سال پیشا اقوام متحدہ آ بیست او شش جون نوزدہ ہشتاد او ہپت آ ظلم او جبر آ مچھیں ڈؤل آگو غیر قانونی منسغئے سا او آنہی آ مڑدمیت ائے حلاپ ڈوہ منسغئے سا ۔مگہ جہانی ایں ادارہ ائے زریعہ ہمیں لعنت آر غیر قانونی او مڑدمیت ائے حلاپ ڈوہ منغ آ پھدا دی چنتی مڑدم آنہی آ ڈوہ نہ مناں ۔پاکستان ائے سوشل میڈیا چکا نی ایں روش آں ہمیں ٹؤک ائے چرچہ ایں کہ۔ہمیں چرچہ ہمیں خاطرہ بِنا بیسا کہ پاکستان پیپلز پارٹی ائے یک سروک شیریں رحمن آ پارلیمان آ یک بِل پیش کھُزا ہمائی مقصد پاکستان آ دستگیر بیسغیں ڈوہی آنی چکا بی اغ والا ایں جبر آ دارغ اسا۔ایزا ہمیں ٹؤک ائے زکر راست بی کہ ۲۰۱۷ آ پاکستان آ اقوام متحدہ آ اے رپورٹ پیش کھزغئے سا کہ پاکستان آ ہمیں بھیرئے ظلم او جبر مچھیں ڈؤل آگو آسر بیسا او اے وخت ملک آ اینگے ھچھ دی مثال نعیں ۔مگہ اصلیت آنہی ائے برعکس اسا۔ہماں سال یک ہزار بیست او چھیار اینگے دپ آنی ریکارڈ موجوت اسا ہمائی آ دستگیر بیسغیں ڈوہی آنی چکا ظلم کھزی آ شزغئے سا او آنہانژ جبرن وتی ٹؤک منائینتھی آ شزغئے سا ۔ہمیں سیاحیں کارنامہ پولیس یا سرکار ائے ھچھ دیگر ایجنسی آ کھزغئے سا ۔اشی آژ سرا دی اینگے چنتی دپ اساں ہمائی آ ھچھ دی قانون ائے پاسداری نہ کھزی آ شزغئے سا ۔پیسر ائے پؤجی سروک جنرل پرویز پشرف آ سئے سد او شستاو نوہ بندی آنر سدھائی آ امریکہ ائے حوالہ کھزغئے سا ۔آنہی چکا انگل دی کھڑو بیسغئے سا کہ آنہی آ وتی سیاسی مخالف آنر دھشت گرد منسؤ امریکہ ائے حوالہ کھزغئے سا۔ہمیں سلسلہ نی دی جزغیں او نی دی قانونی ادارہ ظلم او جبر آگو بندی آنر وتی ڈوہ قبول کھنائینغ آپا لاچار کھناں ۔دین ائے بے حرمتی ائے قانون دی یک اینگے ہی قانون ایں ہمائی بُنا ڈوہی آنر اے موقع دی نہ داسی آ رؤ کہ آں وتی بے گواہی آر ثابت کھُز کھناں ۔پاکستان ائے یک عیسائی زائیف آسیہ بی بی آر دی ہمیں قانون ائے بُنا ہماں وخت یک بُنی ایں عدالت آ پھاہو ائے سزا اش کھنائینتھغئے سا او پنجاب ائے گورنر سلمان تاثیر آ آنہی مدد کھنغ ائے کوشست کھزغئے سا او ہمیں قانون آ بدلاؤ ائے مطالبہ کھزغئے سا تہ آنہی رکھو آ ہی آنہی آر تیر جھزؤ کُشتا ۔ہمیں پس منظر آ شیری رحمن آ پارلیمان آ یک بل پیش کھزغئے سا تاکہ ہمیں جھیڑوئی قانون آ مناسو بدلاؤ کھزی آ برؤ مگہ بل آپا ھچھ دل لوٹھی نہ پھیدھارتھی آ شزا نتیجہ اے درا بیسا کہ ٹؤک اگا نہ ودھسا ۔اینگے ماحول آ اے امیت تھانگا بیس بی کہ اذیت او ظلم او جبر ائے ہمیں سلسلہ بند بی۔