سرگال:ہیومن رائیٹس واچ ائے پاکستان آژ مطالبہ،احتساب بیورو ائے غیر قانونی عمل آنر داری

ہماں وخت سرکاری سطح چکا ھچھ سرکار اے فیصلہ کھنت کہ آں وتی حلاپ کھڑو بی اغ والا ایں ہر تھوار چکا پابندی جنتھ ،وتی حلاپ روغ والا آنر جیل آ دیم دا او آنہاں نی چکا ظلم کھنت ،ھچھ ثبوت آ بغیر کھسے چکا بدعنوانی ائے الزام جھزؤ آنہی زند او آنہی آؤخین روش برباد کھنت تہ گڈا ہمیں ملک آ انصاف لوٹھغ آپا تھاں ھَندے آ بروں ۔پاکستان آ گوستی ایں دو دھ آژ ہمیں بی غیں ۔یک پؤجی ڈکٹیٹر آ یک آرڈیننس جاری کھزؤ مڑدمی حق آنی پامالی کھنغ او سرکار ائے بدگوشی کھنغ والا آنی زند برباد کھنغ آپا یک ادارہ قائیم کھزا ہماں کہ قومی احتساب بیورو ائے نام آژ پھجارتھی آ رؤ۔۱۹۹۹ آ قائیم کھنغ والا ایں ہمیں ادارہ ہماں وخت آژ مڑدمی حق آنی پامالی کھناناں پھیزاغیں آنہی آرڈیننس تہ جنرل پرویز مشرف آ جاری کھزغئے سا مگہ آنہی آر ھچھ دی سرکار آ نہ داشتا۔عدالت آ دی کھدیں آنہی نوٹس نہ گتا مگہ نی ایں روش آں عمران خان ائے سروکی چکا آئیغ آ پھدا آنہی سیاحیں کارنامہ آ گیشتری بیسا او آنہی بازیں فیصلہ آنی دی سختی آگو نوٹس گتی آ شزا ۔ایزا تکا کہ پاکستان ائے مزن ایں عدالت آ مزنیں عدالت ائے ہمیں خاصیں رولنگ آ پھدا نہ چھڑوئی آ اندری ایں پاکستان قومی احتساب بیورو ائے حلاپ ہر وٹا احتجاجی تھوار بلند کھُزا بلکہ مڑدمی حق آنگو جڑسی ایں بین الاقوامی تنظیم او عالمی میڈیا آ دی وتی کردار ادا کھزا ۔اصل آ گوستی ایں بیست جولائی آ پاکستان ائے مزن ایں عدالت آ وتی ہشتاد اوہپت کاگد آنی فیصلہ آ گوشتا کہ قومی احتساب بیورو آ شر ایں بھیرا مقدمہ جزینغ ا ضابطہ آنی کاروائی کھنغ ائے دگ آ نہ چھڑوئی آ خلل ماکھُزا بلکہ انصاف ائے لوٹھغ آر دی بھورینتھیئ ۔اصل آ مزن ایں عدالت ائے رولنگ دو اپوزیشن سیاست زانتکار خواجہ سعید رفیق اوخواجہ سلمان رفیق ائے دستگیری چکا تبصرہ کھزؤ داسغئے سااو گوشتغئے سا کہ احتساب بیورو ائے کاروائی کھسے ائے آجوئی آر غیر ڈؤل چکا آسر کھنغ ائے براور ایں ۔مزن ایں عدالت بار ایسوسی ایشن او پاکستان بار کونسل ڈؤل ائے پاکستانی قاضی آنی تنظیم آں مزن ایں عدالت ائے ہمیں فیصلہ ائے وشادگی کھُزا۔