موضوع: پشتون اقلیت ائے بابڑہ حون ریزی ائے دل آر دور کھنوخیں یاد

اے ویلا پاکستانی فوجی ادارہ پشتون تحفظ موومنٹ طلو پی،تی،ایم آر لتاڑغ اندرا مان آتکی ایں لیکن ہمیں قسو پشتون اقلیت ائے یکھ جدائیں قصو ایں او اشی ائے تاریخ اسل جدا ایں۔وزیرستان ائے قبائلی علاقہ آنی اندرا ہما ساعت آ پاکستانی فوج آ آپریشن ضرب عضب شروع کھزا تہ ہماں ہندی آبادی ائے یکھ مستریں بہر وزی لوغاں اشتؤ دیگر ہنداں شزؤ آبد بیسغان۔اشی آژ دی پیشا ہمیں قبائلی علاقہ آنی اندرا افغھانستان آژ بازین پشتون پیڑھی ائے مڑدم ہماں ہند ائے حالات آنش تتا بیسؤ ایزا آتکؤ آباد بیسغاں پرچے کہ ایزا پاکستان او افغانستان ائے سرحد ملاں۔گڈا ہما ساعت آ طالبان آنی خلاف امریکہ آ مڑائی شروع کھزا تہ تہ دہشتگرد آنی یکھ مستریں بہر آ ایزا آتکؤ پناہ گت غئے سا۔ او ایزاژ وزی کار بار آنر کھنانا آتکگاں۔ گڈا پاکستان ائے وزی طالبان پیدا بیسغاں ہماں تحریک طالبان پاکستان ائے نام آگو پھجھارتھی آ روغ شرو بیسغاں۔ ہماں ساعت آ ں ہاں وا پاکیستانی مفاد آنی سرا حملہ کھنغ شروع کھزغان تہ تتا بیسؤ پاکستانی فوج آ اشی ائے خلاف آپریشن ضرب عضب شروع کھزا آپریشن ضرب عضب بنا چھختر دہشتگرد جن جیسغاں یا ہما علاقہ آژ دہشتگردی چھختر حد تکا گار بیسا اشی بارو آ تہ فوج ہی زانی لیکن اے ہند ائے نندوخیں مردم آںپا مزائیں وئیل کھڑو بیسا۔آں وخت آ دہشتگرد آنی نشانہ بیسغا تہ وخت آ وا پاکستانی فوج او آنہی ائے ایجنسی آنی۔ہموزا تکا پشتون اقلیت ائے سوال ایں تہ تھاں وئیل آن ہماں اشاں نئیسغاں۔پاکستان ائے جوڑ بیئغ آگو ہی اشانی وئیل آنی نوخین قسو شروع بی۔ہمیں ماہ مطلو اگست ائے ۱۲ تاریخ آر پشتون پیٹہی ائے مردم آں بابڑہ ھون ریزی آر گیرتھا کہ ۱۹۴۸ اندرا ہمیں روشا بابرہ ہندا ۶۳۰ پشتون مڑدم آنر کشتی آ شزغئے سا۔