موضوع: فوجی جرنیل آں پا پاک میڈیا ائے وشادگی

وزی مقصد آنر حاصل کھنغ آپا دوہمی آنی دروغوئیں وشادگی کھنغ مڑدم ائے عادت ایں او ہمیں روایت دراژین مدت آژ جزانا پھیزاغئین۔ یکھ زمانہ آ درباری شاعر بیس ساں ہماں ہاں واگ داروخ آنی وشادگی کھزؤ انعام حاصل کھز ساں۔ ہچھ دی لغوریں واگ داروخ آر جہان ائے کھل آنژ گیش دلاوریں مڑدم قرار دئیغ ہچھ ڈکھیائیں گپ نیا او آنہی ائے وشادگی آگو واگ داروخ وزار دی اینگیں ہی دلاور پوہ بیس ساں۔یا ہچھ معمولی ایں مہاندرا والائیں شاہزادی یا رانڑی آر ماہ آژ دی گیش مہاندرا ڈسغ او آنہی ائے وشادگی آپا آزمان او ڈغار یکھ کھنغ شاعر آنپا چپی دست ائے کار بیس سا او پرچے موی پرچے کہ واگ داروح آنژ فائدہ آنی زیرغ ائے ذریعہ ہمیں دروغوئیں وشادگی بیس سا۔ کاہنیں وخت گوستا نوخیں زمانہ آتکا لیکن مڑدم ائے عادت بدل نویسا۔ نی دربار ہندا اخبار او رسالاں آ گت غئے سا او رندا الیکترانک میڈیا دی آختا۔ او نی اخبار او رسالا آنی زریعہ واگ داروخ آنی وشادگے بیئغ شروع بیسا آں ہانی ناجائز ایں خرکت آنر جائز قرار داسی آروغ شروع بیسا۔ آہانی خامی آنی سرا پڑدا پھرینغ شروع بیسا۔ہمیں بابت آ دوہمی ملک آنی مقابلہ آ پاکستان دو گام اگا درکھتؤ شزا پرچے کہ ہمیں ملک اندرا چھن جیسؤ آتکغیں سرکار آنی نزیخ نزیخ براوریں فوجی جرنیل آں واگ داری کھزا ہمیں واسطہ ہماں ہند ائے میڈیا آ فوجی جرنیل آنی چاپلوسی کھنغ اندار ہچھ کمی نہ کھزا۔ آنگا تہ مچھیں جہان اندرا فوج آنی سپہ سالار آنر ہما ساعت آ کھسے گیراری یا آنہی ائے وشادگی کھنتھ ہما ساعت آ آں مڑائی ائے چیلنج آنر زبریں نمونہ آگو سینغ دیان او ملک او مخلوک آر سوب مند کھناں لیکن پاکستان اندرا پرچے کہ وشادگی کھنغ ائے کار میڈیا سغر آ بی ہمیں واسطہ خاصین مڑدم او ذرائع ابلاغ ائے حلقہ آنژ وشادگی ائے کار کھزی آ رؤ۔

اسکرپٹ: حسین زمین