من کی بات

منی عزیزیں ہم وطن ،نمسکار من کی بات پروگرام ائے بنگیج آ مروشی من شوار یک وش ایں حبر دئے اغ آپا باڑہ آں ،ہر ھندوستانی آر ہمیں اُش کھزؤ فخر بی کہ دیوی ان پورنا ائے یک بُت کینیڈا آژ ھند گڑدینتھؤ آڑتھی آ رؤغیں ۔نزیخ سد سال پیشا نوزدہ سیزد آ وارانسی ائے یک مندر آژ دُزی کھزؤ ملک آژ درا دیم داسی آ شزغئے سا ۔من کینیڈا سرکار او آنہی آگو جڑسی ایں مچھیں مڑدم آنی منت وار آں ہماں ہاں کہ ہمیں بُت آ ھند آرغ آپا مدد کھُزا۔ماتا ان پورنا ائے کاشی آگو یک خاصیں بستگی ایں نی آنہی بُت ائے گڑتھؤ آئیغ ما مچھیں آنی آپا باز وشی ائے ٹؤک انت ۔ماتا ان پورنا ائے بُت ائے ڈؤل آژ ھی مئے وراثت ائے چُنتی اینگے قیمتی خزانہ ڈن ائے ملک آ پُجھینتھی آ شزغئے سا۔ہمیں ٹلہ ڈن ائے بازار آنی اندرا ہمیں بُت آنر باز گران ایں بھا آ شوشکاں،ہمیں قیمتی بُت آنر ھند آرغ آپا ھند آ وتی وٹاژ دی باز کوشست کھُزغاں ۔ہمیں کوشست آنی وجہ آژ گوستی ایں چھی اے سال آنی اندرا ھند آ کے ای اینگے قیمتی بُت او شئے آنر ھند آڑتھا ،ماتا ان پورنا ائے بُت آر گڑدینغ ائے گون یک اتفاق اے دی بیسا کہ چھی اے روش آنی پھدا ورلڈ ہیری ؁یج ہپتغ منائینتھی آ شزا،ورلڈ ہیری ٹیج ہپتغ ثقافتی دل لوٹھوک آنی آپا یک شر ایں موقع ایں ۔کرونا ناجوڑی ائے باوجوت دی مڑدم آں باز جوش آگو ہمیں ورلڈ ہیری ٹیج ہپتغ منائینتھا۔کرائیسس آ ثقافت مزن ایں کار کھنت ،مشکل آنر دیما کھنغ آپا خاصیں کردار ادا کھنت ۔تیکنالوجی ائے زریعہ آگو دی ثقافت یک جزباتی ریچارجر ائے بھیرا کار کھنت ۔مروشی ملک آ کے ای میوزیم او لائیبریری وتی تاریخی شئے آنر ڈیجیٹل کھنغ آپا کار کھنغاں ۔دلی آ مئے قومی اتحاد آ ہمیں بارو آ چھی اے وشادگی ائے کار کھزغاں۔قومی اتحاد ائے زریعہ آگو دھ ورچؤل گیلری ٹھائینتھی آ رؤغاں ،نی شوا وتی لوغ آنی اندرا نشتؤ دلی ائے نیشنل میوزیم گیلری دیست کھنے۔ہموزا یک دیگر تاریخی ورثہ آر تیکنالوجی ائے زریعہ آگو گیش آژ گیش مڑدم آنی تکا پُجھینغ ضروری ایں ہموزا ہمیں ورثہ ائے محاپظت آپا تیکنولجی ائے استعمال دی ضروری ایں ۔نی ایں روش آں ہی یک باز دلچسپ پروجیکٹ ائے بارو آ من پڑھسا ناروے آ یک سوال برڈ نام ائے جزیرہ ایں ہمیں جزیرہ آ یک پروجیکت آرتیکل ورلڈ آرچیو ٹھائینتھی آ شزا ہمیں آرچیو آ باز قیمتی ہیریٹیج ڈاٹا آر ہمیں بھیرا ایر کھزی آ شزا کہ ھچھ دی بھیرئے ھزائی یا مڑدمی آفت آنی آنہی چکا ھچھ اثر نوی ۔نی ایں روش آں ہمیں زانتکاری دی آتکا کہ اجنتا ارورا ائے ورثہ آر دی ڈیجیٹل کھزؤ ہمیں پروجیکٹ آ اوار کھزی آ رؤغیں ۔اشی اندرا اجنتا ائے چُر آنر پھیدھارتھی آ رؤ۔منی عزیزیں سنگت کرونا ناجوڑی آ یک وٹا مئے کار کھنغ ائے طریقہ آنر مٹینتھا دوہمی وٹا فطرت آر نوخیں طریقہ آگو محسوس کھنغ ائے موقع داسئ۔نی ما زمستان آ گام ایر کھنغ والا اوں مارا فطرت ائے نوخیں نوخیں رنگ گندغ آپا ملاں ،گوستی ایں چھی اے روش آنژ انٹر نیٹ چکا باز سونڑھایاں پھُل آنی عکس گندغ آپا ملغاں ہمیں عکس مئے ملک ائے شیلانگ او میگھالیہ ائے غاں ۔میگھالیہ ائے سونڑھائی آر چیری بلاسم آ گیش کھُزا۔منی عزیزیں سنگت ہمیں ماہ ائے دوازد نومبر آژ ڈاغدار سلیم علی ائے یک سد او بیست او پنچ می پیدا بی اغ ائے روش ائے تقریب بنا بیسا،ڈاغدار سلیم آ برڈ واچنگ آپا باز شر ایں کار کھُزا ۔من سرا آژ برڈ واچنگ ائے دل لوٹھ مڑدم آنی وشادگی کھناں ۔باز صبر آگو آں چنتی گھنٹہ آنی تکا برڈ پرندہ آنی نگرانی کھُزا کھناں۔منی باز مصروف زند آ منا دی گوستی ایں روش آں کیوڑیا آ پرندہ آنی پھجی آ چھی اے وخت گوازینغ ائے شر ایں موقع ملسا ۔پرندہ آنی پھجی آ گوازینغ والا ایں وخت شوار فطرت آگو بستگی ائے احساس دیائینی ۔منی عزیزیں ہم وطن ھند ائے ثقافت سرا آژ مچھیں جہان آ وتی وٹا چھِکی ۔کے ای مڑدم ایزا تھرغ آپا آتکغاں تہ گڑتھؤ نہ شزغاں ،کے ای مڑدم آں وتی ملک آ ہمیں ثقافت آ منغ بنا کھُزا۔۔منا جونس ماسیتی ائے کار ائے بارو آ زانغ ائے موقع ملسا ہمائی آر وشوناتھ ائے نام آگو پھجھارتھی آ رؤ ۔جانس برازیل آ مڑدم آنر گیتا وانینی ۔آں وشو ودیا نام ائے یک ادارہ جزینی ۔جانس آ میکینیکل انجنیئیرنگ ائے پڑھائی کھُزا ۔پڑھیائی آ پھدا آنہی آ شئیر مارکیت ائے کمپنی آ کار کھزا ۔پھدا آنہی دل لوٹھی ھند ثقافت ائے وٹا گیش بیسا ۔شیئیر بازار آژ گتؤ روحانی پڑھائی تکا آنہی ائے یک مزنیں سفر ایں جانس آ ھند آ ویدانت درشن ائے مطالعہ کھُزا او چھیار سال آنی تکا آں کوئیمبٹور ائے آرش ودیا گورو کُل آ رہسا۔جانس اندرا یک دیگر جوانائی اش انت کہ آں وتی پھیغام آ اگا مڑدم آنی تکا پُجھینغ آپا تیکنالجی ائے استعمال کھنغیں ۔آں آن لائین پروگرام کھنت آں ہر روش پوڈ کاسٹ کھنت ۔گوستی ایں ہپت سال آنی اندرا جانس آ ویدانت چکا وتی مفت اوپن کورس ائے زریعہ آگو یک او نیم لکھ آژ گیش شاگرد آنر وانینتھا۔جانس نہ چھڑوئی آ یک مزنیں کار کھنغیں بلکہ آنہی آر یک اینگی زوان آ کھنغیں ہمائی آر پوہ بی اغ والا آنی کچھ دی باز گیش ایں ۔مڑدم آنر ہمیں ٹؤک آپا باز حیرانی ایں کہ کرونا ائے وخت آ ویدانت تھانگا مدد کھنغیں ؟من کی بات پروگرام ائے زریعہ آگو ماں مروشی جانس آر آنہی کوشست آنی آپا باز مبارک دیاں او آئیغ والا ایں روش آنی اندرا آنہی کوشست آنی آپا نیخیں لوٹھغ دیاں ۔منی عزیزیں ہم وطن ہمیں بھیرا یک حبر چکا شوے دھیان ضرور بیس ،نیوزیلینڈ آ ہموزا ائے نوخیں گچین بیسغیں ایم پی ڈاغدار گورو شرما آ جہان ائے تاریخی زوان آنژ یک سنسکرت زوان آ حلف گتا ۔یک ھندوستانی بی اغ آگو مارا ہمیںٹؤک باز فخر محسوس کھنائینی ۔من کی بات پروگرام ائے زریعہ آگو ماں گورو شرما آر نیخیں لوٹھغ دیاں۔مئے لوٹھغ ایں کہ آں نیوزیلینڈ ائے مڑدم آنی ھزمت آ باز سوب مند بی۔منی عزیزیں ہم وطن بانگھا سی نومبر آ ما شری گورو نانک دیو ائے پنچ سد او پنجہ او یک می یوم پیدائیش ائے روش منائینوں ۔مچھیں جہان آ گورو نانک دیو ائے روژنائی صاف نیاہ کھائے۔وینکوور آژ ویلنگٹن تکا ،سنگاپور آژ بُرز افریقہ تکا،آنہی پھیغام ہر وٹا اش کھزی آ رؤغاں ۔گورو گرنتھ صاحب آ گوشتی آ شزا کہ ھزمت کھنوخ ائے کار ھزمت ایں ۔گوستی ایں چھی اے سال آنی اندرا باز خاصیں پڑاؤ آتکغاں او مارا یک ھزمت کار ائے بھیرا باز چھی کھنغ ائے موقع ملسا۔گورو صاحب آ مئے آژ ھزمت گتا ۔گورو نانک دیو ائے پنچ سد او پنجہ اویک می یوم پیدائیش،گورو گووند صاحب ائے سئے سد او پنجہ می یوم پیدائیش او اگی ایں سال گورو تیگ بھادر ائے چھیار سد می یوم پیدائیش ائے ایں ۔منا محسوس بی کہ گورو صاحب ائے میئ چکا باز دست رکھیائی ایں آنہی آ منا وتی کار آنگو جُڑغ ائے موقع داسا۔منی سنگت چھے شوا زانے کہ کَچھ آ یک گوردوارہ صاحب ایں لکھپت گوردوارہ صاحب،گورونانک صاحب آ وتی زند ائے چھی اے بھر ہموزا گوازینتھا،دوہزار یک ائے ڈغار چھنڈ آ ہمیں گوردوارہ آر دی باز نقصان بیسغئے سا ،اے گورو صاحو ائے مہروانی ایں کہ مارا ہمیں گوردوارہ ائے پدوارغ ٹھائینغ ائے موقع ملسا او نہ چھڑوئی آگوردوارہ ائے مرمت ائے کار بیسا بلکہ پدوارغ آنہی بُنشت ایر کھزی آ شزا۔او مئے چکا گورو ائے باز دست رہسا۔لکھپت گوردوار ائے ٹھائینغ ائے کوشست آنی آپا دوہزار چھیار آ یونیسکو آسیا پیسیفک ہیریٹیج ایوارڈ داسی آ شزا۔لکھپت گوردوارہ روغ ائے منا ہماں وخت دی موقع ملسا ہماں وخت ما یک عامین مڑدم اسا۔منا ہمیں ٹؤک آپا باز اطمینان او وشی ایں کہ گورو صاحب آ منا ھزمت ائے موقع داسا۔گوستی ایں سال نومبر آ کرتار پور صاحب کوریڈور ائے بنا بی اغ یک تاریخی گام ایں ۔ہمیں ٹؤک آ ماں مچھیں زند وتی دل آ زیندغ ایر کھناں ،اے مئے وش ایں نصیو ایں کہ مارا یک بار پدوارغ گوردوارہ صاحب ائے ھزمت کھنغ ائے موقع ملسا ۔ڈن ائے ملک آ رہغ والا ایں مئے سکھ براس او گوار آنی آپا نی دربار صاحب ائے ھزمت آپا زر دیم دئے اغ باز آسان بیسا ہمیں گام آژ مچھیں جہان ائے براسی دربار صاحب ائے گیش نزیخ بیس بی آں ۔منی سنگت ہمیں گورونانک دوی ایں ہمائی آ لنگر ائے رسم بنا کھزغئے سا او مروشی مارا دیستا کہ مچھیں جہان آ سکھ براسی آ تھانگا کرونا ناجوڑی ائے مشکل وخت آ مڑدم آنر نغن ورائینغ ائے وتی رسم آ جاری ایر کھُزا۔مڑدُمیت ائے ھزمت کھُزیش ،اے مئے آپا دی مزنیں سبق ایں منی لوٹھغ ایں کہ گورو میئ آنذ او میئ ہم وطن آنژ ہمیں بھیرا ھزمت گری ،یک دھکا پدوارغ گورو نانک ائے پیدا بی اغ ائے روش ائے شوار باز مبارک با ۔منی عزیزیں ہم وطن گوستی ایں روش آں مناں مچھیں ملک ائے کے ای یونیورسٹی آنی شاگرد آنگو ٹؤک کھنغ ائے،آنہاں نی پڑھیائی ائے خاصیں تقریب آ بہر گرغ ائے موقع ملسغئے سا۔تیکنالوجی ائے زریعہ آگو من آئی آئی ٹی گوہاٹی ،آئی آئی ٹی دلی،گاندحی نگر ائے دین دیال پیٹرولیم یونیورسٹی ائے شاگرد آنگو ٹؤک کھزا ،دلی ائے جے این یو ،میسور یونیورسٹی او لکھنؤ یونیورستی ائے شاگرد آنگو دی منی ٹؤک بیسا ۔ملک ائے ورنا نسل آگو ٹؤک کھنغ باز تروتازہ کھنت،کرونا آژ پیشا ائے روش آ من ہماں وخت دیم پدیم ھچھ تقریب آ شزغاں تہ اے گزارش کھُرت کہ نزیخ ائے سکول آنی غریو چُکھ آنر دی ہمیں تقریب آ اوار بی اغ آپا کانڈھ داسی آ برؤ۔ہماں وخت یک کسنیں چُکھ ہماں مزنیں تقریب آ کھسے آر ڈاغدار ،انجنئیر سائینسزانتکار بی اغ آ گنداں ،کھسے آر میڈل ملغ آ گنداں تہ آنہی اندرا دی نوخیں واہو پیدا بی آں جزبہ پیدا بی ۔منی سنگت اشی ائے علاوہ یک دیگر ٹؤک زانغ آ منی سرا آژ دل لوٹھی بی کہ ہمیں انستیتیوت ائے پیسر ائے شاگرد کھیے آں ۔منی سنگت شوا ہماں وخت تکا ھچھ انستیتوت ائے شاگرد اے ہماں وخت تکا شوا ہماں انستیٹیوٹ آ پڑھغئے مگہ شوا ہموزا ائے الومنی مچھیں زند بی اے۔شوئے وتی کالج آگو دل لوٹھی شوے اندرا زیندغ بی۔منا چھی اے اینگے کوشست آنی بارو آ پڑھسا ہموزا پیسر ائے شاگرد آں وتی اسکول او کالج آنر باز چھی اے داسا آئی آئی ٹی آژ درا بیسغیں شاگرد آں وتی ادارہ آنڑ کانفرنس سینتر،مینیجمنت سینتر ڈؤل ائے کے ای جتا جتا دیگر سینتر وا ٹھائینتھؤ داسغاں۔ہمیں مچھیں کوشست پڑھغ والا ایں شاگرد آنی اندرا دی اینگے جزبہ پیدا کھناں ۔آئی آئی ٹی دلی آ یک انڈومنٹ فاؤنڈ ائے بنگیج کھُزا ہماں کہ یک باز شر ایں ویچار ایں ۔جہان ائے مشہور یونیورستی آ ہمیں بھیرئے انڈومنٹ ٹھائینغ ائے ثقافت رہسا،ہماں کہ شاگرد آنی مدد کھنت ،منا مان کھائے کہ ھند ائے جہانی ایں اسکول دی ہمیں ثقافت ائے روگا کار کھنغ ائے کوشست آ مان آں ۔ہماں وخت چھی اے گڑدینغ ائے ٹؤک کھائے تہ ھچھ دی کسن یا مزن نوی ۔کسن آژ کسن ایں مدد دی باز معنی دار بی ۔ہر کوشست ائے اہمیت بی۔کے ای اسکول آنی اندرا خاص ڈؤل چکا بورڈنگ سکول آنی پیسر ائے شاگر آنی ایسوسیایشن باز مضبوط بی ہماں کہ سپورٹ تورنامنت،او کمیونیتی ھزمت ڈؤل ائے کار آنی تقریب کھناں ۔من پیسر ائے شاگرد آنژ گزارش کھنغ آپا باڑہ آں ہماں ہاں کہ ہماں اسکول کالج آنژ پڑھائی کھُزا ہموزا آژ وتی بستگی آر گیش مضبوط کھناں۔منی عزیزیں ہم وطن پنچ دسمبر آ واجہ اربندو ائے برسی ایں واجہ اربندو آر ما ہمیختر کہ پڑھوں ہمیختر ہی ما زانوں،منی ورنا سنگت واجہ اربندو آر ہمیختر کہ زاناں ہمیختر ہی وضہار زاناں ۔۔مروشی ما ہماں بھیرا لوکل آپا ووکل آگو اگا بی غؤں تہ واجہ اربندو ائے پھیغام مارا دگ پھیدھاری۔بنگلہ آ یک نظم ایں ،مئے ایزا شیشن او ماچس دی ڈن ائے ملک آژ کھائے او مڑدم ھچھ دی بھیرا آجو نیاں ۔گشاں دی کہ منی ملک ائے مطلو ایں کہ ما وتی ھند ائے کاریگر آنی ٹھائینتھی ایں شئے آنر ترجیح دؤں ۔اینگا دی نعیں کہ واجہ اربندو آ ڈن ائے ملک آنژ ھچھ سکھغ ائے حلاپ احتجاج کھُزا ۔ہموزا کہ چھی اے نوخیں ایں ما ہموزا آژ سکھوں ہماں کہ مئے ملک آ ایں آنہی اے مارا وشادگی کھنغ لوٹھی ۔ہمیں بھیرا پڑھائی آر گتؤ دی واجہ اربندو ائے ویچار باز صاف اسا آں پڑھائی آر چھڑوئی آ کتاوی زانتکاری،ڈگری یا نوکری تکا محدود پوہ نویس آں گوشیت کہ مئے قومی پڑھیائی مئے ورنا نسل ائے دل او دماغ ائے تربیت بی اغ لوٹھی ہماں وخت ہی یک ورنا ملک ائے شر ایں شہری بیس بی۔واجہ اربندو آ پڑھائی آر گتؤ ہماں ٹؤک ہماں وخت گوشتغئے سا مروشی ملک آنہی آ نوخیں قومی پڑھائی اصول
آنگو پورا کھنغیں ۔منی عزیزیں ہم وطن ،ھند اندرا کشتکاری او آنہی آگو جڑسی ایں شئے آنی پھجی آ نوخیں طول او عرض جڑغاں ،گوستی ایں روش آں کسان آنی آپا نوخین گمان آنی تاک بوژتھی آ شزغاں ۔سال آنژ کسان آنی ہماں کہ مطالبہ اسا ،ہماں ہانر پورا کھنغ آپا ہر سرکار آ آنہاں گو وعدہ کھزغئے سا ہماں مطالبہ آر نی پورا کھزی آ شزا ۔باز صلاح او ویچار آنی پھدا ھند ائے سنسد آ زرعی اصلاح آنر قانونی دیم داسا ۔ہمیں اصلاح آژ نہ چھڑوئ آ کسان آنی چنتی مشکل دیر بیسغاں بلکہ آنہانر نوخیں حق دی ملسا ،نوخیں موقع ملسا،ہمیں حق آنی بُنا باز کھمیں وخت آ کسان آنی پریشانی آنر کھمیں کھُزا ،مہاراشٹرا ائے دھولے ضلع ائے کسان جتیندر آ نوخیں کشتکاری قانون ائے استعمال تھانگا کھُزا اے شوار زانغ لوٹھی،جتیندر آ مکی ائے کشتکاری کھزغئے سا او راست بھا آپا دوکاندار آنر شوشکغ طئے کھُزیئ ۔کشت ائے کھُل بھا سئے لکھ سی او دو ہزار،جتیندر آر بیست او پنچ ہزار پیشگی زر دی داسی آ شزا ،طئے اے بیسغئے سا کہ باقی زر آنہی آر پھانزد روش آنی اندرا ملاں برواں مگہ پھدا حالت اینگے پیدا بیسا کہ آنہی آر باقی زر نہ ملسغاں ۔کسان آنژ فصل گتؤ آنہاں ماہ آنی ماہ زر نہ دئے اغ ڈؤل ائے کار سال آنژ جُزانا پھیزاغئے ،جتیندرآر دی چھیار ماہ آنی تکا آنہی زر نہ ملسا ،اینگے حالت آ آنہی مدد کھُزا نوخیں پاس بیسغیں زرعی اصلاح قانون بل آ ،ہمیں قانون آ اے طئے بی کہ فصل شوشکغ ائے سئے روش آنی اندرا ہی کسان آر مچھیں زر داسی آ رواں او اگر زر نہ داسی آ شزا تہ کسان شکایت درج کھنائینتھ کھنت،او ہمیں قانون آ یک دوہمی خاصیں ٹؤک ایں کہ شہر ائے ایس ڈی ایم آر یک ماہ ائے اندرا کسان ائے شکایت آر دیر کھنغی بی۔قانون ائے راست ایں زانتکاری جتیندر ائے طاغت بیسا۔شعبہ چاھے ھچھ دی بی راستیں زانتکاری بی اغ ہر کھسے آپا ضروری بی۔منی سنگت اگر بیداری ایں تہ زند ایں ،وتی بیداری آگو ہزارہا مڑدم مڑدم آنی زند وشتر کھنغ والا ایں یک سؤداگر وریندر یادو ایں ،وریندر یادو کھدیں آسٹریلیا آ اسا دو سال پیشا آں ھند آتکا او نی ہریانہ ائے کیتھل آ آنہی لوغ ایں دوہمی مڑدم آنی بھیرا کشتکاری آ پرالی آنہی اگا یک مزنیں مسلہ اسا ،ہمائی آ دیر کھنغ آپا باز کار بی غیں ،مگہ مروشی من کی بات ائے زریعہ آگو ماں وریندر ائے زکر ہمیں خاطرہ کھنغاں پھرچھے کہ آنہی کوشست جتا آں یک نوخیں دگ پھیدھاراں ،پرالی ائے حل آپا وریندر آ سٹرا بیلر مشین گتا آنہی آپا آنہی آر زرعی محکمہ آژ مالیاتی مدد دی ملسا ،ہمیں مشین آگو آنہی آ پرالی ائے گٹھ ٹھائینغ شروع کھزا او گتھ ٹھائینغ آ پھدا آنہی آ پرالی آر ایگرو اینرجی پلانٹ او پیپر مل آر شوشکتؤ اشتا ۔شوار حیرانی بی کہ وریندر آ پرالی آگو چھڑوئی آ دو سال آنی اندرا یک او نیم کروڑ ائے تجارت کھُزا او آنہی اندرا پنجہ لکھ ائے نفع کمائینتھئی۔منی عزیزیں ہم وطن من کی بات آ ما جتا جتا ،او چنتی ٹک آنی چکا ٹؤک کھنوں ،مگہ یک اینگے ٹؤک آر دی یک سال بی غیں ،ہمائی آر کہ ما وشی آگو یات کھنغ آ نہ لوٹھوں ،نزیخ نزیخ یک سال بی سا ہماں وخت جہان آر کرونا ائے اولی ایں دوروخ ائے بارو آ کَل کھپتغئے سا ہماں وخت آژ گتؤ نی تکا مچھیں جہان آ چنتی مسلہ آنر دیما کھزا لاک ڈاؤن ائے وخت آژ درا بیسؤ نی شیشن چکا بحث بی غیں ،مگہ کرونا آپا نی دی ھچھ ڈؤل ائے بے پرواہی نقصان دؤخ ایں مارا کرونا ائے حلاپ وتی مڑائی آ مضبوطی آگو مڑغی ایں ۔منی سنگت چھی اے روش آنی پھدا شش دسمبر آ بابا صاحب ایمبیڈکر ائے برسی دی ایں ہمیں روش بابا صاحب آر خراج عقیدت پیش کھنغ ائے وتی فرض آر پھیلو کھنے۔ملک آ زمستان دی وتی زور چکا پھیزاغیں ،ہمیں موسم آ مارا وتی کنبہ ائے نیمگا وتی پھیرنڈ آنی گیش خیال ایر کھنغی ایں ،وتی خیال دی ایر کھنغی ایں ۔منا وشی بی کہ ہماں وخت ما اے گنداں کہ مڑدم وتی آسو پاسو ائے گزر مند آنی دی پکر کھناں ،گرم ایں جر داسؤ آنہاں نی مدد کھناں ،جناور آنی آپا دی ساڑتھی باز مشکل گتؤ کھائے آنہاں نی مدد آپا دی چنتی مڑدم کار کھناں ۔منی سنگت اگی ایں من کی بات آ ہماں وخت ما ملوں تہ دوہزار بیست ائے سال آسر بی اغ والا بی ،نوخیں امیت نوخیں باور آگو ما اگا بی اوں ،نی ہماں دی شوئے ویچار او آئیڈیا استاں شوا مئی آنگو ونڈے شوار منی باز باز نیخیں لوٹھغ ،شوار جوڑ او وش بی اے۔باز باز شکریہ۔