19.08.2020

پاکستان ائے تحریک انصاف سرکار آ نی ایں روش آں مزہبی انتہا پسند آنی زور بُنا آتکؤ اسلام آباد آ پیشا بکھال آنی مندر ٹھائینغ چکا پابندی جھزا،سروزیر عمران خان آ سرا مندر ٹھائینغ ائے اجازت داسسا مگہ گڈا ہماں وخت شدت پسند آ اعتراض کھُزا او آنہی ٹھائینغ چکا پابندی جھنغ ائے مطالبہ کھُزا ہمینگا کہ آنہاں نی عادت ایں ،عمران خان آ مندر ائے تعمیر چکا پابندی جھزا۔مندر ائے ٹھائینغ ائے اجازت دئے اغ ائے فیصلہ آژ مڑدم آنی حق آنی آپا کار کھنغ والا مڑدم او ملک ائے ترقی پسند طبقہ باز وش اسا او آنہی آ یک دانشمندی ائے گام منغئے ساں مگہ عمران خان سرکار آ فیصلہ آ رد کھُزا ہمائی ائے باز بدگوشی کھزی آ رؤغیں ۔اصل آ پاکستان ائے معاشرہ اندرا شدت پسند آنی زور بھٹو ائے سروکی ائے وخت آژ ہی شروع بیسؤ شزغئے سا۔چوش کہ محمد علی جناح آ نوزدہ چھل او ہپت آ آئینی اسمبلی آگو گشانگ آ گوشتغئے سا کہ پاکستان یک ترقی پسند او ہر یک آر وتی گون کھزؤ جزغ والا ملک بی،ہموزا اقلیت آنر وتی مزہب ائے ملغ او آنہی تبلیخ ائے مچھیں آجوئی بی ۔بھٹو ائے سروکی آ آئینی بدلاؤ آگو احدیہ فرقہ آر اسلام ائے دارہ آژ درا کھزی آ شزا چوش کہ آں وضہار مسلمان گُشی زلفقار علی بھٹو ائے سروکی آ احمدیہ فرقہ آر نشانہ کھزی آ شزا مگہ آنہی رندا ہماں وخت جنرل ضیاالحق ائے سروکی ائے وخت آتکا تہ آنہی آ مچھیں پاکستان آ ہی اسلامی ڈؤل ائے کھنغ ائے کوشست کھُزا نوزدہ ہپتاد او ہپت آژ نوزدہ ہشتاد او ہشت تک ائے وتی سروکی آ جنرل ضیا آ حدود آرڈینینس ائے زریہ آگو نا چھڑوئی آ سزا ائے نظام آر بلکہ تعلیمی او بینکنگ نظام آر دی اسلامی ڈؤل ائے کھُزیئ ،اشی پھجی آ آنہی آ افغانستان آ روسی پؤجی آنی حلاپ جہادی آنر ہماں کہ حمایت داسا آنہی آژ پاکستان آ جہادی ٹلہ آنی قیام آ باز مدد بیسا،جنرل ضیا الحق ائے یک گواسین سفر آ مرغ آ پھدا بینظیر بھٹو نوزدہ ھشتاد او ہشت آ سروزیر بیسا مگہ آں دی نوزدہ نواد او شش آ مزہبی شدت پسندی ائے شکار بیسؤ شزا آنہی آ پھدا نواز شریف آ پدوارغ سروزیر ائے عہدہ سنبھالتھا ،گڈا دی نوزدی نواداو نو آ پؤجی بغاوت کھزؤ جنرل پرویز مشرف آ سروکی چکا قوضہ کھزا تہ آنہی ہمیں لعنت چکا قابو کھنغ ائے کوشست ضرور کھزا ہمیں بارو آ اسلام آباد ائے سہریں مسیت ائے دپ ہر کھسے آر گیر بی مگہ پاکستان ائے معاشرہ اندرا مزہبی شدت پسندی ائےپاڑ ہمیختر مضبوط بیسغئے ساں کہ پرویز مشرف دی آنہی آر آسر کھنغ آ سوب مند نویسا۔نواز شریف دوہزار سیزد آ ہماں وخت سئے می دھکا سروزیر بیسا تہ مزہبی انتہا پسندی او دھشت گردی باز گیش بیسغئے سا مئی آ نواز شریف ائے سروکی چکا آئیغ آژ پیشا جنوری دوہزار سیزد آ ود کُش ھلگر کھنغ والا آں یک اسنوکر ہال آ ھلگر کھزؤ سد مڑدم آنر کُشتغئے سا ہمائی آ بازی آ تر مڑدم شعیہ اساں آنہی آژ رندا ستمبر آ پاکستانی طالبان آژ جتا بیسغیں یک ٹلہ آ پشاور ائے یک چرچ چکا اُرش کھزؤ یک سد او نواد عیسائی آنر کُشتا ،دوہزار سیزد ائے عامین گچین کاری آژ پیشا او آنہی آ رندا دی پاکستانی طالبان آ ہمیں سیاست زانتکار آنر نشانہ کھزا ہماں کہ سیکیولر اساں،مزہبی انتہا پسندآنی حلاپ چاھے ہمیختر دی کاروائی کھزی آ شزا آنہاں نی حوصلہ گڈا دی بلند آں تحریک طالبان پاکستان ائے سروک حکیم اللہ مسعود ائے امریکی ڈرون ھلگر آ کُشتی آ روغ آ پھدا پاکستان ائے طالبان آں ساف کھُزا کہ آں ہمیں اسلامی قانون ائے لاگو کھنغ آر السؤ آں ھچھ دی منغ آپا تیار نیاں ہمائی ائے کہ آں پیروی کھناں ،اشی آژ پیشا دوہزار یازد آ صوبہ پنجاب ائے گورنر سلمان طاہر ائے حون مروشی دی نہ شمشتھا ،سروکی چکا آئیغ آژ پیشا عمران خان آ دی مزہبی انتہا پسند آنر دارغ آپا مزن ایں وعدہ کھزغئے ساں مگہ سروکی آ آئیغ آ پھدا آں اصلیت آژ پوہ بیسا،نی ہر وٹا آنہی آر انتہا پسند آنی ضد آر دیما کھنغی بی او آں ہر دھکا اشاں نی دیما ہتھیار پھرینی ،اے سری ایں دھکا نعیں کہ مندر آ ٹھائینغ ائے فیصلہ ائے بارو آ مزہبی شدت پسند آنی اگا آنہی آر جھکغی بیسا ستمبر دوہزار ہژدہ آ شدت پسند آنی گُشغ چکا پرینسٹن یونیورستی ائے زانتکار آتف آر میاں آ سروزیر ائے سروکی والا معاشی صلاح کار کونسل آژ درا کھزی آ شزغئے سا،پھرچھے آں احمدیہ اسا۔سرکار ائے گُشغ اسا کہ آں آتف میاں ائے وجہ آژ کونسل آ بہر کھنغ آ باڑہ نیا ۔اے مچھیں دپ او مثال ثابت کھناں کہ پاکستان آ مزہبی شدت پسند آنر قابو کھنغ آنہی دست آژ درا ایں ۔اے جؤر پاکستان ائے معاشرہ ائے پاڑ آنی تکا جزب بیسا او ہر وٹا ملا آنی زور ایں اینگے حالت آ پاکستان ائے یک جدید ملک ائے بھیرا ترقی کھنغ ناممکن نیاہ کھائے۔