سرگال:پاکستان ائے مسلہ آنی پاڑ پاکستان ائے پؤج ایں

 پاکستان ائے قیام آ پھدا ۱۹۵۸ آ ہماں وخت جنرل ایوب خان آ سروکی چکا قوضہ کھزؤ ملک آ مارشل لا لاگو کھزغئے سا تہ پاکستان ائے عوام آر سری ایں دھکا پؤجی سرکار ائے تجربہ بیسغئے سا ۔جنرل ایوب خان ائے ویچار اسا کہ مچھیں سیاست زانتکار بدعنوان او نااہل آں ۔شاید ہمیں وجہ اسا کہ آنہی آ ہزارہا سیاستزانتکار آنر گچین کاری آپا نااہل منسغئے سا ۔نزیخ دھ سال آنی تکا سروکی چکا آنہی قوضہ رہسا ۔آنہی آ پھدا تہ پؤجی سرکار ائے یک عادت بیسؤ شزغئے سا۔جنرل ایوب آژ گتآ نی تکا ہمیختر دی پؤجی جنرل آتکغاں آنہاں ملک ائے گچین بیسغیں سرکار آر کھدیں دی آجوئی آگو سروکی کھنغ نعیلسا او ہمیں سلسلہ مروشی تکا دی جزغیں۔گوشتی آ رؤ کہ عمران خان ائے پارٹی پاکستان تحریک انصاف آ دی پؤج ائے واہریائی آژ عامین گچین کاری کھٹسا ۔پؤج آر سرا آژ اے باور اسا کہ اگر عمران خان سروزیر بیسا تہ آنہانر سرکار آ وتی کردار ادا کھنغ ائے موقع ملی او ہمینگا ہی بیسا۔عمران خان سرکار آ پؤج آر کھدیں دی مایوس نہ کھزا  او جتا جتا عہدہ آنی چکا پؤجی آنر تعنات کھُزئی،جنرل عاصم سلیم باجوا آ گوستی ایں سال نومبر آ سی پی ای سی اتھارٹی ائے چئیرمین گچین کھزی آ شزا ۔اشی پھجی آ چنتی پؤجی اپسر آنر ،ریلوے،ہاؤسنگ او درائی ائے شعبہ آ تعینات کھزی آ شزا ۔سجوں آنژ خاصیں ٹؤک اش انت کہ پؤجی سروک جنرل قمر جاوید باجوا ائے مدت کار آر دی سئے سال آنی گیشتری کھزا۔ہمیں مچھیں گام گیج آنژ پؤج ائے باور گیش بیسا ۔اینگے حالت آ ہماں وخت اپوزیشن بالکل نوی اغ ائے براور ایں عمران خان آ شہری انتظامیہ آ پؤجی اپسر آنر تعینات کھزؤ وتی آؤخیں روش محفوظ کھزغاں ،اپوزیشن خاصیں ڈؤل چکا پاکستان پیپلز پارٹی او پاکستان مسلم لیگ نواز ائے سروک احتساب بیورو ائے کاروائی آنژ پریشان آں او آنہانژ پرس او سوج جزغیں ہمیں خاطرہ آں اے وہیلا اپوزیشن پارٹی آنی سروکی کھنغ آژ قاصر آں ۔نی ایں پاکستان آ پؤج آ ہماں ڈؤل آژ سول سرکار آ عمل دخل ائے اجازت داسی آ شزا آنہی مثال سرا کھدیں دی نیا۔ملک ائے سیاستزانتکار چاہے آں حکمراں پارٹی آژ بستگی ایر کھناں یا اپوزیشن آژ،پؤج آ شہری انتظامیہ آ ھچھ نہ ھچھ کاروائی کھنغ آپا تیار آں۔تاکہ پؤجی بغاوت نوی او آنہانر بدعنوانی ائے ھچھ سزا دی نہ ملی ۔ہموزا تکا پؤج ائے تعلق ایں تہ آنہاں نی ویچار ایں کہ اگر بغیر ھچھ بغاوت ائے آنہی آر حکمرانی کھنغ ائے موقع ملغیں ۔نی چوش کہ پؤج ائے حکومت آ باز گیش عمل دخل ایں تہ آنہی نیاہ ملک ائے معاشی حالت آنی چکا دی ایں پھرچھے کہ کمزور معیشت ائے اثر ملک او سماج چکا دی بی۔اصل آ پؤجی سامان گرغ او پؤج ائے گزری آر پھیلو کھنغ آپا معیشت ائے مضبوط بی اغ ضروری ایں ۔اصلیت اش انت کہ ملک ائے کھسے آر دی پرواہ نعیں اگر گوستی ایں روش آنی چکا نیاہ ماکھنوں تہ ما گندوں کہ پؤج آ ھچھ دی سیاسی پارٹی ائے گیش روش آنی تکا سنگتی نہ کھُزا ۔پاکستان آ جمہوریت ہماں وخت تکا راست ایں معنی جزی ہماں وخت آنہی ائے ہر ادارہ ائے احترام کھزی آ رؤ ۔آنہانر ملک ائے قانون او آئین ائے روگا کار کھنغ ائے موقع داسی آ برؤ۔اگر اینگا نویسا تہ پاکستان آ سیاسی بے باوری کھدیں دی آسر نوی او ہموزا ائے عوام ہمیں بھیرا مشکل آنر دیما کھناں۔