سرگال:پاکستان ائے سیاسی پارٹی او مزہبی انتہا پسندی

پاکستان اندرا مزہبی انتہا پسندی ہمیختر گیش بیسا کہ ہموزا ائے سیاسی پارٹی دی نی ہمیں نتیجہ چکا پُجھسغاں کہ مزہب ائے اوٹ گرغ آ بغیر نی ھچھ دی گچین کاری کھٹغ ممکن نعیں ۔آں پوہ بیسغاں کہ نی شر ایں حکمرانی او ملک او قوم ائے ترقی ائے ٹؤک کھنغ بے کار آں ۔تعلیم او معیشت ائے زکر کھنغ ائے ھچھ فائیدہ نعیں ۔آپسی ایں براسگی ،حب او سنگتی ائے ٹؤک کھسے اُش کھنغ والا نعیں ۔سیکیولر ازم ائے ٹؤک تہ بالکل نعیں ۔اگر مڑدم چھی اے اش کھنغ آپا باڑہ آں تہ آں ایں آپسی ایں نفرت ائے ٹؤک،مزہبی انتہا پسندی ائے ٹؤک ۔اینگے ٹؤک ہماں کہ اسلام ائے نام چکا معاشرہ آ بہر کھناں ۔ہمیں خاطرہ نی ما سیاسی پارٹی شر ایں حکمرانی چکا دھیان دئے اغ آر السؤ قومی اسمبلی او صوبائی اسمبلی آنی اندرا اینگے بل پاس کھنائینغ ائے حمایت کھنغؤں ہماں ہانر اسلامی شدت پسند آں پیش کھزا تاکہ ہمیں پارٹی شدت پسند آنی ووٹ گت کھناں ۔پاکستان آ مزہبی شدت پسندی ائے بنگیج نازدہ چھل او نوہ آ آئین ساز اسمبلی آ یک قرارداد ائے منظوری ائے پھجی آ بیسغئے ہی بیسغئے سا ،ہمای آ گوشتی آ شزغئے سا کہ ملک آ مچھیں مسلمان آنر اسلامی تعلیم ائے روگا زند گوازینغ ائے ھدایت داسی آ رؤ۔آنہی آ پھدا نوزدہ شست او دو آ پاکستان ائے آئین ائے روگا اسلامی پکر ائے بارو آ یک مشاورتی کونسل قائیم کھزی آ شزا ہمائی آ پھدا ملک آ مچھیں قانون آنر قران و سنت ائے روگا کھنغ آپا یک اسلامک انسٹی ٹیوٹ قائیم کھزی آ شزا او ہمیں ڈؤل آژ پاکستان آ مزہبی بنیات پرستی آ گیش کھنغ ائے دگ سدھا بیسا۔اےوخت پاکستان ائے سیاسی پارٹی او قانون سازمچھیں اقلیت آنی حلاپ تشدد او نفرت گیش کھنغ ائے مہم ائے حوصلہ ودھینغاں ہماں کہ ملک ائے سلامتی آپا باز مزن ایں خطر ایں ۔مثال ائے ڈؤل چکا دوہزار ہژدہ آ ہماں وخت مزن ایں عدالت آ یک عیسائی زائیف آسیہ بی بی آ دین ائے بے حرمتی ائے مچھیں الزام آنژ بری کھزؤ آنہی آر السا تہ ہزارہا سخت گیر مسلمان آں باز احتجاج کھزغئے سا۔آسیہ بی بی آر الغ چکا آنہاں ہماں کہ طوفان کھڑؤ کھزغئے سا آنہی آژ عامین مڑدم آنی زند دی لاچار بیسغئے سا۔ہمیختر ہی نہ تحریک لبیک پاکستان آ ہمایئ آ مظاہرہ آنی سروکی کھزغئے سا آسیہ بی بی ائے حق آ فیصلہ اش کھنائینغ والا ایں قاضی آر کُشغ ائے دھمکی داسغئے سا ۔پاکستان آ عدم رواداری او تعصب ائے ہمیں ماحول ائے وا قانون ساز دی شکار بی غاں ۔نی گوستی ایں ماہ پاکستان ائے پیسر ائے ڈن ائے وزیر خواجہ آصف چکا حکمراں پارٹی ائے یک قانون ساز آ ہمیں الزام جھزا کہ آنہی آ دین ائے بے حرمتی کھزا ،واجہ آصف ائے چھڑوئی آ ہمیختر ڈوہ ایں کہ آنہی آ مچھیں مزہب آنر براور منسغئے سا۔