23.08.2020

برطانوی سرکار زمانہ آ مشرقی او مغروی بنگال نیاما ریل ائے باز زبریں رابطہ آ۔لیکن مخلوک آژ مخلوک نیاما رابطہ آر بھہرینغ آپا پاکستان آ ۱۹۶۵ اندر ہمیں ریل رابطہ آر بھورینتھؤ اشت غئے سا۔لیکن ہمختر سال آنژ رندا اشی آر اغدی گنڈغ ائے کوشش کھزی آ شزا او مزن وزیر نریندر مودی او بنگلہ دیش ائے آں ہانی ہم عہدہ شیخ حسینہ نیاما ہمیں بابت آ یکھ منغ نامہ بیسا۔بنگلہ دیش ائے رابطہ ائے یکھ مرکز ائے طور سرا کھڑؤ بیئغ ائے لوٹھغ او ہند ائے وزی شمال مغروی علاقہ آر باز نزیخیں بندر گاہ آنگو گنڈغ ائے کار آر اہمیت دئیغ سبب آ ہمیں منغ نامہ بیس بیسا۔ ۱۹۶۵ آژ پیشا چھڑوئی آ ۱۳ مسافر ریل گاڈی بیس ساں ہماں ہند او سری ایں مشرقی پاکستان نیاما جزز ساں ۲۰۰۸ اندرا ہند او بنگلہ دیش آ میتری ایکسپریس ائے حذمت آر برحال کھزا ہماں کولکتہ او ڈھاکہ نیاما جزز سا او ۲۰۱۷ اندرا کولکتہ او کھلنا نیاما جزغ والائیں یکھ مدسدافر تریں بندھن ایکسپریس ائے افتتاح کھزی آ شزا۔اشی آژ علاوہ ہند آ ۲۰۱۶ٴ او ۲۰۱۷ نیاما ۱۲۰ مسافر ڈبہ منگلہ دیش آر داسغاں۔ لاین آف کریڈٹ ائے یکھ بہر ائے طور سرا ہند بنگلہ دیش اندرا ریلوے ائے ۱۷ پروجیکٹ آنر زر ائے بھڑائی دئے غئیں۔نوخیں دلی آ ڈھاکہ آر دو اعشاریہ چھیار چھیار ارب ڈالر دئیغ ائے وعدہ کھزا ہماہی آگو میٹر گیج آر براڈ گیج اندرا بدل کھزی آ رؤ۔اشی آژ علاوہ ہمیں بھڑائی آگو نہ چھڑوئی آ نوخیں پل ٹھاہینتھی آ رواں بلکہ کاہنیں پل آنر دی ٹھاہینتھی آ رؤ۔ اشانژ ۹ پروجیکٹ آنر سوب مندی آگو پھیلو کھزی آ شزا۔بنگلہ دیش سرکار آر اے ویلا ڈبہ آنی باز گیش ضرورت ایں اشانی کمی سبب آ آں جوانی آ کار کھز نہ کھن غئیں ہمیں واسطہ بنگلہ دیش ائے ڈکھیائی آر گندانا ہند ائے ریلوے مڈی زیرغ آپا وزی ڈبہ آنژ کار گرغئیں۔نوخیں دلی ائے روگا سالانہ نزیخ دو ملین ٹن سامان بنگلہ دیش بھڑتھی آ رؤ اشی اندرا ۹۹ فیصد ہما سامان ایں ہماہی ائے بنگلہ دیش ہند آژ لوٹھائینی۔ اے سال جون اندرا سز آش گیش مال گاڈی بنگلہ دیش شزغاں ہماہانی اندرا ضروری ایں سامان لڈزی ائے سا۔ہند آ بنگلہ دیش آر سوکھڑی ائے طور سرا مستریں لائین ائے داہ انجن دئیغ ائے فیصلہ کھزا۔۶۰ کروڑ ائے خرچ آگو تیار ہمیں انجن آنگو بنگلہ دیش ریلوے ائے طاغت اندرا گیشتری بی۔