سرگال:نیپال آ سیاسی بحران

نیپال دی اے وخت دیگر ملک آنی بھیرا کووڈ نوزدہ ناجوڑی آ دیما کھنغیں مگہ ہمیں ناجوڑی ائے پھجی پھجی آ آنہی آر یک مزنیں سیاسی بحران دی دیما ایں پھرچھے کہ حکمراں نیپال کمیونست پارٹی ائے چھی اے سینئیر سروک آں سروزیر کے پی شرما اولی ائے استعفی ائے مطالبہ کھُزا ۔اے سری ایں دھکا ایں کہ ہماں وخت قائیمہ کمیتی ائے بیٹھک ائے نیمگا ۴۴ آژ ۳۱ باسک آں سروزیر اولی ائے حلاپ بیسغاں ۔قائیمہ کمیتی ائے بیٹھک ۲۴ مئ آ بیسا ہمائی ائے سئے ایجنڈہ اساں ہمیں ایجنڈہ آ سرکار ائے پالیسی آنی جائیزہ گرغ ،ھند نیپال سیمائی ناوشی او اقوام متحدہ ائے ملینئیم چیلنج کو آپریشن ائے پارلیمانی منظوری اوار اسا،ہمائی ائے حکمراں پارٹی ائے باسک او چنتی ٹلہ آں باز مخالفت کھزا ۔بنگیج آ بیٹھک ائے نیمگا باسک آں ش ایں حکمرانی آ ناسوبی ،بدعنوانی او کووڈ نوزدہ ناجوڑی ائے گیش بی اغ آ دارغ آپا سرکار ائے نااھلی آپا سروزیر اولی ائے باز تنقید کھُزا او پارٹی ائے نیمگا ناوشی ہماں وخت پیدا بیسا ہماں وخت پشپ کمل دھل ہماں کہ اولی ائے گون بیٹھک ائے سروکی کھنغئے سا او مادھو کمار نیپال،جھالا ناتھ کھنل او بام دیو گوتم ڈؤل ائے مزنیں لیڈر آں سروزیر اولی ائے استعفی خط لوٹھسا۔آنہاں نی الزام اسا کہ سروزیر اولی ناچھڑوئی آ پارٹی او سرکار آ جزینغ آ ناسوب رہسا بلکہ آنہی آ ھند او نیپال ائے چھی اے لیڈر آنی چکا اے الزام دی جھزا کہ آں آنہی آر عہدہ آژ ہٹائینغ ائے منصوبہ ٹھائینغاں ہماں کہ بالکل بے بنیات ایں ۔ہماں سروک آنی دعوی اسا کہ ہمیں پیرا آ پھدا واجہ اولی اخلاقی ایں ڈؤل چکا پارٹی او سرکار ائےسروکی کھنغ آ نااہل ثابت بیسا ۔سروزیر اولی آ گوشتغئے سا کہ ھند او ملک ائے اندری ایں طاغت آنہی سرکار آ بھورینغ ائے کوشست کھنغاں پھرچھے کہ آنہی آ نیپال ائے ہماں نوخیں نقشہ خط آر منظور کھنائینغ ائے مچھیں کوشست کھزا ہمائی آ کالا پانی ،لیپو لیکھ او لمپا دھرا آ نیپال ائے بہر ائے ڈؤل چکا پھیدھارتھی آ شزا ،اے سئے اوں دمغ ھند ائے ود مختار دمغ آں ۔اشی آژ سرا دی پرچنڈا ائے دھر آ سروزیراولی ائے استعفی ائے مطالبہ کھزغئے سا مگہ ہماں وخت واجہ اولی آ مڑدم آنی دھیان نقشہ خط ائے وٹا کھنائینتھؤ وضہار بھچینتھا۔کے پی شرما اولی ائے سروکی والا سی پی این یو ایم ایل او پر چنڈا ائے سروکی والا سی پی این ماؤسٹ سنٹر ائے بستگی آ پھدا ۲۱ فروری ۲۰۱۸ آ این سی پی ائے قیام عمل آ آتکغئے سا ۔ہمیں ہڑ دوکین پارٹی آں یک ہپت ٹک آنی منغ نامہ چکا دستخط کھزغئے ساں ہمائ آ گوشتی آ شزغئے سا کہ کارل مارکس او لینن ائے اصول یئ حکمرانی ائے اصول بی آں ۔اولی سرکار ائے ناسوبی ہمیں ٹؤک آژ پدھر بی کہ نوہ جون آژ بنجہ کھٹمنڈو او ملک ائے دیگر شہر آ سرکار ائے حلاپ احتجاج بی غیں او دوہمی وٹا نسلی او اقلیتی ٹلہ آنی یک مزنیں کچھ سرکار ائے حلاپ ۲۳ جون آژ احتجاج کھنغیں اے ٹلہ شہریت آپا ہماں نوخیں بل ائے حلاپ احتجاج کھنغاں ہمائی آ سرکار آ نی ایں روش آں پارلیمان آ پیش کھزغئے سا۔