سرگال:آر ایس ایف ائے دری ایں ملک آ نندوخیں حوال کار آنی بارو آ پاک میمو سرا وزت پھیدھار

حوال کار آنی خیال داری کھنوخیں عالمی ایں تنظیم رپورٹر ود آآٹ بارڈر (آر ایس ایف) آ دری ایں ملک آ مشتی ایں شش حوال کار آنی بارو آ پاکستان ائے سلامتی واگ داروک آنی یک مخفی چھٹی سرا مزن ایں وزت پھیدھارتھا۔آر ایس ایف آ وتی پیرا اندرا گوشتا کہ پاکستان ائے اندری ایں وزارت ائے یک مخوی میمو ہژدہ جون آ لکھسی آ شزغئے سا او ہمیں چھٹی اندرا یورپ او امریکہ اندرا نشتی ایں یک افغان پنچ پاکستانی حوال کار آنی مبینہ پاکستان مخالف کار بار آنی سرا وزت پھیدھارتھی آ شزا۔ہمیں ہڑ ششیں مڑدم آنی سرا الزام جھزی آ شزا کہ آں عالمی زرائیع ابلاغ اندرا ریاست مخالف مواد چھاپائیناں۔ہمیں واسطہ آنہاں نی آئیغ روغ ،آنہاں نی سوشل میڈیا اکاؤنٹ سرا ہیڑتھیں نیاہ ایر کھنغ ائے ضرورت ایں ۔پاکستانی اندری ایں وزارت ائے وٹاژ جاری کھزغیں چٹھی اندرا ہمیں دیگر ھدایت آں کہ آنہاں گو رسمی ایں ڈؤل چکا رابطہ کھزؤ گوشتی آ شز بی کہ آں آؤخیں روش آں پاکستان ائے حلاپ گپ آنی جنغ آر بند کھناں ۔آر ایس ایف آ سلامتی آپا ہمیں ہڑ ششیں حوال کار آنی نام دیما نیاڑتھغاں۔گُڈا دی آر ایس ایف ائے روگا ہمیں میمو پاکستان ائے پنچ اعلی ایں مڑدم آنی آپا آ ۔ہماں ہاں نی نیاما آئی ایس آئی ائے داریکتر جنرل آئی ایس پی آر ائے داریکتر جنرل،وزارت اطلاع اندرا مزن ایں وزیر ائے خاصیں صلاح دؤخ،داریکتر جنرل ملتری انٹیلیجنس او ڈن ائے وزارت اوار آں ۔آر ایس ایف ائے روگا ہمیں میمو سرکاری طور سرا کھشتی آ نہ شزا او گندغ آ ہمیں ڈرافٹ کاغد ایں ،گڈا دی اے صاف نعیں کہ ہمیں چٹھی کھیا او پھرچھے لیک کھُزا؟ہمیں تنظیم ائے آسیا پیسیفک علاقہ ائے انچارج ڈینیل بیسٹرڈ ائے ویچار ایں کہ بیس بی کہ ہمیں کاغد پاکستان ائے مخوی ایجنسی آں وا ہی لیک کھُزا تاکہ حوال کار آنر تھڑسینتھی آ او آنہاں نی ہور آگو رائے عامہ آر خراب کھُزی آ برؤ آر ایس ایف ائے گُشغ ایں کہ اگر ہمیں ھچھ رسمی ایں سرکاری میمو نعیں گڈا دی حوال کار آنگو رابطہ کھنغ والا ایں ٹؤک باز وزتی کھنوخ ایں ۔پھجھاتھی ایں حوال کار والٹر کرون ائے گُشغ ایں کہ حوال کاری ائے آجوئی چھڑوئی آ جمہوریت آپا ضروری نعیں بلکہ ہمیں جمہوریت ایں۔ہمیں سبب ایں کہ مہزب معاشرہ آنی اندرا جہوریت او حوال کاری ائے آجوئی آر یک دوہمی آپا ضروری پوہ بیسی آ رؤ پھرچھے کہ حوال کاری آجو بی تہ آں آزادی آگو سرکار آژ حساو گِت کھنت ہمائی آگو نظام صاف بی او یک زبر ایں جمہوریت جوڑ بیس بی۔لیکن بے بختی آگو پاکستان اندرا حوال کاری ائے مروشی دی پھیلو ایں بھیرا آجو نویسا او حوال کاری اےت فرض آنر انجام دئے اغ والا ایں حوال کار مخلوق آر اصلیت او زانتکاری ائے بھا سرا وتی زند برائینتھؤ او جیل آنی اندرا شزؤ ادا کھنغاں ۔پاکستان اندرا قانونی اصلاح آنی موضوع سرا کار کھنغ والا ایں یک تنظیم،ارادہ ائے سروک،آفتاب عالم ائے گُشغ ایں کہ اسلام آباد حوال کار آپا کھُل آنژ گیش خطرناکیں شہر ثابت بیسا ۔ہموزا نواد او یک آژ سی او یک واقعہ پیش آتکغاں ہمیں باز وزتی کھنوخ گپ ایں کہ ہمیختر باز واقعہ بی غاں او اصل سمجھ آ نیاؤخیں گپ اش انت کہ سرکار ہمیں بارو آ ھچھی نہ کھنغیں ۔گوستی ایں چھی اے سال آنژ حوال کار آنی محافظت آپا قانون جوڑ کھنغ ائے گپ جزغیں ہمائی ائے رندی ایں سال مارچ اندرا اصولی منظوری داسی آ شزغئے سا ہماں کہ اندری ایں وزارت ائے جوڑ کھزی ایں مسودہ آ۔لیکن وا سرکار ائے چھی اے اعلی ایں واگ داروخ ہمیں مسودہ ائے مخالفت کھنغاں ہمائی سبب آژ ہمیں مسودہ آ مروشی تکا ھچھ قانونی دیم نہ گِتا ۔پاکستان اندرا حوال کاری ائے آجوئی آر باور دؤخ کھنغ ائے سرکاری دعوی نی تکا دروغو ثابت بیسغاں ۔ہمیں ثبب ایں کہ پاکستان حوال کاری آجوئی ائے عالمی فہرست اندرا سرجمی آ بُنا کھوانا رؤغیں۔